منتديات غرام روايات غرام روايات كامله - يتم نقل الرواية هنا بعد اكتمالها رواية أثرني ياسعود باقي في عناي/ بقلمي؛كاملة
مسهية بنت فرج ©؛°¨غرامي جديد¨°؛©

ي مرحبا عسى المانع خير


لا تطولين علينا قدني شايله هم ضيف
حتى بوقت امتحاناتي افكر ايش بيصير عليه 😭💔💔

حبك المدينة ©؛°¨غرامي مشارك¨°؛©

هالرواية من الروايات اللي تحرقوالاعصاب كل مره اقول مابقراها لما تنتهي واغير بالله تكفين خلصيها عشان ضميري مايلعب فيني😄💕

نرجس الهوى ©؛°¨غرامي فعال ¨°؛©

متى البارت ليش كل هذا تاخير

اٌلـكوداء. ©؛°¨غرامي جديد¨°؛©

النهاية

أتُحبّني بعد الذي كانا؟
‏إني أحبّكِ رغم ما كانا
‏ماضيكِ لا أنوي إثارتَهُ
‏حسبي بأنّكِ ها هُنا الآنا
‏تَتَبسّمينَ وتُمْسكين يدي
‏فيعود شكّي فيكِ إيمانا

________
فزوا بسرعه وهم يركضون لداخل

باهي وهو يشوف خالته ام رنوه تبكي دنق عليها ومن الخوف طلعت كلمة يمه منه : يمه وش صايرلك

ام رنوه وهي منهاره: اختي ماتت ماتت ياباهي نوير عيوني ماتت قبل ما اشوفها ثلاث سنين وانا اتمنى شوفتها منوه ثلاث سنين وصية امي وابوي بين عيوني بس راحت مني بغفلة مشاكلكم راحت بسببكم ..ضمها وهو يحس الدنيا دارت فيه

تحرك همام وهو يطلع لفوق ويسمع بكى البنات جمعهم وهو يسكر الباب :

رنوه تعوذي من ابليس هذا قضاء وقدر شوفي بسيل شلون صابره

رنوه وهي تبكي : ماشفتها هذا اللي موجع قلبي ولا رضيت اكلمها

بسيل بعد ماهدوا بفتره رفعت عيونها الذبلانه : ضيف وينه

همام عقد حواجبه وهو يطالعها ب ابستغراب؛ عنده شغل

هزت راسها وهي تمسح على شعر ايار المنسدحه بحضنها التفت لنورسين اللي جالسه بالارض ومتمسكه ب ايد ايار وغافيه

بسيل بهمس هادي: شوفي اختك

ايار مسحت دموعها : من عرفت وهي تبكي معنا وعيت تترك ايدي

بسيل والذاكره رجعت فيها لحركة ضيف : لاتخسرني اختك يا ايار مهما كانت الظروف الاخت سند وامان لك

ماردت وهي تبكي بصمت

تنهد على حالتهم وطلع وهو يمر على سلطان

دخل عليه وجلس وهو يشوفه على السوني يلعب

همس : سلطان دريت وش صار

سلطان نزل اليده: ايه سمعت البكي والصراخ

همام: ولك خلق تلعب

سلطان بهدوء نزلها وهو يطفيها: اصواتهم رجعتني لوقت وفاة ابوي

همام مسك ايده وجلسه بجنبه: الحزن وانا اخوك مايميحه وقت وبتبقى هالذكره عالقه فينا لين اخر يوم بنعيشه تعايش مع الوضع واطلع من حزنك الكل فقد وخسر بس احمد ربك الله عوضنا ب امي وضيف وابوي ماراح ننساه مهما طال الزمن ولا قصر كلنا نهايتنا موت ياسلطان

هز راسه والدمع عانق عيونه ضمه بحنيه وهو يهمس له بكلمات تقويه ويحمد ربه ان اخوه عاقل ولا هو طايش مثل اللي حوالينه

مرت علييهم الايام عصيبه يوم بعد يوم والمسؤوليه صارت بظهر همام وسعود اللي يساعدهم اما باهي دخل الدوره غصب عنه بسبب ضغط سعود عليه

مر الاسبوع اشبه بممر ضيق وخانق لهم جو البيت الكئيب بعد باهي وغياب ضيف المفاجئ وهمام اللي تولى كل شي وحزن خالته وخواته وامه

فرشت الفرشه بالحوش تحاول تغير جوهم ناداتهم بس ماحد رد عليها تنهدت واحساس الذنب ملازمها بعد كلماتها ما التقت بضيف ولا شافته غيابه المربك زاد من توترهم وهمام اللي سحب بـ اخر الترم

جلست لوحده حطت المخده وانسدحت عليها بنص الحوش غرقانه بتفاصيل السماء والنجوم

انسدح بجنبها : وش تفكرين فيه

بسيل: ضيف وين اختفى

همام تنهد: مصيره بيرجع لنا بعدين ماهو صغير يبرر لنا وين راح وجاء

بسيل : بس باهي شفت شلون تعب ورفض يدخل بسبب ضيف وغيابه

همام: هم ادرى بحالهم وبتساؤل : صدق رفضتي العريس انتي ورنوه

بسيل وهي تمد شفايفها: ايه

همام جلس : وليه ان شاءالله الكل يمدح فيهم

بسيل: عندي قناعاتي الخاصه ورنوه تقول ماهي قد المسؤوليات والازعاج

همام : اخ بس لو بكيفي زوجتكم غصب بس الراي راي امك

طلعت على كلامهم وهي تنطق بحزم: ومن قالك اني معهن انا ضدهن

بسيل وهي توقف : يمه

ام رنوه بحزم: وصمه استخيري بعدين ردي لي خبر الرجال بيصير له شهر ملطوع ينتظر ست الحسن والدلال توافق

بسيل: ماني متحركه ولاني موافقه لين مايجي ضيف

ام رنوه: الله ياضيف المسكين حتى الوقت اللي يكون فيه مع نفسه محسوب عندكم مهما غاب ماحد له دخل فهمتي

مشت من عندها وهي معصبه على الاخر

جلست مع همام وهي تتنهد: هالبنات الله يهديهم هدن حيلي

مسك ايديها وهو يضحك: ماعليك منهم روقي بس مانبي من هالدنيا الا ضحكتك

جتهم امه وهي تجلس وبدت سوالفهم عن الماضي

تمر الحياه بين قسا ولين نصيب ومصير مرت ايامهم من غير سندهم كانت اشبه بالموت بالنسبه لهم يتصنعون الضحكه ويواسون بعض بفراقه كيف لشخص واحد قادر يأثر بعايلة كامله من اخوان وخوات وخالات ماحد قدر يكرهه او يلومه التمسوا له فوق السبعين عذر حارات ايامهم وجماعتهم تنرسم الضحكه على شفاتهم بس بقلوبهم عارفين ان كل شي ناقص ولو كان على اكمل وجهه حاولو قد مايقدرون مايغيبون عن بعض ويبقون ملتمين حول بعضهم توقفت حياتهم عليه وانتظروا يوم بيوم رجعته ويعطيهم قرارات محتارين فيها كان اليوم طويل بغيبته والاسبوع سنه والشهور قاسيه عليهم تضحك عيونهم وبنهايتها تطيح دمعه الكل يتعذر انها من الضحك والكل عارف انها من الشوق والفقد عانوا فراق الاب فكيف فراق الاب والاخ والصديق وجليس ايامهم وحلال مشاكلهم وقضايهم والسامع لهم والمؤيد ولو كانوا على خطا ادمى قلوبهم الغياب بدوا يحاربون يأسهم برجوعه ب الامل يمسحون دمعاتهم اخر الليل ويزورهم طيفه ويبدا الكل يحاسب نفسه كم اخطى عليه وكم عذر وكم وقف معاهم مشاعرهم مختلطه ادركوا كمية الخطا بفراقه وغيابه ادركوا ان مكانه حاضر ولو غابت فيه الايام غيابه اربك الكل وخلى الكل يعيد حساباته معه وكانت الوحيده اللي تلوم نفسها بـ اجهاد على اخر لقى صار بينهم وادركت فضاعة كلامها وعرفت انها خسرت شخص لو شافها تموت قدامه ماهز له جفن!

شخص واحد بس لمن غاب ادركوا كمية حضوره بغيابه ضيف هو الشخص الوحيد اللي حضوره بالغياب يزيده هيبه

_________

بعد ثلاث شهور 40 يوم

همام واقف بتعب وهو يحط الشناط بالسياره: خاله متاكده انك اخذتي كل شي

ام رنوه: ايه متاكده

ام همام: اجل يلا نركب

ركبو بالسياره وكان صديقهم بالسفر سعود واخته اللي ساعدوهم بنقل بعض الاغراض

سعود : رنا تبين نمرح ولا نرجع

رنا: اكيد بنمرح بنرتاح

سعود وهو يتنهد: طيب

رنا: من غاب ضيف وانت طافي

سعود: غيابه موجعني

رنا وهي تمسك ب ايده: ماعليك ماغاب الا ويرجع

هز راسه والافكار تدور حوله

رنا: بسيل وافقت بس ماتبي الملكه الا لين يجي ضيف

ابتسم بسرحان: اكيد ماني مملك الا وهو موجود

وصلو سكاكا وقفت سياراتهم قدام البيت اللي اضاءته شغاله وباهي واقف قدام

باهي بترحيب: يالله حيهم

ام رنوه وهي تحضنه:الله يحيك

باهي وهو يدخل وياهم ويدخل الاغراض

طالع لسعود اللي بيمشي مسكه: وين وين يابو نسب مانت متحرك الليله من هينا

سعود : لا والله بروح واجرت

باهي وهو يصفر لهمام: همام شيله معي

ضحكت رنا وهي تشوفهم من بعيد : الله يخليكم لبعض

سعود بعد ماطاحت هيبته قدام بسيل رضخ للامر الواقع: بس بنزل اهلي

باهي بمحبه: اهلك اهلنا ولا

سعود: ايه هذاك لاملكت ذيك الساعه قول هالحكي بعدين رجلي برجلك اليوم ماتنام الاجنبي

ضحك همام: خبول وصاروا نسايب

باهي وهو يدخل الاغراض بعد مادخلو الحريم

اتجهوا للدوانيه وهم يجلسون فيها وحطو شناطهم

سعود: ماشاءالله البيت مره كبير وسيع احلى من بيتكم برياض

همام: البيت كامل مترمم ولا ماكان كذا

باهي وهو يتنهد:ضيف رممه بالسر والشغل كان لين قبل شهر بس وبعده خلصو يعني من قبل وفاة ابوي وهو شغال عليه ومعطيهم فلوسهم كامله واكثر شي استغربته انهم التزموا بكل شي وهو مو موجود

همام دنق راسه: كان مخطط لكل شي لو اعرف بس وين راح

باهي: زرت عمامي امس صدورهم رحبه وماعلى لسانهم الا التراحيب وجدي ينتظر شوفتكم وكلهم مر عليهم وتسامح معهم وبعدها اختفى ووصاهم علينا وعمي يقول انه طلع سلاح وحطه على الطاوله وقال اللي بصدره شي علي وشايل علي يفضي هالرصاص فيني بس فزوا عمامي واحضنوه ومن هالموقف تسامحوا وخواطرهم زانت ووصاهم على البيت وسلم جدي المفاتيح سيارة سلطان الجديده وقال لاجاء عطوه وسأله جدي: وين رايح

قال: ماني رايح مكان وطلع ومن بعدها مابين

همام وعيونه بدت تحمر: ومرته وصلتها ورقة طلاقها

باهي: سالفتها سالفه ضاري يقول انه كذب على ضيف بخصوص مرضها واكتشف هالشي منها وهي اللي خلته يجي من الرياض للسكاكا بلغته كل شي وقالت له انها تبي ورقتها بس مدري وش صار بينهم ومن بعدها ماله بينه

همام بضيق:ياليل يالهبوب

باهي التفت لسعود ونفس النظره اتجهت لهمام:

همام بنقولك موضوع بس مانبيك تنصدم

همام : وشو بعد

باهي : ضيف عنده بنت من هبوب

همام بهدوء: ادري بلغني ضيف قبل لايروح ووصاني انتبه لها ولا اتركها

باهي : بس تركتها وجيت معنا

همام وملامحه انعسفت: كلها يوم وبرجع

باهي وهو يرتكي على ركبته : اهلي شلون ابلغهم لازم يدرون قبل لايروحون لعمامي

سعود : ادخل الحين وقولهم وخذ همام وسلطان معك

باهي وهو يوقف :بروح لهم بس نبهه اهلك يدخلون

سعود : طيب

طلع جواله وهو يرسل لرنا ان باهي بيدخل

رنا : بنات سعود يقولي باهي بيدخل يبيكم

بسيل: غريبه شيبي

رنا وهي توقف: والله مدري بس سعود يقولي انه يبيكم

ركضت لاحدى غرف البنات سكرت الباب وجلست وشبه ابتسامه انرسمت على شفاتها كيف ربي رزقها بباهي وجابه لها ماتدري بس كل اللي تعرفه ان تعلقه بعيالها له دور كبير انها بدا ينتبه لها كثير مواقف حصلت وبينت وش كثر باهي كفو ورجال يعتمد غليه وهالشي ريحها كثير

ابتسمت: الحمدالله يارب
______
بالصاله

جلسوا وهم يطالعون البنات اللي يرتقبون خبر عن ضيف طالع لخالاته وكل وحده تطالع له بنظرات رجاء

باهي بصوت متزن: اول شي اذكروا الله مامن شي يخوف او خبر عن ضيف

بسيل وهي على اعصابها: باهي قول ماعندك ترانا على اعصابنا

باهي :ضيف ترك بين ايدينا امانه قبل لايروح

ام رنوه: وشو هالامانه تخصنا ولا تخصه

باهي: تخصه وتخصنا وبنبره مكسوره: ضيف عنده بنت من هبوب

جمدت ملامحهم لدرجه ضاع السؤال

اكمل كلامه وهو متجاهل ملامح صدمتهم : البنت بالعناية وحالتها على ماهي لاهي ميته ولا هي واعيه عمرها ثلاث سنين

ام رنوه: كيف ومتى وليه ماعلمنا ماحنا اهله ابوه كان متشفق على ولد منه

قاطعها: ضيف بنفسه ماكان يدري ان عنده بنت تذكرون جية عمامي وقتها عرف ان له بنت لعبوا عليه وسجلوها ب اسم ولد عمي عبدالعزيز
لاتفكرون انه خبى عليكم علشان مايبي يفرحكم بس هو نفسه كان مايدري ويوم درى جته وهي مطعونه وحالتها ميؤوس منها تخيلو كمية القهر اللي شالها وهو يشوف بنته بهالحاله ومع هذا ما اهمل احد فينا ولاجاء الفجر تهرب يروح يسرق النظر لشوفتها
انا ادري ان غيابه اثر علينا كلنا بس لازم نعطيه فرصه اقل شي يعيش لنفسه ويتخذ قرارته لحاله ولا يكون فيه احد يضغط عليه ماندري ممكن رايح يصفي عقله ويرتاح اللي جاه مو شي قليل والخافي اعظم اعذوره ولاتنسونه من دعواتكم


ام همام وهي تمسح دموعها: طيب البنت بنشوفها

باهي: مانقدر لانه نقلها للقسم الامني حتى انا شفتها مرتين بالسر

رنوه: ليه حنا اهلها وليه بالقسم الامني

باهي: مايحتاج اشرح نقلها لانه خايف تتاذئ من اعدائه وخصوصا فايز

وقف : هذا اللي صار وتجهزوا بكره عمامي عازمينا على استراحة ومسوين عشاء لجيتنا

ماردوا طلع مع همام وسلطان

همام : تتوقع ضيف بيرجع

باهي:بيرجع لاصفى عقله وارتاح قلبه

همام: متأكد

باهي: مثل ماشوفك

ابتسموا وهم يطالعون سلطان

سلطان: بسم الله شفيكم

باهي:نتسابق للمجلس واللي يوصل اول واحد

ركضوا وتركوه ضحك وهو يركض معهم
______________________
الصباح ومع اصوات العصافير
واشراقة الشمس ولهفة البرد
يتصاعد بُخار القهوه يطالع
غليانها يتمعن النظر فيها مره
ترتفع ومره تنزل ومره يرفعها
وتركد انرسمت على ثغره ابتسمه
رجعها للنار وهو يسكر غطاه قصر على النار

دخل على ريحة القهوه: الله ياريحة القهوه

ابتسم وهو يوقف ويجلسه: تو مانور المكان

ضحك وهو يردف: اجلس اجلس وهات لي علومك وش اخرها

ضيف وهو مبتسم : توق صحت
وقررت ارجع لهم وابدا مع الكل صفحه جديده

يطالعه بهدوء مبتسم: وهذا اللي لازم يصير

ضيف وهو يحب راسه: مشكور ياعم ماقصرت والله

العم : ماعليه يولدي ماسويت لك شي انا كنت موجه لك

ضيف: يصعب علي فراقك والله الشاهد بس هالامر لابد منه اخذت وقتي وكافيه بالتفكير وساعدتني حكمتك بقرارتي لولاك كنت للحين غارق بالهم والحزن

ابتسم العم من غير لايرد وبعد صمت: دام بنيتك فتحت عيونها روح لها

ضيف بمزح: هذي طرده ولا

العم: ايه بالله طرده ولا ضاقت فيك الدنيا ارجع لي

ضيف: من غير لاتقول

وقف وهو يسلم عليه ب ابتسامه واسعه

طلع من المجلس وملامحه هاديه طالع المزرعه وهو يحاول يحفظ شكلها لاخر مره المزرعه الكبيره اللي ترك بداخلها تناقضه وقراراته وطيشه وغضبه
مشى وهو حاس نفسه خفيف يحس الهم راح عن كاهله ركب سيارته وهو يشوفها مغبره ابتسم

: طولت عليك صح

طلع مسرع من خط المزراع وهو متجه ناحية الرياض والفرحه اللي غابت عنه سنين رجعت له بخبر واحد

بعد ساعات من الانتظار وصل المستشفى

نزل وهو مسرع لداخل وصل جناحها ودقات قلبه تتزايد برهبه اول لقاء بنسبه لها وشوقه لشوفتها
غمض لثواني واخذ نفس ودخل عليها

بين الاجهزه وعيونها مركزه بفراغ

وقف وهو يمسك ايديها ويهمس بحنيه: توق انا هينا يابوك هينا طالعيني

عقدت حواجبها بعدم فهم وبدت تبكي وهي تنادي : ماما مميمي عزوز بابا

جتها الممرضه وهي تهديها وتأشر على ضيف: هذا بابا

دنق وهو يبعد الممرضه عنها وحضنها بكل اسئ : انا ابوك وانا اللي قدامك مو عزوز ولامرام

دخلو الطاقم الطبي وقف وهو يشكرهم

احدى الدكاتره: املك انه تصحى اعظم علاج لها ماتوقعنا بيوم تصحى بس ربك كريم

ابتسم وهو يرد عليه

تكلمت الدكتوره: اخ ضيف توق بتطول عندنا كم شهر لانها تحتاج لطبيب نفسي يشرف على النطق عندها من بعد اللي صار لها وعلاج طبيعي وبما انها صغيره تحتاج امها معها ياليت من بكره تجيب والدتها لانها بحاجه لها من بكره بيبدا الجدول والاشراف الكامل على صحتها وبنسمح لك ترافق معها ومع امها

ضيف : جزاكم الله خير

طلعو ورجع جلس على كرسيه وهو يطالعها بهدوء وهي تطالعه بنفس الهدوء ابتسم بحنيه لها

مد يده وهو يمسك كفها بهدوء

دق جواله رد من غير لاينتبه منو

:لي بقلبك مكان ؟!

ضيف يطالع توق ومارد

هبوب:انا بالمطار بين المانيا و انت

ضيف بعد صمت:مو انا اللي تحتارين فيه

هبوب بيأس:ضيف

قفل الجوال ونزله
_______
الظهر بسكاكا

باهي دخل وهو يصرخ: يابنات ماصارت يلا جدي اذهبني كل شوي يدق علي

ام رنوه وهي لابسه عباتها: والله خواتك باردات مايخلصن الا العصر مير ودني انا وام همام وهن خلهن على راحتهن

ام همام وهي تنزل عباتها: لا خلوني عندهن اجي معهن هذلن ماينخلن

همام وهو منسدح على الكنب: باهي نسيبك يروح ولا

باهي وهو يحذفه بالمنديل: شرايك جدي بنفسه اصر انه يحضر

ابتسم همام وهو يتثاوب: خلاص روحوا وانا بنتظرهن يخلصن

باهي وهو يجيه ويمسكه بطرف ثوبه: امش المجلس وش مدخلك هينا

همام وهو مرتكي على باهي: عبالك جاي بكيفي جيت انقل عفش خالتي وامي اللي يشوف عفشهن يقول رايحين مخيم مو استراحه كلها ساعتين وراجعين

باهي وهو يهمس: احس الموضوع فيه نومه هنام تهقى

لف يطالعهم بنظرات شك: وانا اخوك توقع منهن كل شي

باهي: خاله صدق بتنامون هناك

ام رنوه وهي تضيع الموضوع: خلصتو نمشي

همام: ههههههههه خاله طيب قولي شاورينا

ام رنوه بعصبيه: وانا ام رنوه اشاوركم انتم يا انيس وخميس ليه ماغدى فيني عقل انا اخذ الشور من البزران والله زمن

ام همام: ههههههههههههههههه حيلتس فيهم

ام رنوه وهي تمشي معصبه: شغل السياره مت وانا اتحراكم يلا

باهي وهو يقاصي همام: شكلها بالحيل مشتاقه لجمعتهم

همام وهو يتنهد: الحمدالله على كل حال طلع مع خالته وهو يركبها السياره ركب سلطان معهم

باهي: سلطان مانت جاي مع همام

سلطان: لا بجي معك طفشت وانا العب سوني وبعدين سعود نشب لي وهو يسولف صدع براسي

باهي وهو يمزح: ياهو حدك عاد الا ابو نسب

ام رنوه ابتسمت: اي عاد الحين باهي من يناطحه وهو ماخذ هالزين كله

باهي : خاله احس يناطحه فيها مسبه ولا

ام رنوه وهي تضحك: لا انت ناوي تفهمها غلط

بالبيت وبوسط حوستهم:

رنا بالله عطيني الفستان اللي عندك

مدت لهم ورجعت تجلس وبحضنها بنتها: اقول بنات شكلي ماني رايحه

رنوه وهي تنزل الفوطه عن شعرها: ليه ماتروحين جدي بنفسه عزم اخوك وعزمك

رنا ب احراج: والله بنتي مريضه من امس عليها حراره يمكن نرجع الرياض بكلم سعود بعد مايرجع من العزيمه

بسيل: اجل انا بقعد عندك

رنا: لا والله لاتجلسين عندي ولاشي روحي استانسي من زمان ماشفتي عمامك

بسيل وهي تاخذ بنتها: حتى ولو ماني تاركتك لحالك

رنا : يابنات لاتحرجوني تكفون روحوا كلكم انا بكلم سعود واشوف وش وضعي بالضبط

ايار وهي تطالع الكل حاط اغراضه بس باقي هي:
بنات مالقيت اغراضي

رنا: اسالي امي

ايار: امي راحت مع باهي وسلطان

قامت بسيل بعد ماخلصت شعرها: شنو تبين بالضبط

ايار: ابي لبسي امس غسلته والحين ادوره مالقيته

دخلت نورسين وهي لابسه التشيرت حقها: بنات من شاف الويفي

صاحت ايار : هذا حقي ليش لابسته امس غسلته

نورسين رجعت على ورا بخوف: بسم الله الحين افصخه بس لاتصرخين خرشتي البزر

ايار بعصبيه : نورسين كم مره اقولك لاتلبسين اغراضي لاتلبسين ماتفهمين انتي

نورسين بنفس مستوى الصراخ: اقول عاد من زين لبسك هذا انا اخليك تلبسين ملابسي ولا اجي اتهاوش معك وفوق هذا ماتغسلينهم بعد تقطينهم ب اي مكان

بسيل وهي تمسك ايار وتحطها وراها: اهدوا انتم خوات هذي انا ورنوه دايم نلبس ملابس بعض

نورسين: ادري فهمني اللي وراك تراك طفشتيني مو انتي الوحيده العصبيه ترا مهما كنت طيبه وساكته كل شي له حدود ولبسك كله الحين بقطه عليك مابي منك شي

طلعت وهي معصبه اول مره نورسين تعصب بهالشكل

استحت رنا واخذت بنتها وطلعت للصاله الثانيه

رنوه : ايار كم مره نقولك لاتحطين حرتك بنورسين تراكم كبر بعض عيب عليك البنت طول عمرها ساكته ومحترمتك وتطيعك وانتي ولا همك تراها اختك ولا فيه احد احن من قلبها عليك وانتي شفتي كيف تخاف عليك ومارضت تتركك دقيقه وحده وانتي تعبانه وضايقه وبالاخير تهاوشينها كذا قدام رنا حتى المره استحت وطلعت كم مره افهم فيك كل شي وله طاقه وحدود

بسيل مسكت كتفها وهي تشوفها كاتمه البكيه: ضايقه هذيك غرفتك ابكي وصرخي بس لاتطلعينها علينا يكفي اللي فينا ي ايار يكفي

ايار : ماكان قصدي والله

حضنتها بهدوء وهي تهمس لها: عدلي من اسلوبك وتأسفي من اختك وحبي راسها

ايار: طيب

ابعدت وهي تمسح دموعها

جلست بسيل ترتب اغراضها وتسكر شنطتها وبهمس: تصدقين امس فتحت الواتس ولقيت ضيف مستلم كل الرسايل بقروب وبالخاص بس مارد ولا بحرف

رنوه بنفس الهمس الخافت: خليه بيجي يوم ويرد علينا احس زعلانه عليه بنفس الوقت احسه محتاج هالوقت لنفسه الكلام اللي قلتيه له قبل لايغيب خله يستوعب اشياء كثير ولا ماكان راح بنفسه لسكاكا واعتذر من الكل وشفتي استقبال عمامي وحفاوتهم فينا

بسيل: وهو طيب

رنوه: هو تعود على الغياب تعود على الرياض ضيف لو رجع هينا مستحيل يسكن بيرجع للرياض ويجلس هناك

بسيل :وحنا نتركه

رنوه : لا انا عن نفسي من تخلص الاجازه برجع

بسيل: انا معك

رنوه: غصبن عنك شغل زوجك هناك

بسيل ببتسامه خفيفه: الله يتمم على خير
_______
بليل ازدحمت الاستراحه بالمعازيم من عمام وجماعه واصدقاء
وقفت سيارة همام وهو مرتبك: بنات كيف شكلي بالله

بسيل : والله تهبل بس انزل

رنوه: يلا ننزل

نزلو مع بعض ومتوترين
ومتمسكين برنوه وبسيل

دخلو البنات وكشفو وهم يعدلون اشكالهم على السريع

بسيل بتوتر: شعري حلو يابنات

رنوه : ايه يهبل بس خلونا ندخل

طلعت شكلها لاخر مره وبعدها دخلو

وقفو لهم عماتهم وحريم اعمامهم وبدوا يسلمون على بعض بحفاوه وبعضهم بدموع

واقفه من بعيد تراقب المشهد : واخيرا اجتمعنا

عمتهم: الحمدالله يارب اللي خلانا نعيش هاللحظه يحلو هالجمعه ويحلو هالبنات وحفاوتهم

عند الرجال وقفين بجنب جدهم ويقهون كان الكل مستانس ومبستم وصدروهم خاليه من الحقد والهم بموقف واحد حل مشكلتهم اللي متعلقه صارلها 3 سنين صفت نفوسهم وبالنهايه الاهل مالهم الا بعض وماتكتمل حلاوة الجمعات الا بشوفتهم

بخط السكاكا راجعين:

الله يهديك ياسعود كان حضرت

سعود: ماني حاضر ضيف موجود بالرياض تبيني اتركه لحاله وبنته صحت

رنا: ماشاءالله اجل معك حق

سعود : اهخ يارنا وربي قلبي على نار ابي اوصل بسرعه للرياض

رنا: اقول سعود

سعود : لبيه

رنا: دامك رايح المستشفى بكشف ع بنتي من امس وهي تعبانه

سعود: اي ماعليك اول ماندخل بنروح لهم

بغرفة توق بعد ماخلصت الجلسات العلاجيه
رجعوها للغرفه وهو معها حضر كل جلساتها ومتمسك ب ايدينها

نطقت بتعب: بابا

فز من كل قلبه : لبيه ياعيون بابا

تطالعه بتعب واشرت على المويه بجنبه اخذها وهو يشربها بحنيه

انفتح الباب ودخلت بهدوء ومعها شنطة السفر

مانتبه لها وهو يشرب توق بعدها نزلها بهدوء لف وهو يطالعها وعيونها مدمعه

تقدم لها وهو ينطق بهدوء: سلامة الاسفار

بكت وهي تطالع بتوق وحالتها

حضنها وهو يواسيها: للحين باقي للايام عذر للحين تنتطر منك اهتمام مافاتك شي كل اللي راح انسيه هاليوم بداية جديده لك ولي ولتوق بنتك بحاجتك ياهبوب لاتوجعينها بالرحيل مثل ما اوجعتينا قبل

شدت عليه وهي تبكي جلسها على الكرسي وهو يهديها : توق توها صغيرها يمديك تربينها من جديد وتحضنينها

شدت على يده: خايفه

ضيف: تثقين فيني

هزت راسها

رد بهمس يطمنها: ماحد بيمسك وانتي معي

هبوب : والموضوع اللي راح

ضيف: قلتيها راح مهما كان حجم زعلي منك الا اني ما انكر ان بقلبي لك مكان بس شي واحد ما افهمه ليه كذبتي انتي وضاري بقصة علاجك

هبوب: ماكنت ابيك تجبرني اعيش معك وانت عايفني

ضيف: وكيف بطاوعك قلبك تتخلين عنها

هبوب وهي تنزل نقابها: خايفه ماتفهم كيف يعني خايفه التعب النفسي والجسدي اللي تعرضت له كان اقسى بمراحل من اني اترك بنتي تهدد فيك وبعدها ببنتي كيف تبيني ارجع بعد كل اللي صار اضحك بالبدايه كنت برجع وبشوف مكانتي وين بس تعبت ماقدرت اتماسك اكثر من كذا صحيح اني مو مريضه بس بنفس الوقت احس ب الم ينتشلني لاجابو طاري توق لاني وقتها اتذكر كم عانيت وتألمت وانا اولد وانحرمت منها كاني جايبتها بالحرام اشياء ياضيف ماني قادره اتخطاها

ضيف وهو يوقف: ماعليه نبدا من جديد قومي غسلي وجهك وصلي ركعتين استخيري فيها وبعدها بنتمشي شوي بعد ماتنام توق

هبوب: طيب

وقفت وهي تروح

يناظرها وعقله رافض وقلبه راضي هز راسه بيأس وهو يطالع لتوق اللي بدت تغفي

طلع جواله وهو يتصل على باهي

دق جواله بعز سوالفهم طلعه وهو يطالع الاسم فز من مكانه وهو يطلع من الاستراحه ويرد

ضيف: الو

باهي وجسمه ارتعش: ضيف

ضيف ب ابتسامه: ياعين ضيف ياباهي

باهي والرجفه سرت بجسده جلس من الصدمه: وينك وين مكانك ياضيف ليش اختفيت فجاءه ليش ابعدتني عنك

ضيف : ما ابعدتك عني بس كنت محتاج وقت لنفسي وبنبره حزينه : اسمعني انا بالرياض وتوق صحت من الغيبوبه صحت ياباهي

باهي بفرحه: والله الحمدالله يارب اجل بعد شوي بنمشي لك

ضيف: لا لاتمشون ولاتجي خلك معهم وانا ب اجيكم

باهي : انا جاي ياضيف

سكر بوجهه وهو معصب من رفض ضيف لجيته

ضيف وهو يطالع الجوال: سكر بوجهي يلا ماعليه شكله معصب

دخل سعود وهو يرحب بصوت عالي: هلا هلا بالغايب الغالي واخيرا بينت

ضيف وهو يوقف ويسلم عليه : هلابك

سعود وهو يتجه لتوق وجايب لها حلويات والعاب نزل الاغراض بجنب السرير حب راسها وهو يبتسم لف على ضيف: كبرانه الحلوه وب ابتسامه : ماخذه منك كثير حتى رسمة العيون ولونها

ضيف وهو مايحب سيرة لون عيونه: اقول سعود

سعود وهو يجلس : سم

ضيف: اهلي داخل

سعود: عبالك بطلع هه والله مو طالع

ضيف وهو يروح له: عبالك استهبل معك وربي ام توق موجوده

فز بفشله وطلع لحقه ضيف وهو يمسك ايديه: ايه واخبارك يانسيب

سعود وهو يبتسم: اشوف العلوم عندك

ضيف: وانت عبالك مادري انك خطبت وبعدها خطب باهي

سعود: ننتظر جيتك ونملك ونعرس وقفت فرحتنا بغيابك

ضيف بعتاب : على اساس حسيتو لو غايب سنه برجع القى عيالك معك

سعود : هههههههههه انا ماعندي مشكله بس اختك رافضه لين تجي

ضيف: يابعد عيوني ياخيتي اما انت وباهي ماصدقتوا خبر

سعود : اقول ارجع لام توق بروح لاهلي هينا

ضيف: طيب مرني كلما فضيت

سعود: ابشر

رجع وهو يشوف هبوب تصلي طلع وجلس برا وهو عاجز يدخل وبعثرة مشاعره بداخله يحس بالجمود ويحس بالشوق عقله رافض قربها وقلبه يبيها وهو مابين هالامرين تاهه وتبعثر

______________________


اٌلـكوداء. ©؛°¨غرامي جديد¨°؛©

بعد مرور 5 شهور مرت ايامهم برجعة ضيف التمو حوالينه بفرحه رجعو الرياض علشان توق وعلشانه
تعايش مع واقعه وبدا مع هبوب بداية جديدة

____
بيوم زواج سعود وباهي

الظهر

واقف وهو يلبس : هبوب عجلي علي بطلع

هبوب وهي تركض: تكه بس بجيب العود

ضيف وهو يتنهد: اخلصي يامره مابقى رجال مادق علي

هبوب وهي تجيب البخور :هاه حطيته

بدا يتبخر وهو يسمع صياح توق

شالتها هبوب وهي تجيبها لضيف: هاه هذا بابا ازعجتينا فيه

ضيف وهو ينزل البخور على الطاوله: جيبيها بس خليها تتدلع على راحتها

شالها وهو يحبها ويلاعبها

هبوب: ضيف نزلها مو زين لها كثرة اللعب

نزلها على السرير وهو يبوسها: يلا انتبهي لها بشويش وانتي تبدلين لها ولاتنسين علاجاتها

هبوب: والله ادري
ضيف وهو ياخذها بحضنه: ادري انك تدرين بس انبهك من باب الحرص كافي اليوم اجلنا موعدها

شدت من حضنه: الله كريم

ضيف وهو يبعدها: يلا تبين شي

هبوب ب ابتسامه: انتبه لنفسك

ابتسم لها وهو يطلع

التفت لتوق اللي بدت تبكي: ياكبر غلاه عندك يالنتفه

خذتها وهي تغسل وجهها وتلبسها

دخلت بسيل وهي مرتبكه: هبوب مدري وين طرحتي شفتيها

هبوب: ايه بكبتي تلقينها حطيتيها عندي امس

فتحت الكبت وهي تاخذها

طلعت هبوب تضحك عليها اكلت توق علاجاتها واخذتها وهي تطلع من شقتها

نزلت لتحت وهي مبتسمه تشوف الركبه اللي صايره والكوافيرات التفت وهي تشوف عماتها موجودات ومنسدحات يسولفون مع ام رنوه
وحريم عمامه جالسات وبنات عمها الكل كان موجود والبيت مليان ب اهلهم اتسعت ابتسامتها وهي تشوف الكل على قلب واحد

بمجلس الرجال:ضيف

ضيف وهو يهمس :شتبي عاشر مره تناديني

همام:رنوه تقول البيت مزدحم كل حريمنا موجودات تبي اقل شي صحنين كبار من الغداء

ضيف:قولها ضيف يقولك ابشري

همام:وين رايح ماتشوف العيال كلهم بالمجلس

ضيف:والقاعه بعد مليانه كل جماعتنا راحو هناك اشوا اني ذبحت للغداء ولا كان افتشلنا واللي بالمجلس عيالنا كلهم عيال عمكم عادي لو يبون الغداء قلهم يجون القاعه

همام وهو يمسح وجهه من الحر: طيب طيب

ركب سيارته وهو يمشي للقاعة

همام : اوف وينك ياباهي

اتصل عليه واخيرا رد

: هلا

همام؛ وينك كل شي صار على قلبي وقلب ضيف درينا انك معرس والله

باهي بتكبر: اقول وش تبي اليوم ناقهه لي ومستأذن من ضيف قال براحتك

همام: وسعود وينه ان شاءالله

باهي وهو يطالع سعود بجنبه: هذا هو جالس يسوي تنظيف بشره

همام : ياربي الله يعين اللي يسوي لكم من زينكم عاد

باهي: اقول داق تسب انت اليوم عرسي المفروض تفرح

همام: اي خير ان شاءالله اخلص بس ورنا جيش بنوديه القاعه

باهي: عط سيارتي سلطان يسوقها انا معلمه على السواقه

سكر بوجه : فاضي يسولف بعد

ضحك وهو بصالون: الحيوان سكر بوجهي

سعود : تستاهل رفعت ضغطه

باهي: عاد شوف من يتكلم على رفعة الضغط

مارد عليه وهو يطالع نفسه ويبتسم: فديت الزين والله ياحظ اختك فيني

مالت شفته وتكلم بثقه: اقول سعود انت حيل مغرور بنفسك مع انك مو بذاك الزين يعني مانت
مثلي

سعود عفس ملامحه: من زينك عاد مافي شي حلو اللهم كرمك بس والباقي خلها على الله

رمش بعيونه: خير ان شاءالله

دخل عم باهي ومعه عبدالعزيز: ماخلصتو

تعدل سعود وهو يجلس برسميه

باهي وهو يتعدل: قربنا نخلص

عبدالعزيز طالعه بهدوء وطلع : استعجلو

ركب سيارته وهو ساكت ومايدري كيف يعدي هالليله الثقيله على قلبه مع ان الايام اللي راحت كان يجيهم ويروح بس الحين ضيف متواجد وياهم صدق انه استقبله واكرمه وكان اسلوبه عادي معه بس يحس بشي انكسر بينهم يحس بحاجز مبني مابينهم مستحيل يتواصل معه عادي مثل قبل


ركب عمه: انت وراك طلعت

عبدالعزيز: انكتمت من الحر

عمه طالعه ب استخفاف: اي صدقتك حرك بس للقاعه ضيف لحاله يستقبل المعازيم

عبدالعزيز: جدي وعمامي معه

عمه : اقول عبدالعزيز انت زاير فايز!

عبدالعزيز: رحت لهم بس رفضوا يدخلوني بغيت اكلم ضيف بس تراجعت

عمه: انتبه تكلمه بخصوص هالموضوع ماصدقنا ترجع الامور بخير بعدين فايز سالت عنه وقالو بينقلونه بكره لسجن الجنوب

عبدالعزيز: الله يهدي من يشاء

بليل :

مع ربشة العرس وزحمة المعازيم واقفت خواته بالاستقبال والابتسامه مرسومه على وجيه الكل
وخالاته على اليمين مع عماته الكبار

هبوب جت ومعها المباخر: رنوه حطيت وحده بغرفة التصوير بسيل والثانيه بغرفة رنا والباقي وين اوديهم

رنوه: حطيهم على طاولة الاستقبال

مشت وهي تحطهم مسكتها خالتها: اوقفي معي علشان يعرفون انتس مرة ولدنا الكبير

ابتسمت: ابشري

وقفت وياهم تسلم بعد ماوزعت المباخر اكتملت القاعه وبدا الرقص وهبوب شايله بنتها ومبعده عن الزحمه

دق جوالها وقفت وهي تدخل بسرعه لغرفة بسيل

بسيل وهي تطالع لها بعد ماخلصت التصوير: شفيك

ماردت وهي تكمل المكالمه: هلا ضيف

ضيف بهدوء: اسمعيني انا حجزت ب اوتيل قريب من القاعه علشان ترتاحين فيه انتي وتوق

هبوب انعفست ملامحها بضيق: طيب

ضيف: بعد الزفه بمر اخذك

هبوب: ضيف مايمدي بستانس مع الناس من زمان وانا ماشفتهم ولا

طفى شحن جواله تنهد وهو يستغفر: لاحول ولاقوة الا بالله
رجع للقاعه وهو يشوف ربعه مجتمعين على سعود وباهي

سلم عليهم: ياهلا والله ومرحبا

تقدموا وهم يسلمون عليه

مقرن ب ابتسامه : وين توق بنشوفها

طالعه ضيف ب ابتسامه: داخل مقدر اطلعها

تفاجئ والضباط الكبار دخلو ومتوجهين له فزوا معه عمامه وجده قدم جده وعمه الكبير وبعدها سلم عليهم بعد السلام وقف رئيسه وصفو فرقته وهم يسلمون عليه بالتحيه العسكريه

رد عليهم التحيه والابتسامه مو سايعته

يطالعهم عبدالعزيز وهو مبتسم التفت لعمه: على صغر عمره الا انه كون له علاقات ثقيله بمعنى الكلمه ولا من يصدق الرئيس ... والضباط المعروفين بكل مكان يحضرون عرسنا

عمه: يحق له تدري ابوي يقولي انهم للحين يحاولون فيه يرجع لهم بس هو رافض والحين اكبر ضابط فيهم جاي وفوقها يعرضون له بالتحيه اتحدا تلقى فعاليات عرس مثل عروس عيال راجي

بدت الزفه ودخل باهي ورفض سعود انه يدخل توجه بالاول لاخته يسلم عليها وباهي راح لبسيل يسلم عليها

رنوه وهي مبتسمه: الله يتمم عليكم فرحتكم ياعيوني انتم

باهي: وعقبال مانفرح فيك ياعين اخوك

سلم على بسيل وصور معها وبعدها طلع لرنا

دخل الغرفه وهو يشوفها تضحك مع سعود سكتت من دخل مسكت ايد سعود برجفه

باهي وهو يتقدم لها باس راسها وبعدها مسك ايديها الثانيه وهو يطلب المصوره تصورهم
وبعدها التفت لسعود: اقول يالحبيب اهلي بيدخلون واختي تنقعت هناك رح لها

سعود وهو يعدل بشته: رايح بس وصيتك رنا

باهي: ماتعبت انت من شهر وانت كل يوم تدق علي وتوصيني

سعود ضحك وهو يحاول يخفف عن رنا التوتر: يلا يلا رايح

باهي التفت لها وهو يبتسم ارتبك بثواني وتلخبطت مشاعره ماهو عارف شقول دخلو خالاته وخواته كلهم وبدوا يباركون له ويصورون معه

اما بالغرفه الثانيه : ضيف واقف مع بسيل وهو يمسك ايدينها ويهديها وينصحها وسعود واقف مو عارف كيف يدخل

التفت ضيف وهو يشوف طرف بشته: سعود ادخل مامن احد

دخل وهو مرتبك : يارجال انت لحالك مسبب لي رعب

ضيف بصوت ثقيل: اقول عاد ما اوصيك بنور عيوني ياسعود

سعود ارتبك ماعرف يرد: خير خير ان شاءالله

ضيف هو يضحك على ربكته ابعد وهو يعطي مكانه لسعود بدت المصوره تصورهم اما هو ابعد

سعود: تعال صور معنا

ضيف وهو يتذكر ليلة زواجها ضاقت ملامحه وهو ينطق بهدوء: ماحب اتصور

رافقهم لين ماطلعو للفندق وزفهم وترك همام يزف باهي وصلهم وهو يوصي سعود

رجع للقاعه وهو يشوف سيارة باهي توها تتحرك ضحك بين نفسه: يهالولد مشقي نفسه

نزل وهو يشوف الساعه 11 : علاج توق
طلع جواله وهو يتذكر انه طافي شحن

وقف عند مدخل الحريم وبدا ينادي على اسم هبوب

ضاقت ملامحها وهي تسمعه يناديها مافي غيرها ام توق لبست عباتها مسكتها ام همام
: وين رايحه تو الناس

ضيف ينادي برا بروح اشوف وش يبي

عطت توق لام همام وهي توصيها ماتتركها لو دقيقه

طلعت له : هلا

ضيف هو منحرج انه قريب من باب الحريم ابعد

: تعالي السياره مشت وراه وركبت السياره

هبوب: امر

ضيف: علاج توق

هبوب: ادري ماخذه علاجاتها معاي

ضيف طالعها : ليش ماجبتيها وين خلتيها

هبوب: مع خالتي ام همام

ضيف وهو يمسك اعصابه: انا كم مره اقولك توق لاتتركينها حتى لو خالتك او اختك لاتخلينها معهم ماتفهمين هبوب مو كل مره بجلس اتهاوش معك على نفس السالفه

ماردت وهي تطلع جوالها : الو هلا خاله ممكن تطلعين توق لنا برا لان بنمشي ايه الحين بجيك

نزلت وهي ماتطلع له اتجهت للباب وقفت ثواني ومدت ايديها لخالتها واخذت بنتها فتحت بابه وهي تعطيه توق: صبر خلها معك بدخل اجيب اغراضي واغراضها

دخلت لداخل وهي تتجاهل الكل دخلت الغرفه الصغيره حقت اهل المعرس اخذت شنطة توق وشنطتها وطلعت مسكتها ام رنوه عند الباب: وين رايحه

هبوب وهي تمسك ايد خالتها نزلتها بهدوء : ضيف من الفجر وهو صاحي دق علي يقول تعبان وبيروح يرتاح

ام رنوه: اي خليه يروح لحاله ليش ياخذك تو الناس ماجت 12 بنساتس وبعدها بنطلع للاستراحه

هبوب ب استغراب: استراحه

ام رنوه: ايه ضيف حاجزها امس هدية للمعاريس بيسوي فيها عشاء المسائيه هناك وفيها غرف لنا وامس اخذ بعض اغراضنا ونقلهن هناك على مانجي وقررنا نطلع من هينا للاستراحه ليه ماقالك

هبوب : الا قالي بس نسيت يلا مع السلامه نتقابل بالاستراحه

ابعدت عن خالتها وهي تطلع للسياره دخلت وهي تحط اغراضهم ورا
اتجه للفندق وهي ساكته اخذت توق منه ومانطقت بحرف دخلو

:هبوب برجع القاعه تعرفين مافي احد هناك والمعازيم

هبوب ببرود: روح

طالعها ب استغراب:طيب بروح

طلع وهو يسكر الباب نزلت نقابها وعباتها حطت توق على السرير وهي ماسكه نفسها ماتبكي طلعت لبس لتوق وبدلت لها وبدت توكلها علاجها
اخذتها بحضنها وهي تهزها بحنيه بدت تغفي توق بسبب مفعول العلاج نامت نزلتها على السرير وحطت حوالها مخدات اما هي وقفت قبال المرايه طالعت لبسها اللي كان عباره عن فستان بلون الاسود ضيق من عند الصدر ويتوسع من عند الخصر ماكان فيه شي يميزه غير فتحة الظهر الوسيعه وعقدها الناعم وتسريحة شعرها الهاديه وميكاجها الناعم وفستانها حتى انها طقمت لتوق بفستان اسود قصير نافش تذكرت خالاتها وهم يهاوشونها خايفين على توق من العين

طلعت من الغرفه شهقت وهي تشوف جالس بالصاله مرت من جنبه وهي تاخذ شماغه اللي على الطاوله

: ليش رجعت

ضيف وهو يتأملها : لاتسأليني

صدت وهي تمسك نفسها ماتتكلم مشت وهي شاده على شماغه مسك ايدها وبهدوء نطق:
خلك معي

هبوب: بروح لتوق

ترك ايدها وهو يتنهد: روحي ترا جايب لك لبس تلقينه بالكبت لك ولتوق

هبوب : ماردت وهي تدخل الغرفه وتقفلها

بدلت لبسها لبجامه جابها لها انسدحت بجنب توق وهي تمسح على شعرها بنعومه

طق الباب

قامت وهي تفتح الباب : هلا

ضيف وهو يزحها : بنام معكم

هبوب طالعته ب استخفاف: طيب

انسدح وهو على ثوبه قرب توق له وهو يحبها بهدوء لف وهو يشوف هبوب تاخذ لحاف

ضيف : وين رايحه

هبوب: وين بروح بنام بالصاله وانت نام عند بنتك

ضيف ابتسم : هبوب ماكبرتي على الغيره

هبوب وهي تلف بعصبيه: بتكون سخيف اذ على بالك غيره شوف تصرفاتك معي شلون بعدين تعال تكلم

ضيف تعدل وهو يهمس: قصري حسك لاتقعد توق

هبوب ماردت وهي تطلع

طلع وراها وهو يسكر الباب

: وش اللي مو عاجبك بتصرفاتي

هبوب تخصرت: تراني مو مليت ولا طفشت بس جالس تكسر فيني لدرجه احس نفسي ولا شي عندك

ضيف مسكها وهو يجلسها على الكنب وجلس هو ع الطاوله : وبعد

هبوب لفت : ضيف الكل يدري انك بتطلعهم لاستراحه وحاجز لهم وانا زوجتك اخر من يدري
لمن رجعت معك وترضينا قلت لي انسي كل اللي صار وارجعي نعيش مع بعض من جديد رغم مخاوفي وكل شي صار لي وافقت انت ماعمرك خذيت اللي صار من جهتي وش عانيت وش شفت الكل تعاطف معك ونسى هبوب الكل يسال ىش صار بضيف ونفسية ضيف الكل كان حزين بسبتك انت وانا كنت بينهم وناسيني ماقولوا وش شعوو البنت واخوها بليلة زواجها مهددها وبيوم زواجها يمسكه زوجها وبصباحيتها يجون اهلها يهددونها ويهددون زوجها ماتدري وش كثر عانيت من طلعت من باب الشقة الين وصلت المزرعه وانا بحاله مايعلم فيها الا ربي شفت لي شي ماينشاف تعايشت مع شي كان اقسى وامر من كل شي
جيت سألت عني قلت زوجتي وينها طلعوها لي ب اي حق تاخذونها سكت وزعلت وتركتني بين ناس ماتخاف الله ولا تهاب الحرام والحين بعد مانسيت كل هذا وحاولت اتعايش مع الحياة تجيني بحركاتك هذي ضيف ترا والله ماعاد فيني صبر ولا طاقة كل شي صار ورا بعضه اللي سمعته شي قليل ماسمعت وش صار لمن دروا اني حامل بتوق

مسحت دموعها اللي نزلت لا ارداي :
الله يخليك اذ للحين تتردد فيني وبمشاعرك خلني اروح انا راضيه بكل شي تقرره بس مو راضيه اعيش معك بين احبها وبين عفتها

يطالعها بوجع وهي منهاره على الاخر شدها لحضنه وهي تبكي :

كل اللي سويته وتقولين متردد يابنت الناس متى ضيف عاف شي ورجعه متى عفتك انا كنت اكذب على نفسي وعلى اللي حولي علشان مايشلون همي ولا انا احبك ومن كثر حبي لك مو قادر حتى اكرهك او اعاتبك لاتقولين اني رحت من غير لا اسال اسالي عمي من اللي كان يوقف ع بابه لين مايجي الفجر ولا احد يدري لين يطلع يطردني ويسفل فيني قعد اكثر من اسبوع وانا ع هالحال كلما رحت لاحد سكرها بوجهي وقفت منتظر اكثر من كم شهر ولا جاني خبر عنك تسكرت البيبان من كل الجهات واخرها قالو انك تبين الطلاق واصروا وكذبت عليهم اني بطلق وانحشت للرياض علشان يفكوني من هالسالفة لايخدعك احساسك اني ممكن اتخلى عنك او تخليت

ابعدت عنه وهي مو قادره تتكلم
مسك ايديها وهو يرفعها ويغمض عيونها:
لاتفتحين عيونك
هبوب وهي تتكلم ببحه: وش فيه

ضيف: خلك مغمضه لاتفتحين
هبوب: طيب

ابتسم وهو يطلع من مخباه علبة شكلها انيق رفع يده وهو يمسك ايديها وينزلها

فتحت وهي تطالعه ماسك ايدينها ويطالعها ب ابتسامه اشر على العلبه وهو يعطيها : افتحيها

فتحتها وايدينها ترجف وهي تشوف العلبه بداخلها خاتمين دبله مكتوب داخلها تاريخ زواجهم بكت بزياده وهي تهمس: ضيف

ضيف ضحك وهو يحضنها :انتي كل شي تبكين عليه

هبوب : اسفه اني ظنيت فيك ظن سواء اسفه والله اسفه

ضيف تنهد : يابنت الحلال ماصار شي عادي ما الومك انا كنت مشغول بزواج اخواني والحوسه اللي صارت وانشغلت عنك ولا عطيتك من وقتي انا اللي اسف والحين عطيني ايدك

مدت ايديها وبدا يلبسها الخاتم والابتسامة مرسومه على ثغرهم مد ايده ولبست وهي تبكي حضنته بكل حب وهو يضحك : يابنت الحلال خنقتيني

هبوب وهي تبعد: يحق لي اول مره تقولي احبك وادري اني ماراح اسمعها لين ما اصير عجوز

ضيف وهو يوقف ويوقفها معه: زين انك عارفه بنفسك

ابتسمت له وهم يدخلون على توق انسدحوا وهم يحضنون توق اللي بوسطهم حطوا ايدينهم فوق بعض وعيونهم تحكي عن شوقهم واعتذراتهم لبعض شد على يدها وهو يحط توق بحضنه ويهمس لها: لو تدرين ياتوق وش كثر احب هبوب

هبوب وهي تهمس: لو تدرين بعد وش كثر احب ابوك البارد

ضحك: بارد انا

هبوب: ايه اعصابك كانها حاطها بثلاجه الله يرزقني برودتك

ضيف : هذا لانك ماتدرين وش كثر عانيت وتعبت

هبوب: انتهت هالايام ومقبلين على ايام حلوه ب اذن الله وبهدوء: تصدق كل يوم انام فيه بجنبك اخاف اني اقعد الصباح وانوخذ من بين ايدينك مثل ماصار قبل لو تعرف كم الخوف فيني ياضيف طول مافايز عايش انا ماراح ارتاح بحياتي

ضيف وهو يطالعها بتأمل: تفائلي خير ماحد يقدر ياخذك من بين ايديني وانا قبل ماقدروا ياخذونك لين مارحتي انتي معهم وفايز لاتخافين منه لانه انتهى وعايش بهلوسة ماحد يعلم فيها الا ربك ادعي له بس الله يرجع له عقله ويصحى

هبوب ب الم: مابي ادعي له او ادعي عليه ولا ابي طاريه او اسمه فيه اشياء ياضيف صارت معي من قبل اهلي وانت ماتردون فيها وهو كان سبابها وانا ماراح اسامح او ادعي اللي صار صار وربه حسيبه

طالعت بتوق: تكفيني توق عن الدنيا كلها

ضيف: وابوها

هبوب: ابوها بعد

ابتسم: واضح ان قلبك للحين شايل

هبوب طنشته: خلنا ننام لاتصحى توق والله ماتخليني انام

هز راسه وهو ماسك ايديها وحاضن توق
______

عند المعاريس :

بسيل وسعود:
اثنينهم مرتبكين

سعود جالس وهو يطالعها جالسه قباله/ ايه وش طموحاتك

بسيل مسكت لسانها وهي من قابلته صلو وتعشوا وللحين يردد عليها وش طموحاتك وش تتمنين

: ماعندي طموحات

سعود من الربكه نطق: وش اسمك

عضت شفايفها : منيره

سعود ضحك : والله متوتر معليش بسيل

بسيل ماردت وهي مو قادره تتكلم وياه : بدخل انام

سعود وقف وهو يمسك ايديها: وش فيك عصبتي وربي مرتبك مو عارف انطق حرف

بسيل : طيب

سعود جلسها جنبه: اهدي قالو لي انك عصبيه بس مو كذا الله يهداك

بسيل ماردت وهي تبتسم تسليك

سعود بدا يسولف لها عنه وعن حياته وش صار معه

بنص سوالفه وهو متحمس: والله يابنت اني ضربتهم ضرب الين سكت وهو يشوفها نايمه بعمق
طالع ساعته ولا الساعة اربع لاحول الله كل هالوقت وانا اسولف لحالي طالعها وهو متوتر مايدري وش يسوي وقف وهو يهز كتفها: بنت بنت قومي
قعدت وهي تطالعه له بنظرات شككته بنفسه دخلت الغرفه وهي تسكر الباب بقوه

سعود: بسم الله قول لي نار بس مو كذا الواحد يهدا شوي

دخل وراها وهو ينسدح على السرير عطته ظهرها وهي تسبه بداخلها
______________
اما باهي ورنا

عدت ليلتهم بمحبه وهدوء وتفاهم بينهم

بعد مرور سنه :

واقفين قدام مزرعة كبيره بسكاكا كانت هدية من ضيف لاخوانه واخواته

ضيف تقدم وهو ماسك ايدين ام رنوه وام همام :
المزرعه اليوم ماراح يفتحها غيركم عطاهم المقص وهو ماسك ايدينهم قصو الشريط وسط تشجيع من اخوانه وخواته فتح العامل بيبان المزرعه ودخلو وهم فرحانين باهي
اللي شايلل ولده راجي وبسيل وسعود معهم رنا الصغيره ورنوه اللي تزوجت صديق باهي
اما همام خطب بنت خاله اللي كان يحبها

فرشوا فرشتهم وسط الزرع بدوا يوزوعن البنات الحلا والقهوه بينهم وبين الرجال اللي جالسين بجه بعيده عنهم كان الكل مبسوط ومستانسن متواجد الا اثنين طلعو فوق وجالسين يطالعون من الشباك الكبير

هبوب وهي تحضنه وتحط راسها على كتفه: الله يسعدك ويفرحك مثل مافرحتهم شوف كيف الكل مبسوط

ضيف لف عليها : والله ياهبوب ماسويت شي هذولا عيالي واخواني فرحتي من فرحتهم

وبهمس: عمامي بيجون بعد شوي

هبوب بفضول: تدري نفسي اعرف وش رجعك ليلة عرس باهي احس فيه صار ورجعك

تغيرت ملامحه وهو يهمس: خلي عنك اللقافه

بعز سوالفهم جرة ثوب ابوها بزعل: بابا انا بعد رفعت ايدينها بغيره من امها

ضحكت هبوب: يمه منك يالغيوره

شالها ضيف وبحب وهو يطالعها: يحق لها اذ ما غارت وتدلعت توق من يتدلع

هبوب ابعدت عنهم: اوه بدا وش يسكت توق وابوها

قرب منها وهو يقربها لهم ويحط ايده على كتفها: افا بس

هبوب وهي تمسح على بطنها: الله يعوضني باللي هين ولا انت وبنتك غاسله ايديني منكم

ضحك بقوه وهي تدف ايديه وتطلع نازله لتحت

رفع عيونه لتوق اللي تضحك معه وهي مو فاهمه شي دمعت عيونه ومرت عليه لحظات تعبها وايامها المرهقه: عسى ربي لايوريني فيك تعب ياغلاة ابوك وبكره ونور عيونه ياتوق حبها

لف على الشباك الكبير وهو يشوف سيارات عمامه تدخل من البوابة : وامنيتك تحققت يايبه

نزل من الباب الخلفي وهو شايل توق استقبلهم وصلهم المجلس وجده متمسك ب ايده جلسه ونزل توق بحضنه

جده رفع شماغه وبكى : سامحني ياوليدي سامحني يابو توق لو قسيت عليك
مسح دموع جده وهو يبتسم ب الم: ماصار شي طال عمرك كل العوايل تصير بينهم المشاكل ويتصافون مير قدرك اغلى واعز يالغالي وانت تاج راسنا حب راسه

واخوانه وقفوا يقهون وعيال عمهم معهم بدا الليل يدخل وبدوا يشون ويسولفون طلع ضيف وهو يودي توق لامها وبعدها مشى وهو يتمشى ب ارجاء المزرعه الكبيره لحقه سعود: ضيف وين رايح

ضيف وهو يتجهه للاسطبل: اتمشى

عقد حواجبه وهو يدخل جهه مظلمه معه:تتمشى والامه اللي عندك

ضيف: اخواني يكفون ويوفون بعدين ماهم غرب اهل قالها وضحك

سعود : توني تاكدت انكم عايله مو طبيعيه بسيل مطلعه الشيب براسي والحين انت

التفت عليه: بسيل المفروض تصلي كل يوم شكر انها اخذتك

سعود : انشهد والله

ضيف وهو يضرب كتفه: قول انت مشيب فيها ومافي مقلب مو صاحي ماسويته فيها وتبيها تهدا زين ماصار فيها ضغط وانت السبب

ضحك بقوه: لا عاد والله احاول اغير مودها من كثر ماهي جديه وعصبيه تخوفني كلما ادخل البيت احسني داخل غرفة مدير مو بيت

ضيف: تذكر يوم ولادتها شسوت فيك

غطى وجهه بشماغ: لاتذكرني الله يخليك

ضيف : هههههههههه اذكر كلنا حضرنا مع المسشتفى

سعود: يارجال انسى

ضيف دخل وهو يجلس على عتبه بمكان خالي من الضو بس نور القمر يضوي جلستهم

سعود: وش صاير معك

ضيف تنهد: فايز نقلوه لمستشفى النفسي واحجزوه هناك زرته وليتني مازرته ياسعود

سعود عصب: ليش تزوره من طيب فعايله

ضيف: مهما كان يضل مني وفيني بس اللي صدق قهرني للحين يهذرني فيني من دخلت عليه هجم علي والحين كل جسمي جروح عجزت ارده عني بغيته يطلع كل اللي بقلبه جيت المزرعه عذر علشان انشغل عن ام توق ولا تنتبه على اللي صار فيني كل جسمي ضمادات بسبته

سعود تنهد: لمتى وانت معني روحك ياضيف حتى مجاملتك لعمامك حاس فيها خلاص اصحى لنفسك لاتجبر نفسك على شي انت تعبان منه تبي تطيح بكره علينا شوف اهلك مايشوفون غيرك انتبه لنفسك والله يابسيل من اجلس عندها لين انام وما على لسانها الا اسمك ضيف سوا وضيف خذ لك راحه انتبه لتوق خوذ ام توق وسافروا برا استانسو من رجعتوا ماطلعت من البيت بس مع اهلك

ضيف: شلون اسافر واتركهم اخاف تحز بخاطر خواتي

سعود: خواتك اعرسن هذي رنوه مستانسه وبسيل شايلها بعيوني وخواتك الصغار بكره يجيهن نصيبهن وخالاتك مافي احن من قلوبهم عليك وهمام موجود وباهي موجود الكل موجود بس انت روح سافر غير جو

ضيف وهو يرتكي عليه: ان شاءالله
وبهمس : تدري ياسعود انا كلما لفيت ودرت الا تجيني المشاكل حتى لو سافرت ببقى شايل هم اهلي لاني احس اني بمكانة ابوي عندهم وهم متعلقين فيني انا مهما رحت وجيت متعني متعني

سعود وهو يمسح ع كتفه: قصدك غارق بعناك

ضيف: بس العنا دامه من اهلي مثل النسيم البارد على قلبي

سعود : مافي احن واعظم من نعمة الاهل وهالشي حسيته فيك من التقيتك والتقيت اخوانك وصرت جزء منكم ومن العايله

نطق بتسامه وهو يطالع القمر: اثرني ياسعود باقي في عناي ولا لي مخرج منه

سعود: واثرتي ياضيف غارق بحب بسيل

تعدل وهو يرميه بالحصا وقف وهو ينحاش ويضحك : شسوي فيك تعبتني بعناك

بدا يلحقه وهو يضحك :وقف ضاربك ضاربك وانا ابو توق

سعود وهو يركض : من زينك ومن زين توق

ضيف: عاجبتك بنتك النتفه

سعود وهو يوقف يتخصر: اقول عاد الا رنو بكره تجيني خطيب لها بس هين ماراح اوافق لو ايش

ضيف وهو يحذفه بالحصا: مالت عليك وعلى نسلك انا اخرت عمري اخذ من عندك ليه وش ناقص ولدي بعدين خله يجي بسلامه وكل البنات يتحاذفن عليه يكفيه انه ولد ضيف

سعود طالعه: ماخذ بنفسك مقلب

جاهم باهي: وينكم هاه الكل يسال عنكم سبحان الله لاغاب ضيف نلقاه عند سعود ولا غاب سعود نلقاه عند ضيف وكلكم تختفون بنفس الوقت بزارين انتم ماكان الواحد فيكم رجال وش كبر اعماركم بالثلاثين وهذي سوالفكم

ضيف مشى من جنبه: اقول عمي باهي شرايك تسكت ولا نسكتك بطريقتنا

هجم عليه سعود ومن وراه ضيف وبدو يضربونه بمزح تعالت ضحكاتهم بعد ماطاحو كلهم وبعدها وقفو وهم يدخلون لدخل ووجيهم تشع فرحه ونور

دخلو قسم الرجال الا ضيف اللي دخل من الباب الخلفي ودخل على هبوب شافها وهي تعطي توق علاجها لفت وهي تبتسم: وش فيك جاي

ضيف وهو مبتسم: متسانس وماحبيت ادخل عليهم قبل لا اجيتس

هبوب وهي تعدل توق وتغطيها : عساه خير

هز براسه وهو ينسدح بعرض السرير ويحط راسه بحضنها: خايف افرح وانتي تبكين

هبوب : الله لايجيب البكى

ضيف : بلحظه حسيت اني محتاج اشوفتس واتطمن

هبوب : الحين عرفت ليش رجعت

ضيف وهو يغمض عيونه : ليش

هبوب:لانك يوم شفت الاشخاص اللي هم سبب تعاستك وحزنك فرحانين وانت السبب ضاق خاطرك وزياده على كذا جلست تجاملهم وتضحك وتسامحهم وانت اساساً داخلك مقهور وحزين بسبب اللي صار وانك تنازلت كثير عن اشياء بداخلك علشان تجاملهم وبنفس الوقت خايف ياخذوني منك كل شوي تتصل تتطمن حتى عرس باهي رجعت لانك خايف اروح

مارد وهو يحط كتفه على عيونه وملامحه هاديه

: ضيف كل شي انتهى صدقني

ضيف بهمس خافت:انا بنام قلت لهم اني تعبان

هبوب: لا ماتبي تنان جاي لان روحك تعبت من كثر ماتجامل لانك تدري اني الشخص الوحيد اللي حاس فيك

ضيف جلس: نسافر

هبوب بحماس: وين

ضيف : اي مكان تبينه اهم شي ابي ابعد بس انا وانتي وتوق وغرفه تجمعنا بعيده عن الازعاج والهوشات ابي اخذ اجازه من الحياه معك

هبوب: قدام شرايك جزر المالديف_ ماليزيا

ضيف؛المانيا

هبوب: ليه

ضيف: ابي منطقه بارده اللي قلتيهم حلوين بس يبي لهم جو وحر

هبوب: اوكي المانيا حلوه واعرف فيها اماكن حلوه

هز راسه وهو يفتح جواله ويحجز

تطالع له وهو يحجز تنهدت براحه وهي حاسه نفسها فوق فوق الغيم من الفرحه والراحه اللي جالسه تعيشها و لا كأن مرت عليها ايام توجع

وهينا نقدر نقول ان مهما كبرت المشاكل بين الاهل مصيرها بنهاية تنحل والامور تتسهل بدت بمشاكل ضيف وانتهت بوصية من راجي قبل لايتوفى اصلحت كل شي صار وهينا نقدر نعرف عظم حرص الابو على عياله وكيف انه يوم ادركه الموت وصى ولده يرجع لاهله ويتسامح منهم مهما طالت الامور وكثرت العُقد الا ولها نهاية وكل انسان ممكن يتعرض مثل هذي المواقف والشخص الشاطر هو اللي يتجاوزها بسهوله وتتنصر اخلاقه على افعالهم مثل ماصار مع ضيف من شخص عصبي مع خواته الى شخص ارق من النسمه عليهم مسك مسؤوليتهم وخاف عليهم مثل مايخاف على بنته
والحب لازم له تنازلات مهما كانت المشاكل وسبب الفراق الا ان اللي يحب مايكره ابد يسوي المستحيل علشان يرجع كل شي مثل ماكان هذا هو الحب الجميل والحب اللي تستندين عليه طول العمر وانتِ بقمة سعادتك لانك عارفه ان مهما سويتي الا ان هالشخص اللي قدامك حابك بكل مافيك وممكن يترك الكل علشانك ويتراجع عن قراراته علشانك وهذا اللي صار مع هبوب وضيف حبهم انتصر على مشاكلهم لان حبهم لبعض اكبر من كل شي وتوق كانت ثمرة الحب والوصل مابينهم لولا وجودها ماكان صار اللي صار وبنهاية كل شي يصير بحياتنا مكتوب لنا وميسر اتمنى لكم حب مثل حب ضيف لـ هبوب ومثل روح سعود وخاطره السمح وعيونه بسيل ومثل بـاهي اللي صار سند وظهر لرنا واخذها رغم كلام الناس تجاهل الكل وفاز فيها اتمنى لكم حياك حلوه مثل اخوة همام وحبه لـ خواته واتمنى لكم حنية وطمانينة مثل ام رنوه وام همام وأب عظيم مثل راجي جمعهم على قلب واحد وغاب عن الدنيا وهو مطمن ان وراه رجال يشيلون البيت من بعده وزوجات حنونات وطيبات وبنات قلوبهم وسيعه اتمنى لكم سند وذخر اخ مثل ضيف مايرضى الشوكه تأذي خواته واخواته ولو كانو على خطا ينصرهم غصب عن الكل ويفتخر فيهم قدام الكل حبه لهم مسح كل حقد بقلبه على اللي كانو سبب بضيقته خاف تبعده الدنيا ولا يبقى لااخوانه عزوه ،،

قلبه على الكل والكل يخاف على قلبه 💙




بالتاريخ:
1442/3/7/

تمت اجمل روايه على قلبي

بكل حب وحزن الى اللقاء اخر يجمعنا برواية اخرى
اتمنى اقرا ارائكم ب اول بداياتي
شكراً لكل من سعى واجتهدت وكتب واسعدني بكومنت سواءً خاص او عام شكرا من القلب لكل من دعم ولازال يدعم شكرا
الى هنا استودعتكم الله نلتقي ب اذن الله برواية جديده


الربيع القلب ©؛°¨غرامي مشارك¨°؛©

مشكوره عزيزتي
بس تفاجأت انك انهيتيها
ليه تسرعتي
كان فيه كثير احداث تضيف قيمه للروايه
بكل الاحوال
مجهود طيب والى الامام

نرجس الهوى ©؛°¨غرامي فعال ¨°؛©

مبدعه عزيزتي بس في نقص بالفصول والنهاية غير متوقعه وحلوه يعطيك العافية

inlove_y ©؛°¨غرامي مشارك¨°؛©

روعة القصة
يسلمو

SسمورS ©؛°¨غرامي نشيط¨°؛©

ما شاء الله تبارك الله
وش هالبداع والفخامة
والله من تمنيت ان
م انهيت الروايه وان انتي
م انهيتها بسرعه ليتني كنت معك
اول ب اول ما شاء الله
اتمنى اني اوصل ل فخامة روايتك لو بكتب
سلمت اناملك ع الرواية من جد شكراً

SسمورS ©؛°¨غرامي نشيط¨°؛©

واذا بتكتبي روايه ثانيه ياليت ترسلي لي

أدوات الموضوع البحث بهذا الموضوع
البحث بهذا الموضوع:

بحث متقدم
طريقة العرض

موقع غرام موقع سعودي خليجي عربي يحترم كافة الطوائف والأديان ومختلف الجنسيات
جميع الحقوق محفوظة منتديات غرام
iTraidnt by ROMYO
جميع الحقوق محفوظة منتديات غرام
iTraidnt by ROMYO

SEO by vBSEO 3.6.1