منتديات غرام ترفيه غرام نكت - ضحك - وناسة - فرفشة خربوها عزوز وصلوح ليله الاختبار
ضياع ©؛°¨غرامي فضي¨°؛©

[COLOR="Black"]

السلام عليكم
اسعد الله صبــــــــ مساءكم ــــــــاحكم بكل خير

اقد م لكم هذه القصه بمناسبة الأختبارات ، خاصه للطلاب .... ....ثالث علمي
قصه تحكي عن واقع الطلاب المهملين وش يسون ليلة الاختبار ما بالك اذا كانوا طلاب ثالث
الله يعينكم على القراءه ، اتمنى تعجبكم .. ....
هههههههههههههههههههههههههههههههههههههههههههههههههه ه
يالله تعالوا مع صلوح وعزوز ليلة الاختبار نشوف حالهم هالمساكين ....
الله يعين طلابنا هاليومين ويفرج عليهم ..
فتكم بعفيه ومع القصه

==============

رن رن رن
صلوح : آلووووو
عزوز : السلام عليكم .. الله يسعد مساك خيو ..
صلوح : وعليكم السلام هلا بالعزي هلا بالطش ورش .. ..
عزوز :.. هابشر كيف المذاكره ..
صلوح : مذاكرت ايش يا بابا ، خلها على ربك كل يوم أقول اليوم .. اليوم . .. جت الاختبارات واليوم معيي يجي ..
عزوز : والله مثلك .. مالي خلق على المذاكره ، اذا جت الاختبارات يجني مرض (( امسك الكتاب ثم ارمي به ))
زززززهق .طفش ....
صلوح : حلوه هذي .. امسك الكتاب ثم ارمي به ... عساهم لقوا له علاج .
عزوز : مرض مستعصي ماله علاج مثل الايدز والسكر الله يدفع البلى ...
صلوح وش اقول وش رايك الليله تسير علي بعد صلاة ا العشاء نوسع صدورنا ونذاكر سوى ..
صلوح : ابشر بسعدك .. شورك وهداية الله ..خلاص تحراني عقب العشاء .
عزوز : بس لا تتأخر علي عشان نستثمر الوقت ..
صلوح : احسن انت يا وقت ، قال وقت ابشر تحصلني مسنتر بعد الصلاه مباشره عند بابكم .
عزوز : على خير ان شاء الله .. خدم لازم بابا .
صلوح : لا سواق هههههه
عزوز هه هه بايخه .
ياللله سلام .
،،،،،،،،،،،،،،،،،،،،،
عزوز يتصل على والدته .
عزوز : الو السلام عليكم يا ميه ..
الولده : وعليكم السلام هلا بوليدي ..
عزوز : الله لا يهينك يمه بكلف عليك ، ابيك توصي الشغاله تسوي شاي وقهوه وتحطهن بالمجلس بيجي صلوح ونذاكر سوا .
الوالده : ابشر وانا امك .. الله يوفقك وينجحك ويحقق لك الي تتمناه ..
عزوز : آمين الله يجزاك خير . كثري من هالدعوي هالحلوه هاليومين ترانا نحتاجها كثير .. تامرين شي يا ميه .
الوالده : سلامتك يا خلف يدي ...وكل ربعي ....ما ابي غير سلامتك يا وليدي
============
بعد صلاة العشاء ، عند بيت عزوز
طوط طووووووووووووووووووط طوووووووووووووووووط
خرج عزوز بسرعه
صلوح : سلام يا شنب .
عزوز : اقول فضحتنا بالحاره يا المهبول..
صلوح : هههههههههههه عادي شباب .
عزوز : انزل اخلص .
صلوح : طيب اوقف هنا عادي ههههههههه
عزوز : وش بلاك اليوم ما انت طبيعي ، ما تلام الفيوزات تضرب مع الاختبارات ، يالله وقف هناك بلى استهبال .

وقف صلوح سيارته ، ثم توجه الى بيت عزوز

صلوح : احم احم يا ولد
عزوز : اقلط تفضل .
صلوح : السلام عليكم .
عزوز : تفضل الله حيوه صلوح ،، اسفرت وانورت
صلوح : منوره بأهلها .
عزوز : تبي ارضي والا على الكنب .
صلوح : لا ارضي خلنا ناخذ راحتنا ونتمغط احسن .
عزوز : سم يالغلا اقدع ..
صلوح : وش هزين ، من وين لكم هالاخلاص ...الطيب
عزوز : من وين يعني من المريخ ، من مزرعتنا ،
صلوح : لا اقصد شغل من هذا .
عزوز : اكيد شغل ام عزوز الله يحفظها .
صلوح : الله يخليها لك
عزوز : وش اخبار المذاكره بشر .
صلوح : والله يا عزوز زهقان هالفصل ، طول وبدا اليأس يدخل فيني .
عزوز : تشكيلي ابكيكلك .
المهم وش الحل الان بكره الاختبارات ، واول يوم ازفت ماده رياضيات ، وش الحل وش السواه .
صلوح : الحل عندي وانا ابو هندي .
عزوز : يالله يا فهيم ورنا حلولك ..
صلوح : شف انا اعرف مدرس مصري ، وش رايك نتصل عليه ، ونجيبه الليله يشرح لنا لصبح .. ..
عزوز : والله انك خطير ، يالله اجل اتصل عليه ..

صلوح يتصل بالجوال : طوط وقف طوط وقف طوط
صلوح : آلو ....سلام عليكم
المعلم : وعليكم السلام .
صلوح كيف حالك استاذ مدحت ، معاك صلوح الي درسته العام في الدور الثاني رياضيات . تذكرني .
المعلم : بصراحه ما عرفتكش ، زكرني يابني .
صلوح : اسف اقصد سمور تري غيرت اسمي من سمور الى صلوح .
المعلم : اها افتكرت ، انت التخين ، بتاع البسبوسه .
صلوح : ايوه انا التخين بتاع البسبوسه .
المعلم : كيفك وكيف ابوك ، وكيف الدراسه معاك .
صلوح : ابشر كلشي زين بس كنت بقول يا استاذ تعرف... انا الان بثالث والاسئله من الوزاره وبكره علينا رياضيات ، ودي انك درستا الليله ، ولا يهمك الفلوس اطلب الي تبي لا يردك الا لسانك .. زميلي عزوز ما يقصر بهالسوالف .(( ابوه هامور من هوامير الشرقيه ))
المعلم : كان عشمي والله يا صلوح ، بس انا مزغوط اوي النهرده الجدول مزحوم عندي كتير ، لو كنت اتصلت عليه ابلي انهرطه كنت ما اصر معاك
صلوح : تسلم يا استاذ .. ما فيه مجال ابدا من هنا هنا .
المعلم : والله كنت اتمنى بس انا اسف مررررررررررره يا صلوح .
صلوح : طيب مشكور يا استاذ ، يالله نشوفك على خير .
المعلم : اهلا فيك يا ابني ، وان كنت عاوز الدور التاني ابى كلمني بابله بفتره ، عشان احجز لك ابل الزحمه .
صلوح : الله لا يقول ، مشكور يا استاذ .
صلوح وهو يقفل الجوال : والله شكلها دور ثاني .
عزوز : وش السواه الان .
صلوح : اقول حنا ما اعطنا الله عقل .
جب الكتاب وخلنا نذاكر ، يمكن نفهم ..
عزوز : اقول مصدقك .. هذي رياضيات تبي فهم ..قوانين ودلعت سبد .
صلوح : عطنا الريموت ترانا زهقنا من جو المذاكره ، خلنا نشوف اخبار الكوره .
عزوز : اقول هو حنا ذاكرنا عشان نغير جو ، والله انك رايق .
صلوح : طيب وش السواه ، عندك حل يا ابو العريف .
عزوز : اسمع عندي فكره ، نتصل على زميلنا ماجد .
صلوح : أي ماجد
عزوز : ماجد الدافور طبعاً ، الحين تلقه بالع الكتاب . ونخليه يجي يشرح لنا .
صلوح : والله فكره رهيبه ، خطير عزوز يالله اتصل .
عزوز يتصل .: طوط وقف طوط وقف طوط
عزوز : الو سلام عليكم .. كيفك ماجد
ماجد : وعليكم السلام ، هلا عزوز
عزوز : بشر كيف المذاكره .
ماجد : ابشرك الأمور زينه الحمد الله ختمت الماده .
عزوز : هب عليك .. شكلك كليت الكتاب كله .
ماجد : اذكر الله الله يا مسلم ترى العين حق .
عزو ز : ما شاء الله عليك .. وش ابي اقول مجود ، اذا ما عليك كلافه ،.....
تخبر انا وصلوح ميح بالرياضيات ، ماسحين مره .. وش رايك مادام انت خالصت مذاكره تجي تشرح لنا .
ماجد : والله يا عزوز ما ادري وش اقولك ، كان من عيوني ، الان الساعه احدعش ، لو انت متصل علي قبلها بفتره كنت اخدمك بعيوني . انا الان بنام عشان اصحى للاختبار مبكر ، بكره الاختبار ثلاث ساعات يبي الجسم له راحه .
عزوز : ليدجاجه ، فيه احد ينام بالاختبارات بدري.
ماجد: دجاجه ديك ، ما علي من احد انا بنام عشان اتنشط زين ..
عزوز : على العموم الله يوفقك ، ما نطول عليك ..
ماجد : هلا فيك عزوز ، واعتذر لك مره ثانيه كان ودي اساعدكم ..... سلم على صلوح ، الله يوفق الجميع .
عزوز : هلا فيك مع السلامه .
عزوز : وش السواه ، يا صلوح والله اني بدا الخوف يدخلني . الوقت يمشي بسرعه ..
صلوح : وسع صدرك تراه مو مستاهله .. هذا انت الي ابوك هامور الاسهم وعنده الملايين تقول كذا وش اقول انا الي على باب الله .
عزوز : بس خلنا واقعيين يا صلوح ، بهالوقت الشهاده مهمه .
صلوح : صح مع حق ، الشهاده مهمه ، بس شف خريجين الثانويه العام ، شفهم مكبرين الوساده ، من مقهى لمقهى ومن استراحه لاستراحه .
عزوز : بس مو صحيح هذول كلهم نسبهم نازله مره وهم بعد بيني وبينك مهم حريصين على وظيفه ، معهم ثانوي يبون رواتب عاليه ، ومكتب خمسه بخمسه وجهاز محمول ودلة قهوه داخله ودلة قهوه طالعه .
الدنيا حبه حبه .
صلوح : مدام هالمنطق عندك وش فيك منت حريص على الدراسه .. ياالفيلسوف .
عزوز : والله ياخي الهمه ميته ومغريات الحياه كثيره ..

ضياع ©؛°¨غرامي فضي¨°؛©

صلوح : اقول هي اول سنه بنرسب كل سنه وحنا نرسب ، قم بس جب البلاستيشن خلنا نوسع صدورنا ..
عزوز : هو انت صاحي انا جايبك عشان تحمسني للمذاكره ونشجع بعض وانت بايعها ! صلوح هذي ثالث تدري وش ثالث ؟ ، يعني ثمرة كرف اثناعش سنه ، احدعش سنه بكفه ، والسنه هذي بكفه .
فهمت يا شاطر !.
صلوح : يرحم والديك خلني من فلسفتك ....
شغل لنا التلفزيون على قناة الأغاني ، والا شف لنا فلم اكشن .. خلنا نتونس شوي ..
عزوز : تكفى فكنا من هالأغاني ما وراها غير الذنوب ..
صلوح : شديد يا ولد ، صاير مطوع على غفله .
عزوز : ايه مطوع انتم يا هالشباب .. اذا الواحد فيه شوي خير على طول توقفون بوجهه ، وقلي المطاوعه وش فيهم ..
صلوح : كلهم ارهابيين .
عزوز : توني ادري ان عقلك قاصر ..
هو كل مطوع ارهابي ؟ كل من فجر هو مطوع ؟
والله لو انه مطوع صحيح ما سوي هالمصايب ،
تعال بسألك السديس ارهابي
صلوح : لا مو ارهابي .
طيب السديس مطوع ! ليش تعمم .؟
صلوح : ما ادري ..
عزوز : اسمع لازم تعرف حاجه ان الدين للجميع وعمل الخير كلنا مطالبين فيه ، مو بس المطاوعه ،
صلوح : ما شاء الله عليك وش هالتغير المفاجىء ؟
عزوز : بصراح اليوم فيه موضوع بالمنتدى آثرن فيني ؟
صلوح : وش هالموضوع ؟ بدت الفلسفه تشتغل .
عزوز : توبة المغني ، المازم ...و نزل له شريط إسلامي .
صلوح : هذا وين مكتوب ؟
عزوز : بالعام .
صلوح : شرهتك على الي يدخل ذيك الأقسام ، حدي ... الألعاب و الرياضه .
عزوز : والموقف الثاني ... وحده ماتت الله لا يبلانا قدام الكاميرا وهي جالسه تعرض للشباب في البالتوك .
صلوح : وي وي يادافع البلى والبلاوي . عريانه أعوذ بالله .
صلوح مسترسلاً : يعني هذي الموقف هي الي آثرت فيك ما فيه شيء ثاني ..
عزوز : وش قصدك ؟
صلوح : اقصد !! الاختبارات يعني .. يمكن خوفك منها خلك تتغير .
عزوز : ياخي يا قو شيطانك .. انت وش فيك ما تفهم .
صلوح : طيب خلص فكنا من هالموضوع نبي حل بكره وش نسوي ؟
عزوز : والله ما ادري ؟
صلوح : جتني فكره جهنميه ؟ لقيتها وأنا ابو الأفكار .
عزوز : وش هالفكرة هالجهنمية .
صلوح : براشيم ..
عزوز : براشيم في الرياضيات .
صلوح : على الأقل نبرشم القوانين والباقي نتفلسف فيه وتمشي الأمور .
عزوز : لالالالا تكفى شف لنا غير هالعلوم مانبي غش ، تبي بكره نتوظف وناكل حرام .
صلوح : اوه صار الكلام ما ينفع معك .
عزوز : صلوح عمري وسع صدرك علي ، صدقني هالكلام اقوله لك من حبي لك .. ولولا حبي لك ما قلت لك هالكلام .
صلوح : وش اسوي فيك ضيقتها بوجهي انت ..
طيب اسمع عزوز ، عندي لك حل خطير مو تنشب بحلقي بعد ..
عزوز : سم سمعنا حلولك ..
صلوح : المدرسين بكره ما يقصرون ، تراهم راعين فزعات ، يمكن بكره الله يرزقنا بواحد ابن حلال يساعدنا .
عزوز : انت حلولك من حفره لدحديره .. يا صلوح وش فيك هذا غش عينك عينك .
صلوح : يا خي ليش تسميه غش ، هذا من انواع المساعده والتعاون على الخير .
عزوز : سبحان الله صار هذا تعاون على الخير .. شر البرية ما يضحك ..
صلوح : يا اخي العام أغلب الشباب نجحوا بهالطريقه ..
عزوز : اذا طاحوا بالنار طيح معهم ..
صلوح : والله احترت معاك ما ادري وش اسوي ..
طيب عمري عندي لك حل اخير .. وهذا مجرب ومضمون واغلب الشباب هالايام يستعملونه وينجحون ..
عزوز : ارسل مع اني داري انك بتجيب العيد
صلوح : من هو عيد ؟ عيد الدوسري الي بقناة المجد هههههههههه
عزوز : بايخه ... يثقل دمك اخلص وش الحل .
صلوح : والله هو في شوي طامه بس ...بينجحك ان شاء الله ... الأبيض .. أبو لفه يا عيوني
......مع ابو لفه بتكون حياتك زفه .
عزوز : وي وي والله الا هذي ما هقيته منك يا صلوح ، هذي اخر حاجه كنت اتوقعه منك أي والله حياتك زفه وضياع بعد ... ، بس ما تلام ؟، البيئه الي حولك كلها دمرانه .
صلوح : انت يا لي من بيئه ناصعة البياض .ههههههه
عزوز : لا والله ماني من بيئه ناصعة البياض ، لكن انا شفت الي انت ما شفته ، انا عنيت ومازلت اعاني ، انا فقدت اخوي من امي ابوي ، الى الان ، هو يتعالج بمستشفى الامل من المخدرات وما فيه فايده كله من الشله الي حوله ، كل ما يتعالج ويطيب ، يرجع لشلته الدمرانه .. ويرجعونه للمصايب الي تقول عنها .
صلوح : والله الصراحه يا عزوز اني ماني راعيهن بس وقت هالاختبارات تخليك ترك الكتاب رم ..
عزوز : يا صلوح يا عمري والله مضحوك عليكم ، فيه احبوب تخليك تاكل الكتاب .. صلوح شغل هالعقل الي اعطاك ربك ، لا تصير امعه ، كل ما هب ودب يلعب عليك . والله لقينكم يكلون فلوسكم ويدمرون عقولكم ..
صلوح : والله كلامك اليوم ينقط معسل ههههه اقصد عسل .
عزوز : والله من حبي لك وانا اخوك والا صديق ما ينصح صديقه وش يراد به .
صلوح : انعم واكرم من صديق عز الله انك صديق ما يتفرط فيه .
عزوز : تسلم ، والله انت حبيب وطيب وتستاهل كل خير .
صلوح : اقول بإذن الفجر الآن وحنا ما سوينا شي ما غير ندور الأعذار عشان نتهرب من المذاكره .
عزوز : شف جتني فكره ..واعتقد ما فيه حل غيرها .
صلوح : وش تنتظر تكلم ؟
عزوز : شف يا صلوح ، انا وانت طول السنه مخربينها ، لا مذاكره ولا غيره ، ما غير جلسات بالاستراحه ودش وشيشه وبلوت والا بالمقاهي معسل وضياع وقت ... يعني ما كنا نذاكر اول بأول ..تبي الحين نحصل على درجات عاليه ونتفوق ، هذي بعيده على شنبي وشنبك ... من جد وجد ومن زرع حصد وحنا لا زرعنا ولا جدينا لكن دجينا ...ودشرنا ... ما غير تسويف ، ...بس الحل الأخير من وجهة نظري اذا حنا من جد حريصين على التفوق هو : الإعاده .
صلوح : إعاده ,, انت صاحي والله غير ابوي يعلقني بالنخله .
عزوز : احسن ما تنجح بمعدل ضعيف وتتسدح عند امك ..
نصارح اهلنا ونكون جادين ونبدأ من السنة الجايه بدايه قويه وان شاء الله الله بيعوضنا خير ..
صلوح : والله ما ادري كلامك اشم فيه ريحة الصواب بس ، تعب والله سنه جديده حنا ما صدقنا نخلص من الثانوي وانت تبي ترجعنا ..
عزوز : هذي ضريبة اللعب و الدجه ...والا تبي تتوظف بشركة دجتكوا مع الشباب الي في الاستراحه .. ..
وتحصل على ماجستير في إدارة الاسترحات وتوصيه من المقاهي وساحات التفحيط .
صلوح : كلامك يحتاج تفكير .
عزوز : فكر على راحتك .. بس استعجل قبل فوات الآوان .
واثناء ذلك اذن المؤذن لصلاة الفجر ,,
عزوز : اذن الفجر ووصلنا ان شاء الله بقرار سليم للمستقبل
صلوح : الله يكتب الأصلح .. يالله بإستأذن ،
عزوز : وين صل معنا الفجر ..
صلوح : لا بروح اصلي مسجدنا وادعي ربي انه يرشدني لصواب .
عزوز : الله يوفقنا وإياك على طريق الحق
صلوح : اللهم آمين .
نشوفك على الخير يأبو الأفكار ..
عزوز : على خير ان شاء الله .. [/COLOR]

تسبدي مجروحهـ ©؛°¨غرامي متألق ¨°؛©

عزوز : ايه مطوع انتم يا هالشباب .. اذا الواحد فيه شوي خير على طول توقفون بوجهه ، وقلي المطاوعه وش فيهم ..
صلوح : كلهم ارهابيين .
عزوز : توني ادري ان عقلك قاصر ..
هو كل مطوع ارهابي ؟ كل من فجر هو مطوع ؟
والله لو انه مطوع صحيح ما سوي هالمصايب ،
تعال بسألك السديس ارهابي
صلوح : لا مو ارهابي .
طيب السديس مطوع ! ليش تعمم .؟

احلى شي كنت اضن بيسبووووووون بس حمدلله صار كذا وحلوه القصه ضياع......

! الزين يفرض نفسه ! ♥ قــــلــ طفل ـــــب ♥

ضياع

اول شيء اقول نورتي القسم بمواضيعك الفرفوشيه



ثانياً

الله يسعد قلبك على المحاوره بين المنسمين الثنين

اما صلوح له تاثير علي :هع:


ويسلمو مليون على الموضوع الفرفوشي

خالص مودتي
محبكمـ
الزين يفرض نفسه


دنيـــا ومن يدري؟؟ ©؛°¨غرامي ماسي ¨°؛©

يسلموووووووووووووو
ضياع عالقصه الروعه مثلك

ضياع ©؛°¨غرامي فضي¨°؛©

قيصيميه
تسلمين على المرور

ضياع ©؛°¨غرامي فضي¨°؛©

الزين يفرضه نفسه
القسم منور باشرافك

تسلم على المرور

أدوات الموضوع البحث بهذا الموضوع
البحث بهذا الموضوع:

بحث متقدم
طريقة العرض

موقع و منتديات غرام موقع سعودي خليجي عربي يحترم كافة الطوائف والأديان ومختلف الجنسيات
جميع الحقوق محفوظة منتديات غرام
iTraidnt by ROMYO
جميع الحقوق محفوظة منتديات غرام
iTraidnt by ROMYO

SEO by vBSEO 3.6.1