غرام
اكتب بريدك ثم اضغط على اشتراك ليصلك جديد غرام
بحث مخصص من محرك البحث العالمي قوقل للبحث في غرام
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 1
قديم(ـة) 09-04-2020, 04:28 PM
صورة اٌلـكوداء. الرمزية
اٌلـكوداء. اٌلـكوداء. غير متصل
©؛°¨غرامي جديد¨°؛©
 
الافتراضي رواية أثرني ياسعود باقي في عناي/ بقلمي


بسم الله الرحمن الرحيم
السلام عليكم ورحمة الله وبركاته .

نبدا بذكر الله :
(سبحانك اللهم وبحمدك اشهد ان لا اله الا انت استغفرك واتوب اليك)

لاتلهيكم الرواية عن ذكر الله وصلاواتكم فكل امر بالدنيا ملحوق الا الصلاة
لا احلل النقل الا بوضع اسمي

حسابي في الانستغرام:
( koda.3l )

.............................

(انا الكوداء ابنة الضاد وكم يسرني انني انتمي وبكل فخر للأداب للعظماء للحروف وبين الجمل والكلمات مكاني فـ مرحبا لمن اراد ان ياتي معي للتعرف على عالمي الصغير)

كم سرني في العمر انني ابنة الضاد انتمي للادباء للعظماء كم سرني ان ابدا حديثي معكم وان اشاركم عالمي الصغير المليئ بالاسرار والخبايا والاحداث والشخصيات كم سرني ان اشاركم اول كتابتي وانتصاراتي وتحدياتي قد قيل لي لماذ تكتبين هل لانك فاضيه ام ليس لديك مايشغلك؟
فكانت اجابتي ان ابدا بكتابة اول رواياتي فعز عملي واشغالي بل لا اجد الوقت لكتابة نقطه ولكن اشكر من استفزتني كتابياً لا انتج بعد ذالك اول انتصارتي
ف اهلاً وسهلاً لمن يريد ان ينضم الى عالم مخيلتي
الى عالمي الخاص الذي اجد نفسي فيه ف اقول له بكل حب وشغف انت كالمكان الذي اتيه بعد تعب لا استريح هكذا ارى الكتابه وهكذا انظر الى كتاباتي وابطالي لمن لايعرف قيمة الكتابه الكتابه عُمر اخر اماني وامنيات ملاذ ومكان روح ونفس انتمي اليها رغم الصعوبات ومتاعب الحياه الا انها حياه بحد ذاتها
....................
مقوله تُردد دائم بعقلي وفكري:
لو يجيد البُكاء الكاتب ماكتب
.

______________
الساعه 12 ونصف ظهراً
سكاكا :

ينظر الى نفس الفندق اغمض عيناه لثواني وبعدها استمع الى نبرة اخيه اليائسه: مامليت تنتظر
كل سنه على هالحال وفوق ذا كله انت الظالم عندهم ياخوك العمر يمشي ماهو موقف لك

مارد وهو يركب سيارته ويأشر له يصمت:
ياهلا ومسهلا امر

نطق بنبره خاليه : ولد عمك هرب وانت المتهم الوحيد قدام عندهم بحكم صلة القرابه بينكم

مسح على وجهه بضيق: كنت متوقع يالله مسافة الطريق وانا عندكم

سحب السياره وحركها مستعجل

باهي : لا والله ماهو بصاحي مخليني كذا بنص الشارع


قبل ثلاث سنين من الان:

يستمع بكل اصغاء لاوامر رئيسه وبهدوء اجاب:
بس اليوم زواجي وانا ماخذ اجازه كيف تبوني اقطع اجازتي بنفس يوم زواجي الاقل لو يعدي اليوم بس وبعده ابشرو

رد بحزم: اليوم تتنفذ العملية واللي مو قادر يلبي اوامر دولته ينهي خدمته افضل

سكر جواله واخذ نفس عميق: يارب تعدي هاليوم على خيير
_________
ف احدى صاولين سكاكا

جالسه تنظر دورها وبالها مشغول تنظر الى هاتفها مره ومره الى البنات: متى يجي دوري اوف العروس بدت وانا للحين انتظر ياربي بس بخلص امي لوحدها

تجلس بجانبها امراه كبيره بالعمر: يابنتي استهدي بالله انتم من اهل المعرس او العروس

ردت ب ادب واحترام: هلا خاله لا والله من اهل العروس

ردت ب ابتسامه: اجل احمدي ربك يمديتس الوقت

منار بحواجب معقوده: انا ماهمني بس امي تركتها لوحدها واخواني كل واحد مشغول بشغله وابوي بالقاعه مع اخوانه لان المعرس يصير ولد عمي

هزت راسها وهي توقف : اجل بكلمهم لتس

فزت : ياعمري والله ما انساها لتس

ابتسمت وهي تصافحها: معتس صاحبة الصالون
ومن ثم ذهبت

نظرت بتعجب وهي مبتسمه: سبحان الله من يسخر عباده

بعد مرور بعض دقائق نادت اسمها


بغرفة العروس وحيث العناية الخاصه بها

تقدم لها الكوفي وبهدوء: اهدي شفيك متوتره

هبوب وملامحه مصفره ماردت وهي تناظر الكوب ب ايدينها وتصاعد البخار منه

اكملت بصوتها الهادي: الجو ماشاءالله حلو وامطار بس بارد عاد سكاكا معروف بالبرد تصدقين اول ماسكنت هينا ماكنت متقبله الجو كان يتعبني بس بعدها عرفت انه نعمه من ربي وفرق عن الرياض والمناطق الثانيه والطبيعه هينا تجنن ياحظكم يا اهل السكاكا براد ومطر

تسمع احاديثها ولا كان بالها مشغول تسمع صوتها ولكن ماتعرف وش تتحدث عنه

ناظرتها بتعب منذ ان دخلت وهي تحاول معها تتكلم معها ولا كان لا استاجابه طالعت ملامحها وذكرت ربها بداخلها ملامحها جداً رقيقه هاديه ليست جميله كجمال ملامحها ولا كان رقة ملامحها ونعومتها وجاذبيتها تجبرها تذكر ربها :

باقي يركبون لك الطرحه تبينها الحين ولا اذ خلصنا الميكب

واخيراً تكلمت : لا ابيها اخر شي وابي شعري يكون مفتوح وويفي من تحت

هزت راسها وهي توقف : اجل بنادي الهير ستايل يبدون فيك علشان اذ خلصوا ابدا فيك
رجعت تسألها: تبين اظافر تركيب ولا

هبوب بهدوء : لا

هزت راسها وهي تناديهم

بعد مرور وقت

دخلت منار بعد ترجي الميكب ارتست: تكفين ب اشوف اختي قبل لا اروح

بنهايه وافقت دخلت والبسمه معتليه وجهها:
ماشاءالله هبوب طالعه تهبليين

لفت على الميكب ارتست: ياختي الله يسعدتس يهبل شغلتس مره

ابتسمت الميكب ارتست: حبيبتي اختك حلوه

عقدت حواجبها منار وهي تشوفها ساكته وبعدها نطقت بعصبيه: هبوب ليش فاكه شعرتس تبين امي تزعل الحين

هبوب رفعت عيونها ببطى اثقل روحها:
ماحد له دخل فيني

منار ناظرتها بعصبيه: ياسلام هبوب لاتهبلين فيني

مسكتها الميكب ارتست وهي تطلعها وبنبره هاديه:
اختك فيها شي ترا من جت وهي ساكته وحزينه
وحاولت فيها اسوي بشعرها تسريحه ورفضت وانتي شايفه شعرها ماشاءالله كثير وطويل مو طول طبيعي بس شسوي حاولت فيها مارضت خليها يمكن مرتاحه كذا ولاتنسين انها عروس اكيد شايله هم

منار ماردت وهي تطلع من الصالون بعصبيه
ركبت سيارة زوجها وهي تنطق بضيق:

ياربي بس تعدي هالعرس على خيير

نطق زوجها : انتي وش فيتس كلنا ندري ان هبوب لضيف وضيف لهبوب واختس قبل كانت متقبلته وتبيه وما احد اقنع جدي فيه غيرها وانتي من اسبوع بس تهاوشين ومعصبه

منار بضيق : اوف عبدالعزيز مانت عارف شي هبوب صار لها اسبوع ماتطلع من غرفتها وفوق ذا بس تبتسي وكلما جبنا طاري العرس زعلت ضيف ماقصر ارسل لها تذاكر السفر وارسل عليها قال اذ مو راضيه تسافر عادي اكنسل وكنسل شهر العسل علشانها وهو ينتظر من زمان اجازته السنويه علشان
يسافرون البنت فجاءه انعفست وما كأن كل العايله يعرفون بحبهم لبعض


نظر اليها ومن ثم مسك كفها: مو صاير الا الخير تلقينها خايفه كلنا نعرف هبوب حساسه

هزت رأسها وهي تدعي بداخلها ان هالكلام صح


وصلت البيت خرجت من السياره وهي مستعجله نظرت الى غرفة والدتها ومن ثم ابتسمت برقه: يزهاتس العنابي ياست الكل

ابتسمت والدتها : تسلمين وين اختس ماخلصت

منار : لا تعرفين عروس وبتطول

والدتها بحزن: وكيف تخلين هبوب لحالها

منار جلست بجانبها : يمه هبوب لازم تتعود تخلص امورها بنفسها دلعتس لها خربها شوفيها عجزانه تتقبل زواجها وانها بتطلع من هالبيت لازم تعتمد على روحها شوي

اشاحت بوجهها ناحية القبله وهي تدعي بكل حب لا بنتها الصُغرى

منار بمزح: الكل خايف على نفسيتها ما كنكم زفتوني انا بعمرها ولا اصغر بعد

ابتسمت امها بمحبه: انتي فكرتس كبير وتتحملين المسؤليه واول بنت بس هي الصغيره ومدلعه من كل احد

منار : اييه الله لنا بس

ضمت كتفها بمحبه: والله يفرحني بضناتس يتمم علينا فرحتنا والله ان ضيف اجودي ربى تحت عيني

منار: امين يالغاليه

يالله انا بقوم اجهز شنطة هبوب وخالاتي بعد بيجون الحين وبناتهم وبعدها بنروح القصر وهبوب تجينا هناك

هزت راسها: اجل بقوم اجهز لبس اخوانك على ماتخلصين
منار وقفت وبعدها لفت على امها: فايز ماشفتيه

امها ضاق خاطرها: لا صار له كم يوم غايب مدري وين يروح وان جاء جاء فاقد عقله

رددت منار بضيق: يارب تستر عليه ومايفضحنا عند الناس الليله

امها : اميين يارب

_______________

بليل بالقصر :

اصوات الناس البخور لعب الاطفال صوت الاغاني

من بين هالازعاج والفرح كانت واقفه بفستانها وبراحة كفها الخاتم والمصوره قدامها تصورها
كان احساسها متوتره لابعد حد واصوات الازعاج

دخلو بنات خالاتها وخالاتها وعماتها وكل من يدخل يذكر ربه ويدعي لهم وصديقاتها اللي كانو على جنب يغنون لها ابتسمت بعز التوتر والتقطت لها الصوره المصوره بفرحه عظيمه: واخيراً ابتسمتي
ياشيخه يازين بسمتك

ضحكت هبوب : ياربي متوتره بعد

بعز فرحتهم اصدرت اصوات اطلاق النار

نطقت بربكه: شصاير

منار من غير مبالاه: عادي تلقين الرجال يطلقون ماتعرفينهم

هبوب بهمس لها: بس ضيف دايم كان يمنع الطلق وقايل ماحد يطلق بعرسي

منار وهي تهديها: عادي يابنت الحلال وبهمس شوفي البنات كيف فرحانين لتس تحمست متى تجي الزفه

بالطرف الثاني وتحديداً عند لفة الطريق :
واقف ومحاوطينه رجال الامن وقف مكانك ولا تتحرك خطوه وتخرب عرس الناس

فايز ونظراته تنتقل بشر لهم: انتم ابعدو لا ادمركم كلكم
بالقصر :
واقف عمه متوتر ويهمس لا اخوه: ولدك وينه طول
ماصارت الناس تسأل الساعه 8 ونص وماجاء

راجي بكذب :ماعليك قبل شوي يقول جاي

بدات اجوء العرس تتوتر بعد متأخر المعرس


وقف بسيارته وهو ينزل بلبسه العسكري والواقي عليه: متأكدين هذي الاستراحه

نطق احدى العساكر: نعم سيدي ومسكنا واحد منهم على الطريق وهو فاقد

اشمئزت ملامحه بقرف : اجل انتم ادخلو وانا بتوجه له

العسكري: تمام سيدي وب اعتذار : بنحاول نعجل ونمسكهم واسفين اذ عطلناك عن زواجك

ضيف بحزم: امور الدوله مافيها اعتذار نفديها بـ أرواحنا

ركب الدوريه متجه نحو زملائه وصل الموقع وهو يشوفهم محاوطين شخص
تقدم بهيبته العسكريه التفت للعسكري بجانبه:
ليش ماتمسكونه الاشكال هذي ماينفع معها اقناع

نطق بيأس: انت عارف الرئيس رافض احد منهم يتأذى يبيهم حيين بسبب المعلومات اللي عندهم واللي وصلنا انهم مو بس مروجين مخدرات وشراب الموضوع اكبر من كذا فيه خونه للوطن واذيال وهذا اولهم واهمهم وهو المحرك الاساسي لهم

ضيف زفر : لاحول ولاقوة الا بالله

بتقدم انا من وراء ونبه زملائك

اشار له بنعم وتكلم بالجهاز: انتباه الملازم ضيف بيتقدم للمتهم من الخلف اشغلوه وخلو تركيزه للامام

استودع الله نفسه ودخل من الخلف والشارع المظلم التفت لقدام وهو يشوف انوار القصر اتسم بخيبه وهو يطالع الشخص اللي قدامه وكان يتجادل مع الشرطه وهو بوضع مو صاحي انقض عليه من الخلف وكلبشه تحت تهديده وضربات منه

دفه بقرف: خذوه المركز

وبعدها وقف بتعب وهو يناظر ملامحه المشمئزه :
حسبي الله عليك خساره فيك اسمنا ضربه من فخده ب اقوا من عاده
واتجه للدوريه:
انا طالع للقصر بعد الزواج نتفاهم بالقسم

وصل القصر ب اسرع اخذ ثوبه ودخل من الباب الخلفي للقصر دخل احدى الغرف الخاصه بالمعرس لبس ثوبه الاسود وبشته الابيض (بحكم برودة الجو ) طالع نفسه بمرايه وخده فيه جرح بسبب ضربات فايز وهو يقاومه غسل وجهه وهو يطالع ارهاق ملامحه حتى حلاق ماراح له

طلع وهو يدخل القصر :

استقبلوه بترحيب حار وعرضه

طالع ساعته وهو يسمع همس باهي له: حتى بعرسة ماعندك وقت لنفسك

اشاح بوجهه وهو يجلس بعد ماسلمو عليه وصورو معه

تقدم عمه بملامح زعلانه: وقت الزفه

وقف وهو يمشي بهيبته وملامحه الجامده وعلى يمينه جده وعلى يساره ابوه وراه عمامه

دخلو غرفة العروس وارتفعت اصوات الحريم بترحيب له سلمو عليه عماته وخواته وحريم ابوه

تقدم وهو يمسك ايدينها ويبوس جبينها وبهمس : مبروك

ردت بنفس همسه: يبارك فيك

مسك كفها وبدت المصوره تاخذ لهم صور مع عمامهم وعماتهم يسمع همس عمامه يوصونه عليها وابوها لازال صامت

فضت الغرفه الا منهم ومن احساسه البارد تجاهها

نطقت المصوره: با اخذ لكم صور خاصه

اردف بحزم: مانبي صور ولف عليها: تغطي بنطلع

ماعارضته وهي تنادي لمنار تساعدها

منار دخلت وهي تطالع له جالس على الكرسي وانظاره على ساعته وجواله : ليش تكسر بخاطر هبوب كل اثنين لازم يصورون هذي ليلة عمر

نطقت المصوره بيأس: من اليوم اقنع فيه مو راضي يقتنع

ضيف وقف وهو يلتفت لهبوب: نمشي

هزت براسها وشفاتها ترجف بقهر وخوف
مسك كفها وهو يمشي وقبل لايطلع
التفت على منار وبنبره متعاليه: امثالي مايصورون صور سخيفه وتافه ونهايتها تنرمي وتحترق انا لابغيت لنا ذكرى بهاليوم فهي بترسخ براس وقلب هبوب ويكون لها قدر مو نفس الباقي صور ومياعه

اعطاها ظهره وطلع

تممتت من خلفه بكلام ماسمعه غير المصوره اللي ماتت ضحك: ههههههههههههههه شكل معرسكم ثقيل

منار بقهر: مالت عليه طول عمره يشوف نفسه فوق الكل من زينه

المصوره: بحق تراه ازينكم صدق ملامحه عاديه بس لون عيونه ورزته تكفي تحسينه يخوف حتى لو مانتي مسويه شي

منار وهي تجمع اغراض هبوب: ايه امه لبنانيه بس هو ورث عيونها اما اخوه الثاني عكسه بس هو دخل العسكريه من يومه صغير علشان كذا انقلب لونه ولا قبل كان يلق لق

المصوره بمحبه: الله يتمم لهم على خير لايقين على بعض

منار : امين يارب

_____

بالفندق

وصلو لحالهم نزل وساعدها بنزول لازال شاد على كفها دخلو الجناح وهمس لها: ممكن اكون تصرفت غلط بس صدقيني انه اسعد يوم بحياتي

هبوب بملامح هاديه رفعت نظرها له:
توقعتك تكون ارق من كذا بس مافي فايده
ابعدت كفها عن يده ورفعتها : علمت عليها

مارد وهو ينزل بشته: مانتبهت

بدلي وتعالي نصلي

هزت راسها بخيبه وهي تدخل لداخل الغرفه وتسكرها غيرت لبسها على السريع ولبست بجامه ناعمه طالعت ملامحها خففت مكياجها وضبطت شعرها ورفعته ومن ثم طلعت له

وقف وهو يجيب السجاده

وبدا يصلي وهي وراه خلصو وبعدها وقف وهو يمسك ايدينها ويجلسها بجنبه طلع دبله من جيبه وهو يهمس : عاداتنا ماتسمح لي البستس خاتمس بيوم ملكتنا علشان كذا صممت لنا دبله ثانيه البسها لتس بيوم زواجنا مسك يدينها وهو يطلع الخاتم الاول ويدخل الثاني وبعدها عطاها خاتمه وهو يمد لها ايديه لبسته وايدينها ترجف
باس راسها وهو يردف : عز الله صبرت ونلت ياضيف
وعدى يومهم بمحبه وسلام
________
الصباح صحاه ضرب الباب بقو استعدل بجلسته وهو بعادته ماينام كثير وخاصه انه راح المركز ورجع وهبوب للحين نايمه

اتجه لغرفة نومهم وهو يسكرها وطلع للصاله فتح الباب وملامحه هاديه وبدلته عليه: يالله صباح خير

دفو الباب عمامه واولهم اخوانها وابوها وجده
: وش فيكم

كزه بعصاته جده: انت ماسك ولد عمك يالخسيس

ضيف نزل عصاه عن كتفه : ولد عمي راع خراب ويستاهل ماجاه

نطق عمه بقهر: علشان كذا جاينا متأخر امس والحين طالع للشغلك وناسي انك معرس

ضيف تكتف وهو يسكر الباب ويشوفوهم جلسو على الكنب وملامحهم قاسيه: شغلي انتم عارفينه
وولدك غلط ولازم يتحاسب واذ ماكان عندكم علم ولدك ارهابي جاسوس فكره ملوث ومن زمان كنت ناقد عليه وكلما انبهكم ماحد يسمعني لين ماربي سخرني ومسكته

جده: يطلع ياضيف ولا

ضيف بعصبيه: مايطلع تفهمون انتم ولدكم ارهابي

وقف عمه :طلع ولدي ولا مالك مره



انتظر توقعاتكم وردودكم سيتم تنزيل بعض الاجزاء ب الانستغرام وهـنا


تعديل اٌلـكوداء.; بتاريخ 09-04-2020 الساعة 07:32 PM.
الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 2
قديم(ـة) 09-04-2020, 07:20 PM
صورة مُـخْـمَــلِـيّــــةُ اَلْـرّجَــاء الرمزية
©؛°¨غرامي متألق ¨°؛©
 
الافتراضي رد: رواية : (أثرني باقي ياسعود في عناي) بقلمي


السّلام عليكم ورحمة الله وبركاته

أسلوب يجنّن ما شاء الله
والقصّة شكلها روعة
أموت بروايات الأكشن

الواضح أنّه بتسوء العلاقة بين ضيف وعائلته بسبب فايز ولد عمّه
إنشاء الله ما يتقاتلو بغرفة الفندق
حرام عليهم العريس وما تركوه براحته مع عروسته
من المفروض يأجلو ذا الموضوع لبعدين بما أنهم يعرفون بلاوي ابنهم
الله يكون مع ضيف وهبوب
بصراحة أسماءهم تجنّن ما شاء الله

بس متى موعد تنزيل الفصول؟
بالتّوفيق يا ابنة الضاد || مقدّمتك وتعريفك بنفسك مرّه فخم ما شاء الله ، استمتعت وأنا أقرء حروفك ||

في أمان الله


الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 3
قديم(ـة) 10-04-2020, 04:20 AM
صورة ريحانة الجنوب الرمزية
ريحانة الجنوب ريحانة الجنوب غير متصل
©؛°¨غرامي متألق ¨°؛©
 
الافتراضي رد: رواية أثرني ياسعود باقي في عناي/ بقلمي


مره حلوه كمليها

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 4
قديم(ـة) 10-04-2020, 09:32 AM
فيتامين سي فيتامين سي غير متصل
©؛°¨غرامي متألق ¨°؛©
 
الافتراضي رد: رواية أثرني ياسعود باقي في عناي/ بقلمي


السلام عليكم

بدايه راااائعه اتمنى تكمليها

ضيف معه حق وهذا عمله اللي أدى قسمه

وهو ماقصر نبهم وقال لهم على سلوك ولدهم وهم تركوه

مالهم حق يلومون ضيف والا ياخذون زوجته منه بسبب فايز

منتظرين باقي الأحداث


الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 5
قديم(ـة) 11-04-2020, 05:38 PM
صورة اٌلـكوداء. الرمزية
اٌلـكوداء. اٌلـكوداء. غير متصل
©؛°¨غرامي جديد¨°؛©
 
الافتراضي رد: رواية : (أثرني باقي ياسعود في عناي) بقلمي


اقتباس:
المشاركة الأساسية كتبها مُـخْـمَــلِـيّــــةُ اَلْـرّجَــاء مشاهدة المشاركة
السّلام عليكم ورحمة الله وبركاته

أسلوب يجنّن ما شاء الله
والقصّة شكلها روعة
أموت بروايات الأكشن

الواضح أنّه بتسوء العلاقة بين ضيف وعائلته بسبب فايز ولد عمّه
إنشاء الله ما يتقاتلو بغرفة الفندق
حرام عليهم العريس وما تركوه براحته مع عروسته
من المفروض يأجلو ذا الموضوع لبعدين بما أنهم يعرفون بلاوي ابنهم
الله يكون مع ضيف وهبوب
بصراحة أسماءهم تجنّن ما شاء الله

بس متى موعد تنزيل الفصول؟
بالتّوفيق يا ابنة الضاد || مقدّمتك وتعريفك بنفسك مرّه فخم ما شاء الله ، استمتعت وأنا أقرء حروفك ||

في أمان الله
اهلاً عزيزتي مخملية لقد اضفتي الشي الكثير بكلامك الجميل وتواجدك

موعد الاجزاء ان شاءالله يوم فيه جزء ويوم لا

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 6
قديم(ـة) 11-04-2020, 05:39 PM
صورة اٌلـكوداء. الرمزية
اٌلـكوداء. اٌلـكوداء. غير متصل
©؛°¨غرامي جديد¨°؛©
 
الافتراضي رد: رواية أثرني ياسعود باقي في عناي/ بقلمي


اقتباس:
المشاركة الأساسية كتبها فيتامين سي مشاهدة المشاركة
السلام عليكم

بدايه راااائعه اتمنى تكمليها

ضيف معه حق وهذا عمله اللي أدى قسمه

وهو ماقصر نبهم وقال لهم على سلوك ولدهم وهم تركوه

مالهم حق يلومون ضيف والا ياخذون زوجته منه بسبب فايز

منتظرين باقي الأحداث
اهلاً عزيزتي فيتامين سي

شكراً ثم شكراً لتواجدك بروايتي

وان شاءالله اكملها

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 7
قديم(ـة) 11-04-2020, 05:43 PM
صورة اٌلـكوداء. الرمزية
اٌلـكوداء. اٌلـكوداء. غير متصل
©؛°¨غرامي جديد¨°؛©
 
الافتراضي رد: رواية أثرني ياسعود باقي في عناي/ بقلمي


البارت الثاني:

| ضاع عمر .. وراح حلم .. ومات غالي
‏شاللي باقي في حياتي ما خسرته
؟|

مركز سكاكا واقف بصمت يستمع لحديث رئيسه سابقاً:

كيف انحاش وحنا حاطين فوق عشرين عسكري عليه من كل الجهات والسجن ب ابعد منطقه كيف قدر

مركز عيونه بفراغ صامت وبعدها نطق:

دامك مو قادر تدير سجنك ليش تتهمني
اني ممكن اكون هربته
ضرب ايده بقوه على الطاوله: قلت انقل وقدمت نقل لرياض انتقلت ونقلت اهلي معي والحين جايبني وبكل ظلم تتهمني ممكن اهرب شخص مثل ذا بحجة انه ولد عمي لاترمي اهمالك علي
لو بدافع عنه كان مامسكته فاهم مامسكته

رئيسه بنفس الغضب: وش جايبك سكاكا دامك مو مهربه وبنفس اليوم بعد

نطق بغيض: لاتنسى اني صرت اعلى منك رتبه

اعطاه ظهره وقبل لايطلع نطق بصوت مقهور:
بقدم فيك بلاغ

نطق ب استفزاز: اعلى مابخيلك اركبه

طلع من مركزه القديم وصدره ضايق نطقها بكل وجع: عسى ربي ياخذ حقي منك يافايز

ارسل لباهي يتجهز ويطلعون الرياض
________

المانيا وتحديداً ميونخ :

جالسه تناظر الماره من شرفتها وقدامها اخر بقايا حبه البوم صورهم وخاتمه اللي رماه عليها قبل لا تروح مع ابوها تنهدت بيأس وشعور الخذلان والخيبه مسيطر عليها

نطق اخوها اللي كان جاي : كل شي سويناه لتس وبالاخير اجي القاتس سرحانه بفكرتس معه

نطقت ببحه: لاتلومني خذلته احس للحين نظراته مافارقت بالي

جلس قبالها: انا وقتها ماتكلمت بس كل اللي صار ظلم بحقه رفع عيونه لها وبحقتس حتى انتي انظلمتي مو بس هو

بلعت غصتها وبحزن: بس ليش يطلقني ليش يعطي الفرصه لابوي انه يزوجني غيره

ابتسم اخوها : لهدرجه ماتبين غيره

نطقت بخيبه: الاقل اوفي له وما أخذ غيره

مسحت على بطنها بوجع وبعدها وقفت :
انا طالعه انام

اخوها: ومحاضراتك هبوب لاتتكاسلين مابقى لك الا سنه ونرجع لاهلنا

هبوب بوجع: اهلك مو بـ اهلي

وقف : اللي خلاتس توقفين معنا هو نفسه اللي بيخليتس ترجعين لهم

هبوب طنشت وهي تدخل جناحها نزلت الروب القطني ونزلت الالبوم وخاتمه على الطاوله مسحت على وجهها بضيق امتلئ بصدرها ونبرة ضيف عالقه براسها:
اعتقيني منهم وعدي الصحيح انتي
الوحيده اللي شفتي حالة اخوتس

مسحت دموعي بضيق وانا مو عارفه كيف ارجع لاهلي بعد اللي صار وكلما قربت مدة رجعتي كلما كرهت نفسي اكثر واكثر

____
الريـاض :
الساعة8 بليل
في بيت متوسط يضم عائلة الراجي :

لابس نظراته وماسك الكتاب يقراء رد ببرود:

لا ضيف مايرضى

ناظرته بقهر: يبه وش دخلني بضيف انا حلوه هذي
انا بروح يعني بروح حتى وهو مسافر يتحكم فينا

نزل نظارته: بسيل اعقلي واصعدي لغرفتس

بسيييل بعتب: بروح دامك راضي وهو مالي دخل مو كافي خرب علاقتنا مع عمامي وبنات خالتي

اخذ نفس وهو يردد: اخر مره يابسيل مو تطولين وخوذي معتس خواتس

بسييل اتسعت ابتسامتها: ابشر بس بطلب مرسول عيالك كل واحد مكان ماصدقو ضيف يسافر

هز راسه : اهم شي ترجعون بدري

وقفت بفرحه وهي تركض لفوق تنادي خواتها

طلعت ام همام: يابو ضيف هذول بنات لاترخي لهم الحبل وتشجعهم على انهم يرفضون لاخوهم طلب

ابو ضيف رفع ايده بمعنى تسكت: بناتي وكيفي
وبتسأول: ام رنوه وينها

ام همام بضيق: بغرفتها تعبانه

وقف وهو ينطق: اجل بروح اشوفها

ناظرته وهو طالع عفست ملامحها بضيق وهي مودها بنتها تروح مع بنات جارتها بسبب تمرد بسيل وطولة لسانها واسلوبها اللي ينرفز وبنتها باديه تتأثر فيها

نزلو ورا بعض ومعهم نورسين

وقفتهم وهي عاقده حواجبها وبعتب: رايحين عرس انتم ارجعو غيروا عبايتكم وعدلو نقابتكم وش هالمسكرا والكحل

زفرت بسيل: انتي وش دخلك كلامك يمشي على بنتك بس مو علينا فاهمه

ضحكت بسخريه: ما اشره عليتس لو فيتس خير احترمتيني طالعت بنتها بعتب: اطلعي فوق مافي روحه

نورسين بزعل:اصلا مابي اروح

طلعت الدرج بزعل
ناظرتهم ام همام: لو فيكم وحده تخاف ربها ماطلعت بهالشكل بس ماكملت كلامها الا وضيف داخل وعصبيته واصله الف :

مين التسلبه اللي داقه على مرسول

بسيل تأففت: انا وش عندك بعد

ضيف : وتقولينها قدامي تسذا

بسيل بسخريه: يعني كيف تبيني اقولها لك

ضيف خذا الفازه اللي مقابله المدخل وضربها بالوسط بينها وبينه: طسي عن وجهي لا اخليتس مثل هالقزاز المتناثر فاهمه

بسيل غمضت عيونها تهدي نفسها وبمرادد:
لا والله فوق مانت حارمنا من كل شي تبيني اطس بالوقت اللي تبيه واجلس بالوقت اللي تبيه هذا الناقص بعد رفعت ايدينها وهي تنطق ب استفزاز:
يالله ترزق هبوب اللي ابرك منك

ناظرها بتعجب وعيونه قلبت حمراء :

انقلعي عن وجهي ولا اقسم بالله لا ادفنتس انقلعي

نزل ابوهم وامها اللي نطقت: وش مسويه بعد

بسيل رجعت لورا وهي تشوف وجهه مايبشر بالخير: ماسويت شي ابوي قالي روحي واستأذنت منه بس المعقد وصل وانتم عارفين الباقي

راجي وعيونه على ضيف اللي واضح معصب من عيونه ومسكته لا ايدينه لايضربها:
كم مره اقولك بناتي لاتتدخل فيهم

ضيف رفع ايدينه ومسح على وجهه :
وانا اخوهم الكبير وبحسبة ابوهم ماتشوف العبايات كيف صايره والكحل والعطر كلن يشمه وفوق هذ طالبه مرسول ليه وين عيالك

نطقت ام رنوه: ماعليه ياضيف امسحها بوجهي وهذي اخر مره طالعت ببسيل لان بناتها طلعو فوق من دخل معصب : وانتي كم مره اقولتس اخوتس الكبير ماتقلين ادبتس معه كم مره ماتفهمين

راجي مسك ايدينها: امشي ماعليتس منه

طارت عيون ضيف: يبه

راجي وبتصرف غاضب رمى عليه العقال :
مالك دخل بهالبيت ماتفهم انت كم مره اقولك لاتتدخل فيهم مو كافي اخواني اللي سكروا بيبانهم بوجهي مو مكفيك طلعتني من سكاكا وجبتيني للرياض متى تفكنا من شرك ياضيف متى

ضيف طالعه وابتسم بقهر اخذ العقال ورجعه على راس ابوه وباسه: اسف ان لحقك مني اذى
وانا طالع الحين وخل البيت لا اهله

عطاهم ظهره وطلع

تنفس بغيض وجلس على عتبات الدرج هذا مو ضيف مو ضيف اللي يكون بالانهزاميه رفع عيونه بعصبيه: انتي واقفه انقلعي لغرفتس

طالع حريمه اللي توجهو للمطبخ :

سكرت الباب ام همام وهي تجلس على الكرسي: انا مدري متى المسكين يرتاح كلمن جاء حط همه عليه
ام رنوه جلست مقابلها: بسيل تعبت منها مو راضيه تتقبله

مدت ايدينها وهي تمسح عليها: ماعليه بكره تكبر وتعقل

ام رنوه دمعة عيونها: عمرها 24 وللحين مناشبه له وتشيش ابوها عليه

بكت بوجع لانها الوحيده اللي عاشت معناة ضيف وباهي بس باهي كان دايم بحضن ضيف كان الامان بالنسبه له توفت امهم وهم صغار ربتهم وبالاصح رباها ضيف لانه كان عمره 6 سنين وقتها وكبير
علمها اشياء كثير وياما غطا عليها عند ابوه وياما وقف معها حتى بزواج ابوه الثاني زعل عليه بس بسيل من بدت تفهم وهي تغار منه ومن قربه لاابوه لين ماقدرت تغير تفكير ابوها من ناحيته

ضمتها ام همام وهي تربت على كتفها: استهدي بالله ضيف انتي ربتيه ماراح ينساك بيرجع لتس صدقيني وماعمرتس هنتي عليه

دخل باهي المطبخ وملامحه مصفره: وين ضيف

ناظرهم ب استغراب: صاير شي شفيكم تبتسون

ابعدت ام رنوه وهي ترد عليه: ضيف طلع من البيت

عض شفته بضيق: وش صار بعد

ام همام : تهاوش هو وابوه

باهي بقهر: لايكون علشان التوصيل ترا اللي جايكم كان واحد من اعداء ضيف وجلس يستفزه علشان تسذا ضيف عصب لان له سوابق

ام رنوه هزت راسها : كنت عارفه ضيف مايعصب لاي شي

باهي ب استعجال: بروح ادوره

والتفت لا ام همام: خاله قولي لهمام يتجهز بنطلع الثمامه الفجر

ام همام : ابشر

طلع وهو مستعجل شاف ابوه جالس على الكرسي:
داخل على كفار ورا ماتسلم
باهي بهدوء: سلام

حب راس ابوه جاء بيطلع ومسك ايده: شوف وين ضيف وطمني عليه بس لاتقول اني سألت عنه

ابتسم : طيب دامك تغليه ليش توقف مع بسيل ضده

ابوه بهمس: علشان بسيل بنت وقلبها ضعيف مابي اكسرها قدام احد حتى اخوانها وادري انها على خطاء بس الخطاء اني ابين لها ان ضيف اقوى منها ومعه حق ضيف رجال وقلبه قوي قايد سريه ولا يهاب شي بس بسيل ماشافت من الدنيا شي ولا ابي له كلمه عليها وابيه يتعود يكون حنون مع اخواته

نطق باهي بضيق: مافي احن من قلب ضيف طول عمره شايل همنا يوم كنت مدرستك برا سكاكا كان يسهر على راحتنا وكان لنا كل شي وبنهايه هو ماعمره حتى مد يده عليها وهي لسانها وش طوله
حتى سالفة هبوب للحين تعايره فيه ومع ذالك ماسك نفسه عنها وصدقني لو بمكانها بوريها شغلها بس قلبه طيب ولا ماكانت رنوه بهالحال وانت ادرى

طلع متجاهل كلام ابوه وندائته دايم ينقهر لاوقفو كلهم ضد اخوه ليش ماهم قادرين يشوفون طيبة قلبه ليش ماهم يشوفون الجانب الزين منه الكل يخطي مو بس ضيف وهذا ضيف مااخطاء بس انه حقق العداله صار ظالم وصار قاطع والكل يلومه انه ترك بنت عمه بصباحيتها ليش ماقالو هي تركته ياما سمع وطنش وياما ذاق الويل ولا اشتكى

مسح وجهه بضيق وهو يتصل عليه للمره العاشره وجواله مغلق : اوف وين احصلك الحين

ركب سيارته وبدا يتصل على اصدقاء ضيف واحد واحد يسألهم عنه

اما ضيف دق على خالته وبهدوء: خاله ممكن تطلعين لي بدلتي داخل مجلس الرجال ومسدسي فوق الكبت تحت الشنطة انا عند الباب الخلفي

سكرت ام رنوه وهي تتجه للمجلس اخذت بدلته وطلعت مسدسه طالعت رنوه جايه وراها:
رنوه يمه جيبي جزمات اخوتس (اكرمكم الله)

رنوه : ابشري اخذتهم ومشت ورا امها

دخل ضيف ابتسم وهو يحب راسها: ما انسى جميلتس يالغاليه

ابتسمت وعيونها مدمعه: ماعليه يامي سامحني ماعرفت اربي بسيل

ضمها وهو يهديها وبمزح: افا هذاتس ربيتينا احسن تربية شوفي الكل يمدحنا مسك اصابعها ترا مالتس بس بنات لتس ضيف وباهي عيالتس وبسيل بزر للحين ماطلع قلبها وبكون سفيه لو زعلت عليها او شلت بقلبي

ابتسمت رنوه ومسحت دموعها: الله لايحرمنا منك
ابعد وهو مبتسم رغم الوجع اللي بصدره : امين

يالله انا عندي استلام لين باتسر

نطقت ام رنوه : تتغدا عندنا

ضيف اخذ نفس بهدوء:لا يمكن ولاتنتظريني يمكن اجر شقه اجلس فيها
ام رنوه بجزع: تعوذ من ابليس ومن يبقى عندنا لارحت ماحد يعرف لابوك غيرك تبي من همام ولا سلطان ينتبهون له وباهي دايم معك اذ طلعت ماراح يجلس بالبيت

ضيف وهو يبلس جزمته: يحلها الف حلال وقتها يالله استودعتكم الله وانتبهو على البنات وابوي
واذ صار شي ارسلو لي

اقفى وهو شايل لبسه ركب السياره وهو يبدل ثبت سلاحه على خصره شغل السياره نزل جواله وهو يتجه للمركز

____________

سكاكا :
مجتمعين حولها يهدونها ووجيهم مسوده
صرخت بنحيب موجع :
اخذ بنتي اخذها يويلكم من الله يويلكم وش سويت يايبه وش سويت

التقي بكم يوم الاثنين



الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 8
قديم(ـة) 11-04-2020, 07:04 PM
صورة بنت آل تميم الرمزية
بنت آل تميم بنت آل تميم متصل الآن
©؛°¨غرامي مشارك¨°؛©
 
الافتراضي رد: رواية أثرني ياسعود باقي في عناي/ بقلمي


حيااا الله الكوداء وًحي الله ابطالها 😍😍

يااااا قلبي ع ضيف 😢 حرام الي يصير فيه
هبوب م اقدر احكم عليتس قبل لا اعرف شو صار بضبط ولكن احس غلطانه و مظلومه بنفس الوقت💔🥺


لا طولي علينا

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 9
قديم(ـة) 14-04-2020, 04:21 AM
امال 81 امال 81 غير متصل
©؛°¨غرامي جديد¨°؛©
 
الافتراضي رد: رواية أثرني ياسعود باقي في عناي/ بقلمي


صباح الخير
مؤكدًا المفروض يكون نازل بارت امس

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 10
قديم(ـة) 14-04-2020, 12:53 PM
صورة اٌلـكوداء. الرمزية
اٌلـكوداء. اٌلـكوداء. غير متصل
©؛°¨غرامي جديد¨°؛©
 
الافتراضي رد: رواية أثرني ياسعود باقي في عناي/ بقلمي


البارت الثالث
بـ ارجاء المركز واقف تثاقل على نفسه وهو ينطق بنبره عاليه ومهيبه: الدوره بتبدا بداية الشهر الجاي
ارسلو خبر للمتقدمين بتكون لمدة اربع الشهور اشار على زملائه بكون انا الرئيس وزملائنا مقرن وسطام مشرفين جهزوا مكان الدوره واحرصوا على تنظيف المكان واستعدو

نطقوا بصوت واحد: حاضر سيدي

رفع ايده وضرب لهم التحية وبعده اشار لهم يخرجون من الساحه الكبير

طلع مقرن وبقى سطام وجهه انظاره لـ ضيف :
صاير فيك شي وقفتك مهزوزه

ضيـف اشار بصمت لا
سطام سحب الكرسي : اجلس
ضيف نفذ كلامه
سطام وبنبره عصبيه: لاترهق نفسك ليش تقدم على هالدوره وانت خلاص نقلت للاستخبارات

ضيف بنبره حاده: مكاني مو استخبارات انا تدربت وتعودت على القوات الخاصة وغيرت قسمي بسبب رئيسي بس ولا الاستخبارات ماودي فيها وشغله تحتاج احط اهلي ورا ظهري بسس

قاطعه وهو ينطق بحده: تحط الدنيا كلها ورا ظهرك دامك واقف على هالارض فاهم الدوره بتتعبك زياده وغير الاعداد الكثيره اللي بتجلس تدربهم

ضيف زفر بضيق: سطام وش تبي
سطام : تدري اليوم وصلنا بلاغ
ضيف : وشو بلاغه
سطام سكت بعد ماشاف النقيب جاء وقف بسرعه وهو يضرب له التحيه
ضيف تكاسل يقوم طقها وهو جالس بس ماحس نفسه الا منقلب مع الكرسي

اردف بحده : لاجاك اصغر عسكري توقف له وتطق له التحية

ضيف وعيونه بدت تضيق وحمرت : ابشر طال عمرك

طالع لسطام وبعدها اردف: سطام رح اشرف على الاتصالات مع مقرن

سطام: ابشر
لف على ضيف اللي مازال مو ثابت على وقفته عقد حواجبه: اعتدل بوقفت

ضيف : اصابتي الاخيره سبب لي وجع برجلي علشان كذ مو قادر اوقف ساعه كامله

النقيب: تعال مكتبي وخل اعذارك لبعدين

بالمكتب
فتح البلاغ وبدا يقراه تحت مسامع ضيف اللي كلما له ويزيد بضغطه عاى كفوفه

النقيب: بينك وبين رئيسك شي؟

ضيف جلس وبدا يسرد له القضيه كامله

النقيب بتحذير: لاجاني امر اسلمك للنيابة راح اسلمك لهم جهز حالك وخلك مستعد

ضيف وقف وملامحه بدت تشتد: يصير خير

النقيب: والحين تفضل اعفيك من استلام اليوم

ضيف : طيب

ركب سيارته واتصل على باهي: باهي
باهي : انت وينك ساعه وانا ادورك عوذا ياخي لاتزعل مره ثانيه

قاطعه بصوت مخنوق: شقتك اللي بالعليا فاضية

باهي : ضيف وش فيه صوتك صاير لك شي
ضيف : انا سألت جاوبني بسرعه

باهي : اذكر انها فاضيه ماحد استأجرها مني هالشهر

ضيف : المفاتيح اللي بسيارتي للشقه
باهي: ايه

سكر الجوال وحذفه على المرتبه اللي بجنبه وحرك للبر

_________

سكاكا

جالس عند راسها بعد ماهدت: منور اهدي

منار ب الم: راحت بنتي راحت وانت تبيني اهدا خذها قدام عيني وانا موصيه ابوي ما يطلع له بنتي

زوجها بضيق: انا بلغت كل مراكز امن الطرق والشرطه

منار ببكى: هو انحاش من سجن سكاكا مو بعيده عليه يهربها بدم بارد هذا مايوقفه شي انت شفت شكله لمن جاء كيف يخوف لحيته واصله صدره
انا مدري ليش ابوي للحين واثق فيه حتى بعد ماسرق البنت يقول يمكن يلاعبها ويرجعها

عبدالعزيز : بدق على ضيف ابلغه

منار فزت بخوف: لا لا الا ضيف الله يخليك الا ضيف لايدري لايدري

ضمها وهو متضايق: ليش مايدري لازم

قاطعته وهي تشد عليه: مابيه يدري ما ابيه حتى هبوب لاحد يعلمها

عبدالعزيز: لازم تدري هبوب ماتدرين لو يسافر لها ويذبحها هذا مريض وافكاره ملوثه

سكت من دخل عمه : سمعتك مايحتاج تسكت

عبدالعزيز بشوية غضب: وانا صادق فرقتو عوايلنا علشان هالخسيس وبالاخير سرق بنتنا وانحاش

عمه بسخريه: لو تحبها ماكان جلست هينا وخليتها معه

عبدالعزيز اخذ شماغه والتفت على منار: بتجين حياتس الله واذ بتجلسين الله معتس

وقفت بتعب: بروح معك

عبدالعزيز : انا بالسياره

مسك كفها : يابنتي اسمعيني انا قاطعته بحزن: خلاص يبه اللي صار صار ماقصرت

وخرت عنه وطلعت لعبدالعزيز

مسح وجهه بكفه ماكان يبي فايز يتمادى ويخطف البنت هو جابها له علشان يتعرف عليها بس ويسلم عليها مايدري كيف تغافله وطلع فيها

_______________

بـ المانيا

دخلت الجامعه بكامل حشمتها دخلت القاعه الخاليه الا من صديقتها الكويتية: هلا هلا بهبوب صباحج ورد وفل وياسمين

ابتسمت هبوب: صباح النور شعندتس جايه بدري

هيا: والله فاضيه واخوي عنده اشغال قلت وصلني هينا وخلص شغلك

هبوب بهدوء جلست : زين

هيا بتلميح: ترا اخوي مره يمدحج

قاطعتها بجدية: هيا اظن خلصنا من هالموضوع

هيا بضيق: وليش حرام عليج صار له سنتين وهو يحاول يقنعج ماصارت قلنا ثقيله بس مو لهدرجه اخوي دكتور وشاطر ويعرف شبر شبر بـالمانيا وفوق هذا عنده تجارته الخاصه بالكويت وش اللي مو عاجبج فيه علميني سبب واحد بس

هبوب حمر وجهها ورفعت كفها قبالها : انا متزوجه ماتشوفين الدبله ب ايدي

هيا انصعقت : وشو وتوج تقولين لي

هبوب بجدية: ما سألتيني علشان اجاوبج هو عسكري علشان كذا جايه البعثة مع اخوي

هيا ضاقت فيها الوسيعه: طيب ياهبوب طيب

وقامت طلعت من القاعه

ما اعطت الموضوع اهميه طلعت كتبها ودفترها

وبدت تراجع للمحاضره :

دخلو الطلاب وثواني وبدا الدكتور يشرح

عدلت نظرتها متجاهله بذالك هيا اللي منذُ ان دخلت وهي تحدق بها

____________

بـعد مرور يوم هادي
الريـاض الساعه السادسه صباحاً

واقف قدام الباب فتح الشقه وهو عاقد حواجبه سكر البـاب وقفله اتجهه لغرفة النوم وقف مستنكر وهو يشوف بنت نايمه بالشقه رجع على الخلف وهو مازال عاقد حواجبه طلع على طول وهو معصب دق على باهي

باهي وصوته كله نوم: نعم وش صاير بعد

ضيف بغضب: من البنت اللي بالشقه

باهي ب استغراب: بنت اي بنت والله مأجرت الشقه ودايم اجرها على عوايل

ضيف : تعال تصرف مع هالبلوه اللي داخل

باهي / تمام مسافة الطريق

ضيف نزل وركب سيارته ارسل لابوه انه متجهه للدمام


بعد مرور وقت

وقف عند نقطة التفتيش : اسمك

ضيف طلع له البطاقه/ سم

طالعه العسكري بـ استنكار: ملازم اول

ضيف: ايه نعم

العسكري: نزل قرار بالقبض عليك
بنفس المنطقه الرياض:

بسيل بملل: عندي دوام

امها: وش دوامه الساعه6 جامعه وخلصتيها
بسيل : يماااه
امها بعصبيه: انقلعي عن وجهي يابسيل

دخلت رنوه ب استعجال: ماما انا بطلع المدرسه تبين شي ناقصك شي
امها ب ابتسامه: الله يوفقك حبيبتي ابي سلامتس
طالعتهم بسيل بغيض وطلعت

تحت ام مهام جهزت الفطور على الارض:
جلسو ايار ونورسين وعيونهم فيها نوم

ام همام بصراخ : سلطان اخلص علي قوم

نزل ابو ضيف : ماصحى سلطان

ام همام بقهر: لا من خمس وانا فوق راسه ماقعد

ابو ضيف بصرخه: سلطان

فز من نومته وطلع : سم سم يالغالي

ام همام طالعته بقهر: الحين من خمس وانا فوق راسك وابوك من صرخه فزيت

ابو ضيف : تجهز يلا وصل خواتك وبعدها رح لدوامك

سلطان : ابشر

جلس على الفطور وبدا يفطر مع بناته

ايار : يبه

ابو ضيف: سمي

ايار: يبه ممكن اخذ عشره اليوم البنات مسوين عزيمه

ابو ضيف نزل نظارته وطالعها : بس اليووم فاهمه

ايار ب ابتسامه: ابشر

طلع عشرين مد لها عشره ولنورسين عشره

تغيرت ملامح ايار بضيق

لاحظ تغير ملامحها نطق بحياديه: وش عند وجهتس يعطي الوان مو عاجبتس العشره

ايار بهدوء : لا عاجبتني كثر الله خيرك

اما نورسين نطقت بخجل وعيونها بالارض: مشكور بابا

ابتسم لها وهو يضمها من كتفها: العفو يابابا

طالعتهم بغيره

دخل سلطان : يلا بنات تأخرت على المدرسه
التفت ابو ضيف لنورسين وهمس لها: على اساس انه مهتم

ضحكت نورسين: هههههههههههههههه

وقفت ايار بعجله لبست عباتها وهي تنطق: يالله اخلصي

وقفت نورسين وهي تلبس عباتها شالت شنطتها وطلعو مع سلطان :

دخلت رنوه وهي تحب راس ابوها: دعواتك

ابتسم بحب لها: موفقه ياعين ابوك

جت ام رنوه ومعها ام همام :
جلسو يفطرون

نطقت ام همام: ماعندك دوام

ابو ضيف: فيه دوام بس بـ اروح متأخر

ام رنوه : ابو ضيف ترا باهي عازم صديقه على الغداء

ابو ضيف : على خير ان شاءالله والتفت على ام همام : وين همام

ام همام بهدوء: طالع مع باهي للبر

ابو ضيف وقف: اذ جاء خليه يمر علي بالمدرسه ابيه ضروري

ام همام : ان شاءالله

عند الشقه واقفين باهي وهمام بتوتر:

طق انت الباب

باهي ووجهه قالب: مالي دخل انت كفو طق الباب

همام : سلامات تبيها تطيح براسي

باهي وهو يضرب كتفه: يالله انا مسكين ماعندي ام وانت

همام قاطعه: انت كلما رفضت عدت علي هالموال

باهي وهو يحب راسه: الله يخليك انت

مايمدي يتشاورون الا ينفتح الباب والبنت قبالهم تخصرت : منو

باهي وهمام بصوت واحد: انتي اللي منو

البنت بصراخ: الحقققونيييي حرامييييه بيخطفوني ياناااااسسسسس

الى هنا نلتقي الاثنين القادم ب اذن الله


الرد باقتباس
إضافة رد

رواية أثرني ياسعود باقي في عناي/ بقلمي

الوسوم
(أثرني , باقي , بقلمي , ياسعود , رواية , عناي)
أدوات الموضوع
طريقة العرض
مواضيع مشابهة
الموضوع الكاتب المنتدى الردود آخر مشاركة
رواية يازهور العشب في غب المطر/ بقلمي. riwayav أرشيف الروايات المغلقة - لعدم إكتمالها 67 12-04-2020 09:55 AM
رواية رواياتي الأولى / بقلمي Heba 2002 أرشيف الروايات المغلقة - لعدم إكتمالها 37 01-03-2020 05:57 PM
رواية أنتقام العشاق / بقلمي رَحيقْ أرشيف الروايات المغلقة - لعدم إكتمالها 9 08-05-2018 03:14 PM
رواية غدر الحب بقلمي omnia reda Omnia reda أرشيف الروايات المغلقة - لعدم إكتمالها 3 21-12-2015 07:15 AM
رواية : قلص ساعتك أيها الليل المنهك خلصني من وحدة اهلكتني/ بقلمي sajarashid أرشيف الروايات المغلقة - لعدم إكتمالها 26 19-12-2015 09:16 PM

الساعة الآن +3: 11:40 PM.
موقع غرام موقع سعودي خليجي عربي يحترم كافة الطوائف والأديان ومختلف الجنسيات


youtube

SEO by vBSEO 3.6.1