همسي لحبيبي ©؛°¨غرامي مجتهد¨°؛©

فروع الياسمينة
للكاتبة: ريح الخزاما


ياكلمــة اغلى مــن الناس كلـــهم ... ياشمــس بقلي بعـــيد زوالها
يفرحــة تملي لى الكـــون بكملــه ... ياشجــرة تكبر ويكبـــر ظلالها
تضحــك لي الدنيا لي شفت زولها ... مثل السما تزهى بطلة هلالها
والبعـد عنها ياهل العــرف مقــدره.. لاشــك ناري زايــده بشتــعالها
ماعيــش ببــلاد ولا هـي برضـها ... ولا بي عيوني كان ما هي قبالها
ارض تــدوس امي بالاقدام رملــها ...اموت فيها وانــدفن بـــــــرمالها




في بيت بو ناصر الي يلفه الازعاج من كل صوب .. بسبب كبر عدد العايله .. الي كانت اكثرها من البنات ... الي ماليات الجو حركه وصريخ ودوشه .. البيت كان كبير والعايله كانت ميسورة الحال وماناقص عليها الا ان الله يرزقهم بأولاد بدال هالبنات

منال كانت تطالع افراد عايلتها والدموع في عيونها .. والزعل راسم اماراته عليها .. ويها البرئ كان يصارع البكاء لانها عجزة انها تغير قرر ابوها ... القرار الكبير الي بيغير حياتها .. وهي من بعد هالصراع والاعتراض ماقدرة تسوي شي غير الرضوخ لاوامر ابوها ..

منال كانت لابسه ومتجهزه ... يالسه تنتظر ابوها ياخذها من يدها ويوديها لمصيرها .. الي في ما بعد بيكون له الاثر الكبير في تغير مجرى حياتها بالكامل وبيرسم الها خطوط مستقبلها ..
مسكها ابوها من يدها وطلع وياها من البيت وهي لافه ويها وعيونها على امها واخواتها الي كانن عيونهن عليها ومتأثرات من فراقهن الها ..

منال هي طفله عمرها عشر سنين .. قسمات ويها حلوه.. ويها بيضاوي وابيض ويلفه شعرها الاسود بكل غموض .. عيونها بحر من الاحاسيس والافكار والي كان يناظرهن يحس بقوة هالبنت وفي نفس الوقت بضعفها ..
كان تناقض بين اثنين .. بين القوه في قوة الشخصيه .. وبهالشي كانت تشبه عمتها نوره في هذي الصفه .. والشي الثاني .. ان الي يشوفها كان يحس بالعطف عليها لانها كانت البنت الي تم وقع الاختيار عليها لتنتقل من بيت ابوها لبيت عمتها ...
عمتها الي كانت تفتقد البنات في حياتها .. لانها ماالله عطاها الا ولدين ومن بعد هذا توفى زوجها .. بعكس اخوها بو منال ... الي كان يعاني من كثرة البنات مع وجود اخ واحد بس بينهن وهو ناصر ..

عايلة بو ناصر كانت تتكون من ثنعشر بنت ومن بينهن اخو واحد وهو ناصر .. ومنال كان ترتيبها في نص البنات .. يعني دايما الي في النص ضايع بين خوانه ..

بس كانت مصدر الازعاج الاول في البيت .. وكانت ملفته انظارجميع افراد العايله الها ... من عماتها واعمامها .. لكونها بنت مدخلانيه ومتطفله حبتين .. وهالسبب الي لفت انظار عمتها نوره عليها .. وخلاها تطلب من ابوها انه يسمح لمنال تنتقل وتعيش معاها في بيتها .. وعللة هذا الشيئ بكون انها ترغب في بنت والله ماعطاها هالامنيه ..

ولان نوره كانت انسانه طيبه مع عايلتها كلها .. ومتزوجه من رجل عنده منصب ... كان ماينرد الها طلب في العايله .. ولهذا الشي تم اختيار منال من بين كل خواتها لتنتقل وتعيش في بيت العمه نوره .. الي كان بعيد عن الناس .. ويبعد عن المدينه بمسامه مب قصيره .. والبيت في حالة عزله عن كل مظاهر الصخب والتمدن ..
لان نوره كانت انسانه تحب العزله ومن بعد وفاة زوجها اختارة انها تبتعد عن الناس وتربي عيالها حمد وفيصل بروحها ..
نوره كانت تسكن في بيت كبير في وسط مزرعه .. كان اشبه بقصر مهجور .. كانت فخامته القديمه وديكوراته توحي بغرابة اطباع سكانه .. وكان لنوره كثير من المعارف والصديقات الي كانن مايقطعنها وكان بيتها دايما مليااااان بالناااس .. ولكن في المناسبات بس ..!!



دخلت منال بيت عمتها نوره وهي قابضه كندورة ابوها ومنخشه وراه .. اول مادخلت حست بخوف يتملكها ورعب .. كانو يمشون في الممر الي يودي لميلس نوره داخل البيت .. منال كانت عيونها تدور في البيت وتطالعه بكل خوف .. تشوف جدرانه البنيه وديكوراته القديمه .. الجدران تضم لوحات قديمه توحي بعراقة المكان وفخامته .. السجاد كان غامج ومليان بالزخارف والاشكال المعقده .. رفعت منال عيونها للسقف وشافت الثريات نازله من فوق وفيها شموع منوره بإضاءه خفيفه .. الستااااير مخمليه وماخذه معضم اليدران .. كل شي في البيت يوحي بالغرابه والكأبه .. لكن تفوح منه ريحة البخور الي تعكس بعض الراحه في اجواءه..

تذكرة منال يوم كانت تي مع امها وابوها كانت تشوف بيت عمتها مثل بيت افلام الرعب .. وكلام خواتها الها بان عمتها عايشه مع الاشباح .. وان بيتها مسكون بالجن ..

خافت منال من تذكرة هالامور وغطة ويها بطرف كندورة ابوها .. وصل ابو منال لباب الميلس ودق عليه .. فتحة الخدامه الهم الباب .. اول ماانفتح الباب كانت منال تتخيل عمتها يالسه في كرسي وسط الغرفه ويحيط ابها الظلام .. مثل ساحرات الرسوم .. منال كانت تحب تشوف عمتها يوم كانت تزورهم ولكن الي كان يدفعها لشوفتها هو فضولها في شخص عمتها الغامض .. وحبها انها تشوف شخص عايش بين الاشباح ..
ولكن ماتخيلت في يوم ان القدر بيوديها لعمتها وتكون ملازمه الها على طول في هالبيت الغريب ..

دخل ابو منال الميلس ونشت العمه نوره ورحبت بضيوفها
نوره : مرحبا الساااااع .. حيالله بو ناصر ومن لفانا وياااااه
بو ناصر : مرحبهطو باجي الغاليه ..
حب بو ناصر راس اخته ووايها .. والتفتت نوره صوب منال الي كانت مندسه ورا ابوها وخايفه ترفع عيونها صوب عمتها .. كانت نظرات نوره لمنال تحمل كل الحب للطفله الي بتدخل في حياتها وبتعتبرها مثل بنتها ..
ناظرت العمه نوره منال في صمت وتأملتها وعلى ويها ابتسااااامه تشل كل الحنان الي في الدنيا .. وقف بو ناصر يطالع اخته وبنته .. اول مارفعت منال ويها وطالعت عمتها تبدلت نظرات عمتها الها وارتسمت عليها الجديه .. تقربت من منال وخذتها في حضنها ونزلت ترمسها ..

نوره : فديت روحج .. شحالج حبيبي .. ها تبين تيلسين عند عموه نوره ..؟
منال حست بحزن وتذكرة ويه امها وتذكرة ليش هي يايه اهنيه من كلام عمتها .. لكنها تشجعت وابتسمت لعمتها وكلمتها بثقه علشان توحي الها انها بنت كبيره مب ياهل ..
منال : هلا عموه .. شحالج انتي ..
نوره : هلا فيج عيوني .. انا بخير يوم انتي بخير .. بس ماقلتيلي تبين تيلسين عند عموه نوره ..؟
منال حاولت تبتسم وتخبي خوفها وعدم رغبتها في اليلسه عند عمتها ..
منال : هيه عموه
ضحكت نوره ونشت صوب اخوها ومشو لين الكراسي ويلسو ..
نوره رغم انها كانت حرمه كبيره بس الي يشوفها ماكان يبين له انها كبيره .. عمرها 34 وكانت شديدة العنايه بنفسها وبجسمها وبجمالها ..
عيالها فيصل وحمد عمارهم ثنعش واربتعش .. كان الي يشوفهم مايقول اعيالها كانو ينبانون مثل اخوانها ..

منال كانت معجبه بشخصية عمتها .. كانت تشوفها مثل الاميره .. ولها هيبه وحضور قوي .. كانت تتمنى تكون مثلها يوم تكبر .. وكانت من ناحيه ثانيه تتذكر امها ... امها الطيبه الي هدوها العيال بطلباتهم ومسؤولياتهم .. وكانت تشوف الفرق بين عمتها الي متنعمه بالهدوء والراحه وتفرغها لنفسها ولعيالها الي ماكانو يتعبونها بشي برغم انها ربتهم تربيه حازمه ..

ام منال كانت مثل كل الامهات .. قليله الاهتمام بمظهرها .. كانت تبين على نفسها كبر السن اكثر من انها تحاول ان تخفي اثار السنين عليها ..
كانت طول الوقت مشغوله بريلها وعيالها وبناتها وبالحمال والربى .. علشان تيب الاولاد لزوجها علشان يفرحبهم ويسندونه في شيبته..لكن الله ماكان يعطيهم الا البنات .. وكانو يحمدون الله ويشكرونه.

انتبهة منال من افكارها يوم زقرة عليها عمتها وقالت الها تي تيلس حذالها .. مشت منال بكل خطواتها البريأه ويلست بكل حذر حذال عمتها .. كانت تحاول تكون بنت كبيره وفاهمه علشان تعطي عمتها انطباع زين عنها .

نوره تكلم اخوها : لاتخافون على منال يابو ناصر انا بحطها في عيوني وفيصل وحمد بيعاملونها مثل اختهم واكثر ..
بو ناصر : افا يانوره هذي بنتج وانحن مابنخاف عليها وهي عندج ..

نوره : صدقني يابو ناصر ماتتخيل فرحتيه بمنال كيف .. تعرف انته من توفى المرحوم عفت عقبه كل شي فحياتي مابقالي الا فيصل وحمد والتهيت وياهم وكان خاطريه دوم ببنيه بس ربك ماكتبلي ..
بو ناصر : ربج خذ منج وعطااااج .. الله يخليلج فيصل وحمد وتفرحيبهم انشالله واذا على البنات لاتفكرين ترا بناتي بناتج ويوم انتي بغيتي منال عندج والله اني ماعزيتها عليج ..

نوره : تسلم فديت روحك .. بس صدقوني مابتحسون بغياب منال عنكم ... منال مابتغيب عنكم كل يوم بتيكم ومته ماتبى خوانها وامها بنسيربها الهم .. وانتو بعد اباكم كل يوم تونا ونشوفكم ..
بو ناصر : مايهمج ومنال كم يوم وتتعود على بيتكم وانشالله ماتضايقكم وتتعبكم في شي .. ها يا منال عن الطياشه والمصاخه كوني بنت مأدبه وتسمعين الكلام ..

تمت منال تطلاع ابوها وهي منحرجه من كلامه ..
نوره : شو هالكلام يابو ناصر .. برايها منال تاخذ راحتها لعنبوه الياهل ان ماخذ راحته في بيته وين بياخذها..!! برايها مره تخرب وتلعب وكله فدوه عنها ..
بو ناصر : هذي بنتج من الحين وكيفج فيها هههههههه
نوره : يعني افدا روحها ..
بو ناصر : زين عيل .. اباج تسمحيلي الحين ورايه اشغال .. وانشالله نمركم وقت ثاني ..
نوره : الي يريحك الغالي بس اباك ترد عندنا وتتغدا ويانا ..
بو ناصر : انشالله ان لقيت فرصه بمر عليكم .. بس ما اوعدج باليوم ..

طالع بو ناصر منال الي كانت يالسه حذال عمتها طول الوقت وهي هاديه وتسمعهم .. حزنت عيونه وحز في نفسه كيف بيسير وبيخلي بنته .. بس بو ناصر ريال قوي والواجب الي يحسبه ناحية اخته يخليه يرضى ان بنته تعيش بعيد و تكون مع اخته الي يعزها .. و حته انه مايعز عياله كلهم وروحه عليها ..

بو ناصر وهو يطالع منال : منال .. تعالي حبيبي ..
نشت منال وهي تطالع ابوها وهي تحس ان خلاص لحضة الفراق قربت .. مشت صوبه وهي تحاول تبين نفسها قويه وقد هالموقف ..
من وصلت عند ابوها اخذها ابوها في حظنه ولمها وباسها ودفنت هي نفسها بين يديه وحضنه .. تم بو منال لاوي على بنته فتره وبدت دموع منال تنزل في هدوء وهي ساكته ..
مسك بو منال ويه بنته بين يديه

بو ناصر : حبيبي .. الغاليه ترا هذا بيتج وهذي عمتج .. ومته ماتبين تين صوبنا خبري عمتج وبتيبج والا سويلنا تلفون .. وامج وخواتج كل يوم بيينج اهنيه ..
منال والعبره خانقه صوتها وطالع ضعيف : انشالله بابا
نوره : تعالي منال ..
نشت منال عن حضن ابوها غصبن عنها .. مسكتها عمتها وقالت الها
نوره : منال حياتي اذا تبين تروحين مع بابا روحي .. واذا تبين تتمين عند عموه نوره تمي .. على كيفج حبيبي
نوره كانت تكلم منال علشان تعطيها ثقه بنفسها ونفس الوقت تريحها وتحسسها ان القرار قرارها والي تباه منال هو الي بيصير ..
وقفت منال متردده تطالع ابوها .. وتطالع عمتها .. حست انها مب مغصوبه عشي .. وان عمتها تخيرها .. بس تذكرة ان ابوها وعمتها كانو يبونها تتم .. وهي بتطلع بنت عاقل ومطيعه ومابتكسر كلامهم ورغبتهم ..
منال : عموه نوره .. انا بيلس عندج .. لانج انتي تبن هالشي وبابا بعد .. وانا اكيد اني بتعود على هالوضع اليديد .. بس اول شي لازم تتحمليني لاني بكون مشتاقه لمي واخواتي ..

من قالت منال امي وخواتي ماحست الا بدموعها تنزل وماقدرة تقاوم الدموع .. خذتها عمتها بين يديها وضمتها في صدرها .. اعجبت نوره بمنال وتفكيرها .. حست انها تباها تكون بنتها صدق وانها خلاص اعتبرتها بنتها ولا تباها تروح عنها ..

نزل بو ناصر على ريوله عدال اخته وبنته وهدى منال وطمنها ..
بو ناصر : خلاص الحين مانباج تصيحين وتضايقين عمتج وتخلينا نحاتيج ..
منال بعد ماهدة : خلاص باباه كل شي اوكي
نش بو ناصر وطالع اخته الي تمت ضامه منال عصدرها .. ورفع ايده حياها وظهر .. وتمت منال في حضن عمتها نوره وتمت تضمها ماتباها تشوف ابوها وهو طالع عنهم علشان ماتضعف وتصيحهم اكثر ..


.....................وهذا اول جزء واتمنى يعجبكم واذا شفت ردودكم وتحمستوا لها باكملها....
مـــــــــــــــــــــــــــــلاحظه:
القصه مـــــــره حلوه..لا تفوتووووووووها...!

VEN!CE يـآرب مآلـي ســـوآكـﮯ

مشكورة

الله يعطيكي العافيه



،،

LeftOver Soul ©؛°¨غرامي فعال ¨°؛©

وااااااو





باينة روووووعـه



بلييييز كملييييييهاااا


وأنا بكون من متابعينـك ؛؛


همسي لحبيبي ©؛°¨غرامي مجتهد¨°؛©

السلام عليكم...وكل عاام وانتم بالف خير وصحه وسلامه...
اسفه على التاخير..بس انشغلت بالعيدوالذبايح...ههههههههههههههههه
المهم...
أنا بنزل الجزء الجديد واتمنى يعجبكم.....

رفعت منال راسها بعد ماراح ابوها .. خلاص تمت بروحها عند عمتها في بيتها .. يلست نوره ترمس منال وتتخبرها عن دراستها وكيف بينقلون اوراقها .. وتسألها عن الاشياء الي تحبهن منال ... وتمت نوره توعد منال باشياء وايد وتخبرها عن رحلاتهم وعن فيصل وحمد وعن سوالفهم ..

منال ماتعرف عيال عمتها وايد ونادرا ماكانت تشوفهم .. لان عمتها معوده عيالها على عادات خاصه وجدول وقتهم كل مقسم بين الدراسه وهواياتهم وطلعاتهم الخاصه ..

يا وقت الغدا وطلبت نوره من الخدامه تودي منال غرفتها فوق وتبدلها ثيابها وتنزل للغدا من تخلص ..
خذت الخدامه منال من يدها وراحت ابها فوق .. طول الطرق ومنال كانت تستكشف كل ركن في البيت وتحس ان هالبيت خلاص بيكون بيتها ولازم تتعود على العيشه فيه ..

وصلت غرفتها وطلعت الها الخدامه ثياب علشان تغير .. تغسلت منال وتلبست ونزلت .. كانت الخدامه طول الوقت معاها وكأنها خادمتها الخاصه .. حست منال بتغير الاحوال عليها من بيت ابوها لبيت عمتها .. كل شي اهني بترتيب ونظام وحتى العادات غير ونظام الخدم .. حست ان الجو وااايد مغير عليها .. تمت تقول في خاطرها .. كيف بقدر اتأقلم مع نظام عموه وحياتهم الله يعيني ..

دخلت منال غرفة الاكل واول مادخلت طاحت عينها على عيال عمتها فيصل وحمد الي كانو يالسين على الطاوله حذال امهم .. تمت واقفه عند الباب وتطالع و استحت تدخل .. زقرت عليها عمتها نوره .. فتدخلت منال في تردد وسارت وسلمت عليهم ..
نوره : شحالك فيصل .. شحالك حمد
فيصل : مرحبا منال .. بخير شحالج انتي
منال : الحمدلله بخير ..
حمد : تعالي قربي اهنيه ...
واشر الها حمد لكرسي حذال امه وراح هو الصوب الثاني حذال اخوه ويلسو كلهم .. تمت منال تطالع الطاوله والاكل الي عليها .. الوضع وايد غير .. كيف باكل جدامهم الحين ..!! وليش الاكل فوق .. ليش مايفرشون تحت وناكل تحت ..!!
تمت قاعده ومامدة يدها للاكل .. ابتسمت عمتها نوره وخذت صحن منال وعطته الخادمه الي واقفه حذالها وحطت الاكل لمنال وقدمته الها ..
حست منال ان بيت عمتها مب بيت عادي وكل شي لازم يتم بهدوء ودقه وانها مابتقدر تاخذ راحتها جي ... حته الخدمه فندقيه .. تذكرة بيتهم ولمة اهلها واخواتها على الغدا .. سرحت فيهم تفكر .. عاداتهم البسيطه الحلوه وجو البيت والالفه الي بينهم حست بكل شي اختلف .. رجعت انتبهت للصحن الي جدامها ولعيون عمتها الي تقولها تاكل .. ابعدت عنها كل الافكار لانها خلاص يوعانه وتبى تاكل مدت ايدها وخذة الشوجه والسجين وبدت تاكل ..

طول الوقت حمد كان يسرق النظرات صوب منال .. كان ولد شيطان وحط منال في باله .. اما فيصل فكان يالس بكل احترام وهدوء ولا شل عينه على بنت خاله مول .. خلصو غدا وكان فيصل اول واحد ينش من على الطاوله بعد امه .. زقرة نوره على ولدها فيصل ومسكة يده ومشة وياه للبلكونه ووقفو هناك يرمسون .. في هاللحضه بدا حمد يرمس منال ..
حمد : بتعيشين عندنا صح منال ؟
منال رفعت نظراتها له وحست ان سأله دفش ..
منال : هذا الي تباه عموه
حمد : انتي ماتبين يعني ..؟
منال : انا عادي مايفرق عندي
حمد : مايفرق عندج ..!!؟ ههههههههههههههههه .. كل هذا ومايفرق عندج ليش مب باين لج كيف بيتنا وكيف بيتكم ..!!
رفعت منال ويها صوب حمد وكلها غيض من كلامه ..
منال : شو يعني ..؟ شو فيه بيتكم زياده عن بيوت العرب ..؟
حمد : اول شي هذا مب بيت .. هذا قصر .. ثاني شي الفرق كبير بين جونا وجوكم
حست منال بالغيض من سمعت كلام حمد
منال : صح بيتكم غير بس مب لانه قصر .. غير لانه بيت اشباح ومايسكنونه الا الجن
حمد تملكه الغيض من كلامها .. شو تقول هالبنت شو مفتكره نفسها تقول عنا وعن بيتنا جي ...!! هاي الا زطيه لامينها من الشارع ويايبينها نربيها ونسنعها
حمد : هي انتي شو مفتكره نفسج تقولين عنا جي .. احترمي نفسج لا اقوم الحين اعلمج الاحترام والسنع
منال حست ان مشكله بتستوي ان طولتها مع ولد عمتها وقررت انها تسكت عنه ..
منال : انا مابرد عليك علشان عموه بس .. وبعدين مب انته الي بتعلمني الاحترام والسنع عقولتك

نش حمد مضيق وتذكر امه الموجوده بينهم وسكت وظهر من الغرفه ..
انتبهت نوره للي صار امبين منال وحمد .. راحت عند منال ويلست حذالها عالطاوله وسئلتها
نوره : شو صار .. شو بلاكم .. حمد ضايقج بش ؟
منال : لا عموه ماصار شي بس سوالف عاديه
نوره : وليش ظهر معصب عيل ..؟
منال : مادري عنه عموه ..!!
منال مابغت تقول لمعمتها اي شي لانها خافت عمتها تزعل منها .. وهي ماتبى في اول يوم الها تسوي مشاكل ...

استسمحت منال من عمتها نوره وظهرة .. كان فيصل واقف يطالع الي يصير جدامه وماعلق عشي .. استسمح من امه وظهر هو بعد ..

نشت نوره واقفه وقعدت تفكر بوضع منال عندهم في البيت وكيف عيالها بيتقبلونها بينهم .. وحست انها على ابواب مشكله هي ماسوت الها حساب من قبل ..
عيالها مايعرفون يتعاملون مع اي بنت وخاصه انها بنت بتعيش امبينهم .. لازم تعلمهم كيف يحترمونها ويقدرون منها .. لانها ماتبى تضايق منال ولا اهلها ..

الجزء الثاني



ايه احبك هذا حظي الي انكتب ..... ودربي الي امشيه وادريبه تعب
ايه احبك وانته في عيوني سهر..... وانته وسط القلب حرات القهر
بس احبك




طلعت منال من غرفة الاكل وراحت غرفتها .. دخلت الغرفه وهي تسمي بسم الله وكل ما تسوي شي تقعد تسمي وتتلفت .. بعدها عندها اعتقاد انها ممكن تصادف اي جني وان في اي وقت يمكن يطلعلها شي .. تمت تقول في خاطرها .. شو يابني انا لهالبيت وسكنه ..ليش ماصحت وعارضت اكثر علشان يهونون ويخلوني عند امايا ..

عالعصر دقت الخدامه الباب على منال وهي كانت منسدحه على الشبريه وتجلب في قنوات التلفزيون .. نشت منال يالسه من دخلت الخدامه ..
الخادمه : منال .. مدام نوره تريدج تنزلين تحت ..
منال : اوكي الحين بنزل
نشت منال وراحت للمنظره شافت شعرها منكش .. مسحت عليه بيديها ورتبته شوي ونزلت ..راحت ميلس عمتها وين تترياها ولقت عندها فيصل وحمد يالسين حذالها وجنه الجماعه يالسين يتريونها .. قال في خاطرها .. خير انشالله شو بلاهم ميتمعين شو عندهم ..؟ يمكن حمد خبر امه عن الي دار بينا من كلام وعموه الحين معصبه عليه .. الله ياخذك ياحمد بتسويلي مشاكل مع عموه نوره وبتقوم سكنها عليه ..

نوره : هلا بالغلا .. هلا بحبيت عموتها
من سمعت منال هالكلام تفججت من الوناسه .. قالت لااا شكلها عموه ماتدري بشي .. ويالسه تدلعني .. تمت منال واقفه مكانها ومستحيه.. هي مب متعوده على البزا .. في العاده امها ماعندها وقت تدلعهم وتبزيهم جي .. تمت تدايع من الوناسه وعموتها تتفدا فيها وتزقرها ..
تجدمت منال صوب عمتها ومسكتها عمتها بدلع ويلستها في حضنها ..
نوره : ها حياتي مرتاحه هني ؟
منال : هي عموه وايد مرتاحه
نوره : اليوم بنطلع وبنوديكم بوظبي مول شو رايج ؟
منال فجت عيونها .. بنسير مول ..؟ منال مب مصدقه عمرها ..شو الحياه عند عموه وناسه وحواطه .. وينج يامايا قبل كنتي تشردين شرده عنا يوم تبين السوق .. والحين بنتج يحوطوبها وعلى كيفها ويشاورنها ..
حمد: ها وايد عليها الدكان .. انتي مره وحده بتودينها مول .. شو تبون تجتلونها ههههههه

من قال حمد هالكلام التفتت عليه امه وطالعته بنظره خلته يتسمر مكانه من الزيغه .. ماعرف شو يقول والا كيف يعدل رمسته الي عقها ..
منال طالعت عمتها ونزلت عيونها تحت .. وسوت عمرها متضايقه وانهازعلانه .. وهي في خاطرها يالسه تضحك وتقول تستاهل انشالله عموه الحين تلفك بطراق وتاخذ بقضايا منك ..

حمد : اسف منال كنت اسولف بس
قال حمد هالكلام علشان ينقذ نفسه من امه ونظراتها ويعدل موقفه ..
نشت نوره ومسكت ايد منال ونشو عيالها وراها .. كانت بس تمشي او تعطي امر بعيونها الكل وراها ويطيعها ويفهم عليها ..
نوره تبي تجمعهم وتلمهم مع بعض وتفهمهم انهم خوان وتعودهم على منال ..وتعود منال عليهم ..
طلعو في الحديقه .. فيصل كان يمشي حذال امه .. فيصل كان ولد هادي شخصيته يغلب عليها احترام الغير والرسميه وكان قريب وايد من امه .. وكانت امه تشوفه مثل الاخ والابن والزوج والاب بالنسبه الها .. يشاركها بكل افكارها وهمومها .. يفهمها بس من عيونها .. يحاول يريحها ومايزيد عليها الحمل ..
فيصل تقبل وجود منال عندهم من اول ماخبرتهم امهم عن قرارها في منال .. سكت وماعلق وقالها الي تبينه سويه لاتشلين همنا .. اكيد مابنخالفج .. حمد تضايق شوي.. ابدا بعض الغيره من منال .. وبطبيعته كان يكره البنات ومايستلطفهن .. امه تعرف عنه هذا الشي من ايام المدرسه ..لكنه في الاخير حب انه يشوف هالبنت الي بتي بيتهم وبتشاركهم حنان المهم وراعايتها واهتمامها.. واكيد كان يبى يغير جو البيت ابها ويتسلى على حسابها ..الولد راعي مشاكل ..

في الحديقه نوره تمشي مع عيالها وتسولف وياهم .. بس منال ماكانت وياهم مول .. كانت عيونها على الحديقه والمناظر حواليها والورد الي في كل مكان .. استغربه كبر الحديقه والمزرعه الي تحيط ابها .. كانت على زياراتها القبيله لبيت عمتها النادره .. ماتقدر تطلع من البيت نفسه .. والا انها حته تفج كندورة امها الي قابضتنهامن الزياغ ..

فليل منال على شبريتها تحاول تنام .. والنوم محارب عيونها .. يلست على الشبريه وتمت تطالع الغرفه .. منال مارضت تخلي الخادمه تبند الليت .. ومن طلعت الخادمه عنها وهي على حالتها هاي كل شوي تنش تتلفت وترد تندس في فراشها ..
منال مب متعوده ترقد بروحها .. والبيت الي هي فيه والغرفه مب مخلينها ترقد من افكارها في البيت وانه مسكون .. ارعب كان مسيطر عليها .. اكثر من شوقها لامها وبيتهم وخواتها ..تمت تحاول تمسك دموعها وخوفها وماكان بيدها شي .. وين تروح وشو تسوي ..ماعندها حد تلجاله .. وعمتها ماتعودة عليها وخافة من ردة فعلها .. تمت طول اليل ماسكه خوفها ورعبها لين ماغلبها النعاس من التعب ورقدة .. على اول الصبح وقبل ماتظهر الشمس فزة منال واعيه .. انتبهة وتذكرة الجن ماعرفت شو تسوي نشت تصرخ وتربع برا الغرفه .. وقفت في الممر وقعدة تصارخ وتصيح .. خلاص ماقدرة تستحمل اكثر ..

على الصياح نشة عمتها نوره وطلعت تربع برا تشوف وين هالصريخ والصايح .. وقفت ولقت منال واقفه نص الممر وتصارخ ومب عارفه وين تروح .. وتزقر امها وابوها ..

راحتلها نوره وخذتها في حضنها تحاول تهديها بس منال فزة من نوره ومارضت تقعد في حضنها .. فيصل وحمد طلعو وتمو يطالعون منال ومب عارفين شو صاير الها ..

تمت نوره تقرا على منال وتتقرب منها وتحاول تهديها .. شوي شوي هدا صريخ منال وسكتت وهي تصيح ودموعها مغطيات ويها .. مسكتها عمتها وسمت عليها وشلتها وراحت ابها لغرفتها .. التفتت لحمد وفيصل وقالت الهم يسيرون يرقدون .. وانها بتهدي منال ..

دخل فيصل غرفته ويا بيسكر الباب وشوي وان اخوه حمد ساد الباب يبى يدخل ..
فيصل : خير حمد شو عندك ..؟
حمد دخل وهو قابض راسه وعافس ويهه وقعد يكفخ بيديه من الغيض ..
فيصل : هههههههههههههه ها كله غيض من منال ؟؟
حمد : اخخخخ يافيصل ميت قهر منها .. عنلاتها شو هالبزا .. تصارخ اخر اليل وتباغم .. شو يبغمها هالبزيا اذتنا ماخلتنا نرقد
فيصل : هههههههههه والله يمكن البنت تعبانه والا شي بلاااها .. وتراها بعد صغيره وحليلها واكيد تبا امها
حمد : ها صغيره ..؟ ها يعريه شو تبى بمها .. يويلي على ضربها لو يفجوني عليها انا بادبها الهم زين ..
فيصل : ههههههههههه فكني انته الحين وخلني ارقد .. ممكن ..؟
حمد وهو يطالع اخوه بغيض : ماعليه بسير عنك بس صدقني بيي يوم بفج غيضي في هالبزيا وارتاح
فيصل : هههههههههه يالله يالله فارج
ظهر حمد عن اخوه وسار غرفته ..

نوره ذيج الليله باتت تقرا على منا وتهدي فيها .. والبنت تهدا وترد تذكر عمتها وسكنها وترد تصيح بس عمتها مب فاهمه شو السالفه وليش منال مرتعبه جي ..
اخر شي نامت منال في سرير عمتها نوره .. ونشت نوره بعد مااطمنت على منال وراحت توضة وصلت الصبح .. وردت انخشت في الفراش عدال منال ورقدة وهي حاضنتنها ..

عالصبح وعت منال واول مافجت عيونها تذكرة ليله امس والفضايح الي سوتهن والبغيم والحشره .. ويت بتنش فحست بجسم عمتها حذالها وهي حاضنتنها ونايمه .. ردت على وضعها القبلي ولا تحركت وخافت توعي عمتها .. ومني استحت .. سوت عمرها راقده وماتحركت .. شوي وان عمتها نشت وقامت يلست وطالعت منال .. هوت عليها وباستها وقامت راحت الحمام ..

من دخلت نوره الحمام نشت منال من الشبريه وطلعت على طول صوب غرفتها .. افتشلت من عمرها ومن الي سوته البارحه .. تمت تلوم نفسها وتقول الحين شو بيقولون عني وحمد اكيد مستانس لاني سويت جي وعموه اكيد تضايقت مني .. ياربي شو اقولهم الحين لو يسئلوني شو بلايه ..؟

اخر شي نشت منال وراحت الحمام بتتسبح .. لقت الخدامه مزهبه الها ملابسها ومن طلعت من الحمام لقتها على طول في ويها .. ساعدتها في لبس ملابسها ومشطة الها شعرها ونزلت وياها تحت .. على الريوق لقت عمتها يالسه تقرا الجريده وماشافت لا فيصل ولا حمد .. قالت في خاطرها الحمدلله مافيه على مجابل ويوهم على الصبح والشماته ..

رفعت نوره ويها عن الجريده من شافت منال وزقرتها .. راحت منال لعمتها وباستها على راسها وصبحت عليها ..

قعدة نوره تسولف مع منال ولا طرتلها شي عن الليله الي فاتت .. ماحبت تضايق منال واكيد عرفت ان منال مفتشله من الي صار وماتبى حد يذكرها به والا يسألها عنه ...

يلسن منال وعمتها يتريقن ..
منال : عموه وين فيصل وحمد ليش مايتريقون ويانا ..
نوره : فيصل وحمد طلعو عندهم تدريب في نادي الخيل وبيردون بعد ساعه وبتحطلهم الخادمه ريوقهم ..
منال : اها ..
تمت نوره تطالع منال وترد عينها عنها وتكمل اكلها .. في خاطرها تسألها عن سالفة البارحه بس غيرة رايها ..

خلصن ريوق وطلعن يلسن في الصاله .. شوي وان حمد وفيصل رادين ..
فيصل : السلام عليكم ..
وسار عند امه وهوا عليها وحبها على راسها وباس ايدها ..
دخل حمد عقبه وسلم وسار صوب امه وباسها .. يلس حذالها وحط ايده من ورا جتفها .. وعيونه صوب منال الي يالسه على طرف وتطالعهم ..
نوره : ها فديتكم شو سويتو ..؟
فيصل : والله ماشي يالغاليه هذا السير من النادي لهني
حمد: لعلوم عندكم اهنيه .. خير على سالفه البارحه شو بلاها ست الدلال.. اقصد شو بلاها منال بايته تصارخ وتصيح ..؟

حمد اكيد انه مابيفوت هالشي ومن البارحه هو خاطره مليان على منال ووده يفج غيضه شويه فيها بس بعد وجود امه كان يمنعه من هالشي والاستمتاع به ..

نوره : البنت اول ليله الها هني .. وكانت اكيد مشتاقه لمها وبيتهم ..
تمت منال منزله راسها وماقالت شي ...
فيصل : ماعليه يامنال كم يوم وبتتعودين على بيتنا ..
حمد : بتتعودين قصده على الجن ماليلنا ههههههههههههه
طالعت نوره ولدها وهي تلومه ..
نوره : حمد شو هالكلام ..؟ تبى تزيغ البنت وتخرعها اكثر من ماهي مخترعه ..؟
حمد : والله انا مايبت شي من عندي هاي رمستها هي ..
نوره : رمسة منال ..؟

تمت منال تطالع حمد وعمتها وتدعي في خاطرها عليه .. الحين بيفضحني هالغبي ..الله ياخذه شو اسوي الحين ..
حمد : تراها بروحها تقول ان بيتنا بيت اشباح وجن ..
منال وهي تحاول تعدل موقفها : لا عموه..

تمت نوره تطالع حمد وتلومه على رمسته ولسانه الي ماييوده ..
حمد : شو لا ..؟ تنكرين انج قلتي هالكلام ..
بدا حمد يحرج منال اكثر واكثر .. ونوره ماعجبها هالشي وحبت توقف كل شي عند حده ..
نوره : حمد .. خلاص .. ماصار شي وان قالت منال هالكلام تراها ماتعرف بيتنا وماتعرف شي عنا .. واكيد هي كانت سامعه هالشي ومالها علاقه به ..
تم حمد يطالع امه .. ليش تدافع عن منال .. تم يتحرطم بداخله ويشوف امه توقف مع منال وانقهر هو ..
ضحك فيصل على حمد ومنال ونش بيسير يتريق ..
فيصل : اماه انا بسير اتسبح خلو الخدامه تحط الريوق ترا ميت حدي ..
نوره :مايهمك الغالي ..

ظهر فيصل وهو يفر اخوه بطاقيته ويضحك عليه .. وحمد يالس منقهر وماسك عمره .. ومنال رافعه راسها وفرحانه ان عمتها واقفه وياها وانقذتها من حمد ..
نش حمد بيظهر ووفقته امه ..
نوره : حمد ايلس ابااااك انته ومنال ..
حمد حس ان امه ناويه تعطيه محاضره عن الشيخه منال وكيف لازم يعاملها ..
رد يلس مكانه وهو يتحرطم .. مسك طاقية اخوه وقعد يلعبها بيديه وهو يتريا امه ترمس ..

نوره : حمد ومنال .. اباكم بكلمتين .. ابى افهمكم انكم عيال عمه وخال قبل اي شي .. وماابا حد فيكم يشل على الثاني في قلبه .. بعدين انتو توكم تتعرفون على بعض وجدامهم عمر طويل بتقضونه مع بعض وفي نفس البيت .. يعني اباكم تهدون وتتعاملون كأخوان وقلوبكم على بعض مب ضد بعض ..
ماله داعي البغض والهندقه الزايده ياحمد ..

حمد وهو بيثور على رمست امه : ها هاااا اشوف الكلام الا لحمد .. وهالبرئه ام ويهيم ماتوجهيلها هالرمسه ..
نوره : حمد .. الكلام موجه لك والها .. بس منال ضيفه يعني لازم عليك انته التسامح والمغاضه..
حمد " اماه توج تقولين انحن خواااان وبيت واحد .. يعني هي بعد لازم تتغاضى وتصخ عني ..
نوره وهي تتأفف : الله يهديك .. ياحمد انا مابكرر كلامي .. كلامي واضح ومابى جدال فيه ..

حمد وهو يطالع امه ومنال ومايل بويه على طرف عنهم ومب عاجبنه شي ..
حمد : خلاص الوالده كلامج مطاع .. تامريني بشي غير ..؟
نوره بعد ماهدة وعيونها باين فيهن لومها في حمد : لا الغالي سر تريق برايك ..
نش حمد وفر طاقية اخوه وين كان يالس وظهر ..

حست نوره بلوم ناحية حمد وعطريقه كلامها وياه .. حست ان هاي اول مره ترمس حمد بهالطريقه وماهان عليها انها تلومه هالقد .. بس في نفس الوقت هي بغت تعلمه الاحترام مع الناس ..هي ماتلوم حمد في تصرفاته اكيد انه يغار على امه ومايبى حد ياخذ اهتمامها عنه ..

طالعت نوره منال وخافت ان موقفها هذا مع حمد يسبب لمنال مشاكل اكثر في المستقبل وحمد يحقد على بنت خاله اكثر ..
تمت نوره محتاره .. كيف بترضي لثنين بدون ماتتسبب في نزاع وحقد بينهم في المستقبل ..

نشت منال وبغت تظهر هي بعد .. التفتت الها نوره وزقرتها ..
نوره : منال ..
منال : خير عموه ..
نوره : تعالي اباااج ..
سارت منال ويلست حذال عمتها وهي نقول في خاطرها .. شو بعدها عموه تبى تقول ..!! ماخلصت من النصايح ..؟
نوره يلست تفكر كيف تغير فكرة منال عن البيت وسالفة الجن وبغت تفهم منها السالفه اكثر واذا هي صدق كانت خايفه من هالشي ..

نوره : ها منال الحين اباج تقوليلي .. صدق الكلام الي قاله حمد ..؟\
تمت منال ساكته وماعرفت شو تقول ..
نوره : منال حبيبي لاتخافين من شي .. قولي الي صار ..
منال : لا عموه انا مب خايفه من شي ولا من اي شي قلته .. بس انا خايفه من زعلج عليه .. وماباج تزعلين مني ..
نوره : مستحيل ازعل منج .. انتي حبيبت عموه .. ولو شو تسوين مابزعل منج ..
تطمنت منال واستانست على هالكلام .. وراحت تخبر عمتها عن الكلام الي دار بينها وبين حمد ..

ضحكت نوره وتمت تطالع منال وهالافكار الي يايبتنهن وياها عن بيت عمتها وعمتها ..
يلست تفكر شوي وعقب طالعت منال وقالت الها تعالي معااااي ..
نشت منال مع عمتها وهي مب عارفه وين عمتها تبى توديها .. طلعن فوق الطابق الثاني ويد نوره في يد منال وكل شوي تطالعها وتضحك الها ..

راحن غرفة منال ودخلن وسكرن الباب ..
راحت نوره ويلست على الشبريه وتمت منال واقفه جدامها وتطالعها وتترياها تقولها شو عندها ..
نوره : اكيد تبين تعرفين ليش يبتج اهني ..
منال وهي مستغربه : هي عموه شو السالفه ..؟
نوره : منال انا ماباج تخافين بعد اليوم .. البيت مافيه جن ولا شي من هالخرابيط ..وانتي تعرفين ان البيت الي ينقرا فيه القران ماايونه الجن..؟ وهالي سمعتيه كله خرابيط ..

منال : بس عموه كل الناس تقول جي .. ليش عيل يقولون جي يوم البيت مافي شي ..!!
نوره : احنا ساكنين اهنيه ومن زمان ولا عمرنا شفنا شي ولا سمعنا شي .. يعني الناس الي برا ادرا عننا ببيتنا ..؟!!
تمت منال تطالع عمتها وتفكر واقتنعت بكلام عمتها ..
نوره : واذا تبيني اطمنج اكثر بقولج شي غير ..
منال : شو ..؟
نوره : منال تعرفين هالبيت .. ها بيت ابويا الله يرحمه .. يعني ها بيت العايله وبيت ابوج بعد ..
منال فجت عيونها واستغربت هي اول مره تعرف هالشي ..
نوره : والغرفه هاي كانت غرفة ابوج ..وغرفة فيصل من عقبه .. واسئليهم اذا تبين ..اذا كد سمعو شي ولا حسو بشي ...


............................ وهنا بنوقف والجزء اللي بعده قريب ان شاء الله
واتمنى تعجبكم...
وبقولكم لازلنا في الاحداث الاولى يعني للحين القصه ماظرت معالمها...
واتمنى اشوف توقعاتكم...
ودمتم سالمين...

LeftOver Soul ©؛°¨غرامي فعال ¨°؛©

اخييييراً ظهرت<<=تنتظر القصه هع

بليييز حطي كمان بارت اليوم ,,

احس القصة مسلية ومتتعة !!


تحياتي


همسي لحبيبي ©؛°¨غرامي مجتهد¨°؛©

يابعدهم ياسوووو...!=>((ترى ماعرفت اسمك بس بادلعك سوووو))
واتمنى يعجبك..واذا ماعجبك حبيبتي ترجمي لي اسمك...هههههههههههههههه
ياقلبي انتي والله لخاطر عيونك انتي انزل كل يوم جزء يكفيني انتي تقريها..!
والله والله انها ممتعه....
واخليك مع الجزء الجديد......

منال ماصدقت .. هاي غرفة ابويا وهو صغير وانا فيها الحين ..!! تمت تطالع الغرفه وترد تطالع عمتها في ذهول ..
عقب ضحكت منال واستانست ..
نوره : ها يامنال .. في خوف بعد هاليوم ..؟
منال : ههههههه لا عموه وليش اخاف وانا في غرفة ابوياااا وبيتنا
نوره : ههههههههه فديتج يالغلا ارتحتي الحين ؟
منال : وايد عموه .. وايد ريحتيني ..
نوره : ههههههه فديت روحج .. يالله عيل انا بظهر عنج تبين شي ..؟
منال : لا عموه مشكوره ..
ظهرة نوره عن منال وراحت غرفتها .. كانت تتنهد وتحس ان تربية طفل يديد تعتبر مسؤوليه يديده عليها وماتعرف اذا هي تتصرف صح مع منال والا لا ..؟

طلعت منال من غرفتها وراحت الصاله كان خاطرها تشوف حمد وتقوله عن الاخبار الي عرفتها توها وتقهره ..
نزلت ولقت فيصل يالس يطالع التلفزيون ويشرب جاي .. من شافها فيصل اعتدل في يلسته وزقرها تي عنده ..
راحتله منال وهي مستحيه شوي .. لين اليوم منال ماتعرفت على فيصل عدل ومابان الها شي من ناحية فيصل صوبها ..
فيصل : وين اماه عيل ..؟
منال : راحت غرفتها
فيصل :هممم .. تريقتي .؟
منال : هي تريقت مع عموه نوره ..
تمت منال يالسه وتلعب بطرف فستانها وفيصل يالس يدور بالكوب في الصحن وهو محطوط على الطاوله جدامه .. ومب عارف شو يقولها والا كيف ييلس وياها .. ومن ناحيه ثانيه كان يبى يزيل الحواجز الي بينهم ويخليها تحسبه مثل اخوها ..بس تم محتار ومب عارفلها ..
التهت منال في عمرها وتفكيرها في حمد الي كانت تدوره بعيونها وخاطرها تسيرله وتغايضه ولبست فيصل الي كان يحاول يتعرف عليها اكثر ..
نشت وسارت صوب حمد يوم شافته يلعب خاري البيت بالكوره ..
طلعت وتمت تتمشى حذاله وفي عيونها وخاطرها الرمسه وفيصل يالس يطالعهم من مكانه وحاس بالنيه الي في عيون منال ..
حمد وهو يلعب يالكوره : خير ست الدلال شو في خاطرج تحاوطين عندي يالسه ؟
منال وهي واقفه وحاطه يديها وراها : ماشي ..
حمد : ارتحتي اليوم يوم شفتي امي واقفه وياج ضدي .؟
منال تلومت في حمد بس عقب ردت وقالت يستاهل هو مايتلوم فيها ليش انا بتلوم فيه ..
منال : انا يايه اقولك ان هالبيت او القصر مثل ماتقول بيت ابويا قبل مايكون بيتكم .. يعني .. اليه فيه مثل مالكم ..
تفاجأ حمد من هالرمسه ورفع راسه يطالع منال وما اهتم بالكوره الي طلح عنه وراحت بعيد ..
حمد : شو تخرفين انتي ..
منال : الي سمعته .. ولا تيلس تغيضني بالهشي مره ثانيه ..
حمد : منو قاص عليج انتي .؟
منال : عموه نوره قالت لي وماتقص عليه ..
حمد : جذابه انتي ..
منال : واله حتا روح تخبرها ..

سار حمد قبل ماتكمل منال كلامها وطلع فوق عند امه .. بعد هالي ناقص عقب ما اسكت عنها واخليها تولي تي امي الحين تقويها عليه وتخلي راسها براسي ..

راح حمد ودق الباب على امه ودخل وهو مضيق ..
حمد : امااااه شو هالكلام الي تقوله هالهبله .. شو قلتيلها انتي ها بيت ابوها .. ؟؟!!
نورة فجت عيونها في ولدها .. ياربي شو هالحاله .. هاللثنين مابيهمدون شوي وارتاح منهم ..

نوره : شو بلاك بعد ..؟
حمد : منال
نوره : وشو بلاها منال ..؟
حمد : منال تقول ان هذا بيتهم قبل مايكون بيتنا .. صح هالكلام .. يعني هذا مب بيت ابويااا ..؟
ماعرفت نوره شو هالورطه والا شو ترد على ولدها .. هالولد حاط دوبه ودوب هالبنت ..
نوره كانت جاذبه على منال علشان تريحها ومادرة ان هالجذبه بتورطها مع ولدها .. لين الحين نوره مب عارفه كيف تتعامل معاهم..هي يوم فكرة تيب منال عندهم مافكرة بالمشاكل الي بتواجها مع عيالها وبين منال ..
ابتسمت نوره لودها وحاولت ترضيه هالمره .. علشان ماتزيد الامور بين الاثنين ..


الجزء الثالث




اشوف الناس في عيوني ومن بدهم اشوفك غير
واحس مثلك في ها الدنيا ابد مايصر .... في عينك سحر ياخذني ويخليني معك اسير
واحس عمري وقف عندك وايامي وراك اتسير



منال بدت تشتاق لاهلها وامها .. الوقت في بيت العمه نوره يمر بطيء عليها .. وبدت تحاول تتجنب حمد وتريح راسها منه ..

فيصل : منال تعالي تلفون ..
منال فجت عيونها وخاطرها تقول ان امها الي داقه الها .. التفتت على فيصل وهو واقف عند باب غرفة الجلوس ويترياها ..
منال : منو ..؟
فيصل وهو يطالع منال بنظرات الي ياييب شي حلو ويتريا يشوف فرحة منال ..
فيصل : منو تتوقعين يعني بيدقلج غير امج والا خواتج ..!!
نشت منال والفرحه في عيونها وعطول تركض عالتلفون ..

منال : الو
ام منال : هلا بمنوله هلا بحبيبي
منال : اماياااااا
وبدت منال تصيح ..
ام منال : افا يا منال .. انتي حرمه ليش الصايح ..
منال : امي تولهت عليكم وااااايد
ام منال : وحنا فديتج تولهنا اكثر واكثر .. شو مسويه هناك ربج مرتاحه ..؟
منال : هي اماه مرتاحه بس اتوله عليكم وايد
ام منال : يعني افدا روحج ..تعالي والا احنا بني صوبج .. ولا تعبلين على عمتج
منال : ماعليه لازم بييكم ..امي وين خواتي ماسمع حسهن ..؟
ام منال : هذي العاش حاشرتني تبى ترمسج اندوج اياها
العاش : الووووووووو منووووووه
منال : عوااااااااش
العاش : اخ عليج خلاص شلوج عنا يعني ماتتصلين ماعندج خوات
منال : جب جب يالدبه وليش انتي والا قطيع هالبنات الي عندج ماتتصلن هاااا
العاش : فكينا الحين خبريني شو تسوين هناك ..وكيف عايشه بين هالناس
منال : شو بعد هالناس ..!! ها عمتج الا وعيالها ...وبعدين شقى يعني بعيش عادي
العاش : يغربلج خليتينا ورحتي عنا.. مالت عليج
منال : بكيفي هوه .. وبعدين اذا تبين تين بدالي تعاالي حيااااج اصلا بتفكيني
العاش : ومن شوه افكج شو صاير عندج..؟
منال : بعد شو بيصير غير اني مفروره بعيد عن اهليه
العاش : منوووه سمعي
منال : ها العاش اسمع
العاش: ترا بني صوبكم انا واماه وحمدوه
منال : واالله ومته بتون .؟
العاش : باجر يمكن ني
منال : بس انتي وحمدوه بتووووون وليش والباقين مابييون ..؟
العاش : شو الباقين شو تبينا نظهر الباص ونحمل فيه خوانج كلهم ونفجهم في بيت السحره .. لا عاد خواني غالين عليه وبعد مافينا يتعشونهم ويجتلونهم والا شي...
منال : مالت عليج وخوانج غالين عندج وانا شووو ..!!؟ مالي رب ويا ويهج ونا مب غاليه شراتهم
العاش: ههههههههه لا خلاص اصل انتي الحين برا العايله مالنا علاقه بج
منال : تخسين والله الا انا من العايله وانتي تظهرين منها .. يالدبه
العاش : ههههههههههه صايره ماتقهرين مزاح يالخبله حشا شو تعقدتي من سرتي عنا
منال : متفيجه انتي ... بس سمعي
العاش : ها شو
منال : شوفي يوم بتن انتي وحضرة حمدوه لاتن كجره كالعاده .. اايه تسحن لاتن بكشيشكن وتلبسن وتسبحن قبل لا تن ههههههههه
العاش : لا والله .. جي وين سايرين انحن قصر حرم صاحب السمو
منال : انتي سمعي الكلام عاد وعن الحشره .. لاتن جنقليات وتفشلني جدامهم ..

منال مافيها على تعليقات حمد عليها وعلى خواتها .. ويلست توصي العاش شو يلبسن وشو يسون وكل شي يخص هالزياره ..

سكرت منال عن اختها وراحت عند عمتها نوره علشان تخبرها عن زياره اهلها الها واخواتها ..
نوره : انا رمست ابوج بعد اليوم وقالي انهم ناوين ايون واييبلج خواتج يشوفنج ..
منال : بتي العاش بس وحمدوه ..
نوره : وانتي تبينهم كلهم ايون ..؟
منال : هممم انا مشتاقتلهم كلهم .. بس هم مابيقدرون ايون كلهم مع بعض ..
نوره : انزين شو رايج هم بيون باجر وانتي عقبها بكم يوم روحيلهم ..
منال : والله ..عادي يعني ...؟
نوره : هي حبيبي عادي .. وبعد سيري قبل السوق واشتري الهم العاب وهدايا ووديهن وياج زياره لخوانج .. شو رايج .؟
استانست منال على هالشي ونشت من الفرحه وباست عمتها وربعت فوق حجرتها .. تعدل اغراضها وتشوف فساتينها وترتب العابها علشان من ايييون خواتها ترويهن غرفتها وكل شي يابته الها عمتها ..

……....

فيصل وحمد يالسين في غرفة فيصل ويطالعون سباقات الخيل ومطولين على التفزيون ومحتشرين .. ومنال يالسه بروحها في الصاله الي فوق وتسمع حشرتهم ..
خاطرها تدخل عندهم وتعرف شو يسون .. بس لان حمد هناك هي مب رايمه تدخل ولو على فيصل منال ترتاحله وعادي عندها لو تدخل غرفته وتيلس وياه ..

في هاللحظه طلع فيصل من الغرفه وشاف منال يالسه بروحها .. خطف عدالها وهو يطالعها ..
فصيل : شو تسوين بروحج ..؟
منال : ماشي بس يالسه ..
فيصل : هممم اوكي تعالي عندنا
منال فرحت ويا فيصل عخاطرها بس تمت ساكته وتفكر في حمد الي داخل ..واكيد هو مايباها تيلس وياهم
تمت ساكته
فيصل : بسير اييب بيبسي تبين ..؟
منال : انا بسير اييبلك
فيصل : .... اوكي
وقف يناظرها وهي تربع من عالدري ويالس يفكر فيها وفي داخله راحمنها ومتعاطف على وضعها .. وبدا يلوم حمد على معاملته الها .. رغم انه من البدايه فيصل ماكان مهتم ابها ..
بس مع الايام تم يحس انه لازم يهتم ابها لانها دايما بروحها وتحس بوحده ..وهم ماحاولو يندمجون معاها لانها بنت ومايعرفون كيف ييلسون معاها ..

فيصل عدا مرحله اللعب وتم يشوف عمره ريال وماييلس مع البنات وله ميول ثانيه عنهم وتفكير اكبر من تفكير حمد ومنال .. لكنه قال لنفسه .. لازم اهتم اشوي ابها خلاص هذي تعتبر اختنا ..

دخل فيصل غرفته وشوي ان منال يايه وواقفه على طرف الباب وشاله بيبسي الها ولفيصل ولحمد .. عبالها دهان سير علشان حمد مايناتربها ومايقولها شي ان يلست وياهم ..

تمت واقفه وايد عالباب محد حسبها .. عقب دزة الباب ودخلت .. شافها حمد وعطول عطاها بنظره يفهمها .. انتي شو يايبنج .. شو تبين .. بس منال سوت عمرها طيبه واونها ماشافته وعطول سارت بسرعه لفيصل وعطته البيبسي ووطت بيبسي حمد عداله وراحت سوت عمرها بتطلع ..
فيصل : منال .. وين تبين تعالي يلسي ويانا
طالع حمد فيصل بعيونه ويقوله ليش تزقرهااااا
منال تمت تطالع حمد وفاهمه عليه .. ووقفت مكانها وردت بتحدر تيلس وياهم ..
وتم حمد يتحرطم في داخله معصب ..
يلست منال حذال فيصل .. ويلس يرمسها .. شوي شوي نسى فيصل التلفزيون وحمد وتم يسولف ويا منال ويقرضون حمد ويلاعبها ويلعوزها .. استانس فيصل عليها وعلى سوالفها ..
منال : فيصاااااال يالله عاد ترا بخبر ابويا عليك ههههههه
فيصل : هههههههههه وشو بيسويبي ابوج عاد؟
منال : بيقبضك من ريولك وبيعلقك من الدريشه ..
فيصل : هههههههههه مب ابو هذا طرزاااان هههههههههههههه
منال : طرزان ..!! ها ماعليه هذي بسجلها لك بعد .. كله بيوصل هههههههه
فيصل : لااااا انتي لازم يغيرون اسمج من منال لرويتر ههههههههههه
منال وهي متعجبه : ومنو هاي رويتر ..؟
فيصل : هههههههههههه هاي وحده شلقى وعريا وفيها لسانين وتظهر للبنات بس فليل..
منال : هااااااا هذي خطيبتك عرفتها ههههههههههه
فيصل : ههههههههههههههههههه لا خطيبت حمد هاي
حمد : حوه خلو حمد في حااااااله لاتيبون طاريه لا انشلكم بالشلوخ
منال : يمه منه هذا منو بتاخذه .. زين يوم رويتر طاعت وقبلتبه ههههههههههههه
طالعها حمد وهو معصب وناوي عليها ..
فيصل : هههههههههههههههه حمد رفجه ماتقلولها شي
حمد : هي لا زين .. حلو .. قبل امايا والحين اشوفك درت انته في صفها .. وانا حليلي قبضتوني الباب ..
فيصل : ههههههههههههههههه سوالف والله عن تصدق
منال : ههههههههه خله يصدق عادي مابيستويله شي بس بيتعقد اكثر من ما هو متعقد ..
حمد: ها سكت عن الاوليه بعد هاي تباني اسكت عنها ...؟ اسمحلي
فيصل : ههههههههههههههه والله انها طماشه .. حلفت انك ماتقولها شي ..
حمد : بسكت عنها الحين بس مب دوم .. وخلها تصطلب لا اصلبها بمعرفتيه

تمت منال تطالع حمد وهي معفسه ويها وتقلده وهو يرمس بدون صوت وفيصل يطالعها ويضحك عليها ..

يوم عن يوم حلوة العلاقه بين منال فيصل ونوره اكثر واكثر .. ومنال ارتاحت بينهم وتعلقوها .. مابقى الا حمد .. بعدها منال مانزلت له من زور ..

اخر الاسبوع تزهبت منال بتسير صوب اهلها .. ونوره يالسه معاها في غرفتها .. مب هاين عليها ان منال تروح عنها ..
منال : عموه شو البس .. الفستان الازرق الي شريناه من المارينا .. والا البس البنطلون والقميص البني الي يابه لي فيصل ..؟
نوره : لا لبسي الفستان الازرق احسن .. وخلي البناطيل اهنيه لاتلشين شي منهن .. تعرفين انتي ابوج مابيعيبه هالسوالف هههههههههه
منال : ههههههههه لا عموه بابا مايقول شي بس حق عاشوه وحمدوه هي بيهزبهن
نوره : خلاص عيل شلي البنطلون البني وياج .. وعاد ها ترا بنتوله عليج مب تحلالج اليلسه عند اهلج وتنسينا ..
منال : لا عموووووتي مابتأخر عليكم بس يومين ترا وبرد
نوره : فديتج ..
وتمت تطالعها بعيونها ومب هاين عليها فراقها ولو يومين ..
راحت خذتها بين يديها وضمتها عصدرها ..

دخل فيصل عليهم ومنال في حضن عمتها ..
فيصل : ها ها شوي شوي عدال خلولي شوي من البزا هههههههه
قامت منال عن عمتها وشافت فيصل وهو حادر يدورهن ..
نوره : خلوني اشبع منها بتسير عنا .. ونا ماعرف شقى بطيق البيت بلااااها ..
فيصل : افاااا يا مااه ترا محد سمعج غيري وبعديلج ايااها .. لعنبوه انا وحمد خلاص ماتبينا .. ولاا خلاص عقب منال ماحد عايبنج هههههههههه
نوره : يعني افدا روحها .. انتو غير وهي غير .. كل حد بغلاااته

منال كانت تطالعهم وتشوف فيصل وعمتها وتحس انها تنتمي الهم وبدت تحبهم من خاطرها ..التفت الها فيصل وشاف في عيونها هالحب والغلى .. حب انه يلاعبها ويضحك عليها قبل لاتسير عنهم ..
سار فيصل ومسك منال وشلها فوق يلاعبها ويغايضبهاااا .. تمت منال فوق وهو يدوربها وهي تصارخ خايفه يطيحها وهو ميت ضحك عليها ..
ونوره تحاول ترمس فيصل وهي خايفه على منال وتباه ينزلها تحت ..
شوي وان حمد ياي بيحدر عليهم وهو يسمع هالصريخ والضحك من داخل غرفة منال ..
وقف حمد عالباب وشاف امه واخوه كيف ان منال استحوذة على حبهم ووقتهم .. تمت واقف يطالعهم ويت عينه على منال واغراضها الي مزهبتنهن ..
حمد وفيه فضول : شو هالاغراض ..؟ منال بترد بيت اهلها ..؟
نوره طالعت فيصل الي طالع امه وفي خاطره يبى يضحك على حمد ..
فيصل وهو مسوي عمره حزين : هي خلاص منال قالت تبى ترد بيت ابوها ..
حمد : ...... وليش تروح محد قالها شي يزعلها ..
تمت نوره تطالع حمد وفيها فضول ومستغربه ردة فعل ولدها ..
منال عجبتها الجذبه وحبت تكملها ..
منال :لا محد زعلني ولا شي بس هذا مب بيتي وانا لازم برد بيت ابويا
حمد وهو منفعل : لالا ها بيتج محد قال مب بيتج .. ومب لازم عليج تردين علشان هالسبب ..
هني ضحك فيصل ماقدر يستحمل ..
فيصل : هههههههههههههههههههههههههههههه اسميك انك .. جي السالفه عيل
نوره بعد ماقدرة تمسك عمرها وضحكت ومنال بعد ..
تمت حمد يطالعهم ومستغرب ..
حمد : ليش تضحكون شو قلت انا ..شي يضحك ..!!؟؟
فيصل : هههههههههههههه لا مايضحك .. بس طلع المستخبي ههههههههه
حمد : عنلاااتك شو بعد مستخبي .. ماقلت شي انا غلط ..
نوره : فيصل يالله عاد يوز عن حمد .. يعني افدا روحه .. حبيبي منال مابتسير عنا بس زياره لبيت ابوها يومين وبترد ..
من سمع حمد هالكلام .. تفشل ومني انقهر على هالجذبه ..وعلى الكلام الي قاله ..
حمد:اهااااا .. اوكي زين ..
منال وهي تغايض حمد : اهااااا اوكي زين .. هههههههههه
فيصل : هههههههههههه بتسير عنك منال ياحمد .. الله يعينك على فراقها
حمد : بسويلكم حفله انا من تسير منال وبرقص كل الخدامات فيها ههههههههههه
فيصل : ههههههههههههه شو رايك تيول انته فيها مع روز ..
منال : لا والله ومستانس حضرتك يوم بيسوون حفله لفراقي ..؟
فيصل : لا افاااا .. بس نبى نطمش على حمد وروز هههههههههه
نوره : ههههههههههه يالله عاد ظهرو خلو منال تتلبس ماشي وقت الشمس بتزول والمغرب بيينا وهي ماظهرة ..

راحت منال بيت ابوها ولحضن امها .. وتمت نوره بروحها في البيت .. مفتقده منال وصوتها الي كان مالي البيت عليها .. عيالها بطبيعتهم كانو دوم يظهرون غير عن منال الي كانت طو ل الوقت الي مر ملازمه عمتها في نشته وقعدتها واكلها وظهرتها ..

حست نوره بالفراغ الي خلفته منال وراها .. ودمعت عيونها .. معقوله انا اتعلق منال بالهصوره .. جنها قطعه مني .. ومب رايمه اصبر عنها ..

عالعشا كانو فيصل وحمد يالسين يتريون امهم تنزل تتعشى معاهم .. وتاخرت .. راح فيصل بيشوف امه .. مب من عادتها تخليهم ياكلون بروحهم والا تتأخر عليهم ..
نش حمد ورا فيصل .. طلعو عند امهم ولقوها في غرفتها يالسه ومالها خاطر لاي شي ..
فيصل : امي .. شي يعورج .. اشوفج مانزلتي تتعشين ..؟
حمد : شو بلاج اماااه ..
نوره طالعت عيالها وحست بحنينها الهم ..
نوره : فديتكم تعشو انتو انا مالي خاطر عالعيشه
فيصل : وهذا علشان منال مب في البيت ..؟
نوره : فديت روحها .. اكيد اني مفتقدتنها بس انا بروحي مالي خاطر تعشو انتو فديتكم
حمد : والله مانتعشاا ولا نذوق العيشه عنج.. بتعشين انتي انحن بنتعشا .. مابتعشين .. انحن بعد مابناكل ..
فيصل : صدقه حمد ..
نوره طالعة حمد وحست بدموعها تتجمع في عيونها .. حمد فيه حنان كبير لمه ولخوه فيصل..ويغار عليهم.. حست نوره بحنان ولدها رغم الي يظهره من عداء لمنال .. بس هي اكتشفت اليوم ان حمد يغلي منال ويحبها بس مستحي يطلع بهالشي .. واكيد هو مفتقدنها مثلهم ..
نوره : فديتكم وانا شقى بيطاوعني قلبي اخليكم تباتون بليا عشا .. يالله اشوف جدامي عالعشا
فيصل : اوهوووووووووو حمد له تأثير قوي اشوف ههههههههه
حمد : هييي عيل شو تتحرا .. انا الغالي هههههههههه


الجزء الرابع





يادمعة عين في فرحي ودمعة عين في احزاني
ياحب تالي العمر اهلا نطرت اسنين لي جاني
بشيلك في وسط عيني يا اغلى حب لاقاني
وفي قلبي يافرح قلبي وشبابي الي رجع ثاني
اي احبك ((منال))





انقظن اليومين الي بتقظيهن منال في بيت ابوها .. وصار وقت رجعتها لبيتها اليديد.. عمتها تتريا رجعتها بشوق ووله..
..فيصل فوق في غرفته يحضر ليوم باجر .. اول يوم الهم للمدرسه بعد اجازة الربيع ..
وحمد فوق بعد .. بس مب علشان يرتب للمدرسه .. لا .. حمد مشغول بشي ويالس يرتبله .. ولكن في غرفة منال ..

دخلت منال البيت الي كانت تشوفه بيت من بيوت الرعب .. ولكن هالمره كانت دخلتها له غير .. دخلت بفرحها وشوقها للبيت والي فيه .. تمت تطالعه بعيون وحده ربت فيه وتم كل ركن فيه يشل جزء من ذكرياتها البسيطه واليديده على حياتها ..
بدون تردد دخلت منال وقاصده الميلس الي تعودة عمتها تيلس فيه دوم ..
بطلت الباب وشافت عمتها يالسه وعندها وحده من ربيعاتها وتتريااها ..
بدون ماتشعر دخلت تربع صوب عمتها .. وانتبهة الها نوره
نوره : هلااااااا هلا والله فديييييييت عمرج ورحج
نشت نوره واقفه وفجت يديها لمنال الي ربعت وهي تضحك وعقت عمرها في صدر عمتها .. ضمتها عمتها وشلتها فوق وهي تبوسها وتلمها وتفرغ شوقها فيها ..
منال : ههههههه عموه بس بتطرحيني هههه
نوره : ياويلي اناا شو هالبنت الحلوه وينج انتي عن عموتج .. ترا وايد تولهت عليج يالقمر
منال : وانا بعد عموه وايد وايد واااااااااااااااااااايد كبر البيت توللهت عليج هههههه
مريم ربيعة نوره : بس كبر البيت .. لالا عيل مول ماتولهتي عليها هههههه
انتبهة منال لمريم وسكتت مستحيه توها منال حست ابها وشافتها ..
نوره : يسلام يامريم لازم تخربين علينا يعني خلي البنت تعبر عن شعورها هاي اول مره تقولي هالكلام وتفرحني هههههههه
مريم : اووه اثرني هبلا وخربت عليكم سمحولي تراني دفشه وماعندي سالفه ههههه
نوره : هههههههههه توج دريتي ههههههه
مريم : يالله عاد مب جدام البنت ترا بتصدق هههههههههه
تمت منال تطالعهن وتضحك في خاطرها على هالحرمة الكبيره وماعندها سالفه ..
نوره : منال سلمي على خالوه مريم .. هذي ربيعة عموتج من يوم حنا صغار .. يوم الميانه ههههههه
منال : هلا خالو مريم .. شحالج
مريم ابتسمت لمنال وراحت عندها وباستها على خدها ..
مريم : انا بخير حبيبي انتي خبريني شحالج وشحال اهلج ..
منال : الحمدلله خالوه كلهم بخير ويسلمون على عموه نوره وعليكم
مريم : الله يسلمهم من الشر يارب
نوره : ويسلم من ياب السلام ... تعالي انتي تعالي عند عموتج يالبطه .. ترا متخبله عليج ..هههههههه
مسكت نوره منال ويلستها جدامها وقعدن يسولفن ..
نوره : منال ترا باجر عموه مريم بتاخذج وبتوديج للمدرسه اليديده الي بنسجلج فيها .. وبتم وياج ... والي تبينه خبريها اياه لاتستحين منها ..
منال : وين بتسجلوني عموه ..؟
نوره : بنسجلج في مدرسه قريبه وبتكون عندج بنت خالوه مريم وبتكون وياج في نفس الصف .. ها شو رايج زين ..؟
تمت منال ساكته وتفكر .. ربيعاتها ومدرستها وخواتها مابتكون معاهن ... كل شي بيتغير عليها .. تضايقت منال وماعرفت شو تقول لعمتها .. خلاص كل شي في حياة منال تغير والي هم ابوها وامها تغيرو في حياتها عيل كيف ربيعاتها وخواتها اكيد بيتغيرون هم بعد ..
طالعت منال عمتها نوره وشافت ماباليد حيله
منال : خلاص عموه .. على كيفج
مريم : فديت انا المطيعين الي مايخالفون .. ترا بنتي اسما بعمرج وبعرفج عليها باجر .. ولا تخافين من شي اي شي تبينه اسما بتخبرج عنه ..

خلاص عموه نوره وربيعتها مريم كانو مرتبين كل شي لمنال .. وماخلو لمنال شي تفكر فيه .. تذكرة منال فيصل وحمد ..
منال : عموه.. عيل وين فيصل وحمد لا يكون رقدو من الحين علشان المدرسه ههههههه
نوره : هههههه جي دياي هم .. لا هم بعدهم ماتعشو .. شو اشتقتيلهم ..؟
استحت منال واحمر ويها ..
منال وهي تميل بجسمها على عمتها من المستحا
منال : هههههههه لا عممممموه بس اتخبر عنهم
مريم : شو عموه بعد .. وما عموه .. نوره انتي مب يايبتنها تكون بنتج .. ليش لين اليوم قابضين على عموه هههههههه
نوره : هههههههه لا تحرجين البنت .. انا مخليتنها على راحتها في هالسالفه .. وترياها لين مابروحها تظهرها لي من خاطرها ههههههههه
مريم : واذا البنت استحت بتبطين اترين ..هههههههه وانتي مابتشجعينها عليها هههههههه
نوره طالعت منال وهي تبتسم : ها منال شو رايج .. ماما والا عموه ..
طالعت منال نوره ومريم ونزلت ويها .. ماما نوره .. فكرة في الاسم وحست بحنان عمتها وطيبتها .. قالت ليش لا .. ترا انا الحين ماعندي ام .. وابى تكون عندي ام تعيش ويايه وتكون قريبه مني .. ومابحصل ام احسن من عموه نوره ..
رفعت منال ويها لعمتها وطالعتها وهي تضحك ومستحيه ..
منال : لا ماما احلى هههههههه
راحت نوره من سمعت هالكلمه وضمت منال وتمت تبوسها
مريم : هههههههههههه بسج فجي البنت خليها تروح تشوف اخوانها ..
نوره : ههههههههه وااااااااي فديتها.. انتي اليوم ناويه تخربين عليه وعلى منال فرحتنا .. بس يالله بنعدي هاليوم جي هههههه
مريم : ههههههههههه الي يشوفج ويشوف بنتج يقول قيس وليلي .. مب ام وبنتها هههههههه
نوره : مالومج .. تراج خايسه من البني ماحسيتي بالي حسيتبه وانا مثل اليتيمه بلا بنت تونسني ههههههههه
مريم : الله يخليلج فيصل وحمد .. شو تبين من هالدنيا وهم عندج ...!!
نوره : امين يارب ويخليلي منال بعد ويزيدهم ويبارك فيهم ههههههه
مريم : امين .. وانتي فجي هالبنت خليها تسير اتشوف خوانها ..


طلعت منال عنهم بعد ماقالت الها امها نوره تسير تسلم على خوانها وعقب ينزلون للعشا .. وتمت نوره ومريم يسولفن رواحهن ..

راحت منال غرفة فيصل .. تبى تسلم عليه .. دقت الباب وفي ويها مستحى خفيف من عقب غياب عن البيت وعن خوانها ..
رد عليها فيصل وهو من داخل ..
فيصل : هاااااا منوووووو
منال : ......... مياااو ..
سكت فيصل وهو بفكر مستغرب .. قطوه ..!! قطوه ادق الباب .. !!
سار فيصل صوب الباب بيفجه عقب تروع وتم واقف محله زايغ .. جن ..! يمكن ليش لا ..
ردت منال تدق الباب ..فيصل رد وسأل..
فيصل بصوت حذر : منو ..؟
منال : .... ميااااو ..
فيصل راح عند الباب وهو يضحك على عمره .. محد غيرها هالقطوه اكيد ردت ..
فج فيصل الباب بسرعه وجان يصارخ بصوت عالي مثل الوحش يفاجئ منال عشان يزيغها ..
منال صرخت وتيبست مكانها من الزيغه ..
فيصل : ههههههههههههههههههههههههههههه تبين تزيغيني اونج وانتي بروحج خوافه ..
منال : الله يغربل بليسك .. اااااه قلبي .. خلاص ابيض شعريه من الزيغه ..
فيصل : ههههههههههههههه خيبه لحقي ربعي طالعيه نصه ابيض والنص الثاني اسود هههههههههه رويلا ..
منال : كله منك والله اخبر امايا عليك اهئ اهئ
فيصل وهو فاج اعيونه في منال ويطالعها ..
فيصل : مناااااااال ..
منال فجة اعيونها زايغه : شو؟
فيصل : شو سويتي تحت .. شوفي عند ريولج ..؟
منال : شو تحت ..؟ مابطالع ..
فيصل : ها من الزياغ الله يغشج .. سويتيها ههههههههههههههههههههه
طالعت منال بسرعه تحتها وماشافت شي .. انقهرة من فيصل الي تولاها من يت ..
منال : شو هذا انته بتينني وانا توني يايه .. تحيد عمرك انته الي تسويها يالذروق ماعليه ماخبرت عليكم امايا ..
فيصل : ههههههههههههههههه تعالي تعالي .. تعالي خبريني عنج .. شحالج وشو سويتي من ورانا هههههه
منال : امبوني بخير قبل ماشوف ويهك وتسويبي هالسوايا .. خلاص بروح عنك تعبت انا منك
فيصل : هههههههههه تعالي وين تبين بعدني ماخذت اعلموج ..
منال : ولا بتاخذهن ماباك.. ومابا ايلس وياك خلاص كرهتك ..
فيصل : ههههههههههههه منوووووووول يالله عاد سوالف ..
منال وهي رايحه عنه : لالا خلاص بسيرارتاح حشه لعواز انته ..

خلاها فيصل تروح عنه وتم هو يطالعها ويضحك ويذكر الي سواه فيها ..

دخلت منال غرفتها وهي تدعي على فيصل ومعصبه .. راحت بتفج الكبت بتظهر ثيابها بتتسبح وبتغير .. اول مافجة الكبت شافت شي غريب فيه .. تقربت تطالع ...
لقت كشه حمرا وشي واقف ورا الثيااااااب .. تمت واقفه تطالع وماحست الا بهالصرخه وان الكشه الحمرا تظهر من الكبت وتجدم صوب ويها .. وتصرخ منال بأعلى حسها وتربع من عن الكبت بتظهر وتمت الكشه وراها لين الباب ويقبضها من وراااااا وتم ييرهاااا ..
هني منال مارامت تستحمل التفتت بتسوي شي وان القناع يطيح ويظهر ويه حمد ..
منال طالعت حمد وهي في حالة رعب .. وحمد انفج يضحك عليها والتفت منال صوب الصوت الي ياي .. وانه فيصل ماقدرة منال تسوي شي .... طاحت واغمى عليها ..
من طاحت منال سكت حمد .. وسكت فيصل من الضحك .. تمو يطالعونها عقب ما اغمى عليها ويطالعون بعض ..
حمد وهو زايغ : شو بلاها طاحت ..؟
فيصل وهو خايف : مادري يمكن ماتت ..!!.؟
حمد فج عيونه في اخوه ومات زياااااااغ .. وفيصل تمت واقف محله وخايف مب عارف شو يسويبها ..
فيصل : حمد سو شي قومها شوفها ..
حمد : لا انا اخاف قومها انته..

تمو يطالعونها وكل واحد منهم مب طايع يجيسها .. وخايفين ..
اخر شي ترابعو تحت عند امهم بكل خوف بدون مايفكرون.. بيبخبرونها ان منال طاحت ومايعرفون شو بلاها ..
نوره من سمعت الخبر ربعة مثل المينونه تلحق على منال ومريم من وراها وفيصل وحمد وراهن ..

تمت منال نايمه في سريرها وعمتها نوره وفيصل وحمد حواليها وبعد مااطمنو عليها استسمحت منهم مريم وسارت ..
تمت نوره تحاسب عيالها على الي سووه بمنال ..
فيصل : اسف اماه بس ماتوقعت ان منال بيستويبها كل هذا ..
نوره : تعرفون هاي بنيه وياهل يعني مب واحد من العيال ربعكم تسووبها جي ..
حمد : اونها عاد .. هاي بروحها بدون ماتسوي شي تزيغ عشره من ربعنا ههههههههه
نوره بضيقه : ونته بعدك ماحسيت بالي سويته ..؟ شو تبا يستوى اكثر علشان تحس ..؟
حمد : اماه منال هذي نشت ومافيها شي .. وبعدين انا شو ذنبي اذا هي طلعت ذروق وماتقهر العب والمزاح ..
فيصل : لالا صدقها اماه .. الي سويناه في منال اليوم غلط ..
حمد : ما سوينا شي غلط .. كنا نلاعبها .. مب دوم هي تشتكي منا واننا مانداخل وياها .. ها الي صار يوم عطيناها ويه ولاعبناها ..
نوره : لا والله ..؟!! وجي العب مالكم .. بالتخريع والزيغه .. لو صارلها شي الحين ..!! شو بنسوي ؟
حمد : عادي والله بس هي بزيا وماتقهر .. اونها صرخة واغما عليها .. اخخخ اناااا كل مااقول البنت اصطلبت تطلعلي بشي يديد
نوره بملل : لا اله الا الله ..ماشي فايده فيك
فيصل : هههههههههههه خلاص اماه لاتكبرون السالفه .. تلومينا عشي ماكنا قاصدينه ..
منال : ماماه خلاص ماصار شي ..
حمد فاج عيونه من الي سمعه : ماماه .. يسلاااام اطورة العزيه ههههههههههه
نوره : هي ماماه شو ..؟ تراني امهااا
فيصل : لا البنت تمكنت الحين .. انا وحمد خلاص بيقبضون الباب هههههههههه
منال وهي تعبانه وتدلع على امها : امااااه شليهم عني وطلعيهم .. ماباهم
فيصل : هههههههههههه ااااااااه يالدلع بعد غير
حمد : منو يروملها الحين ست الدلال .. منسدحه وتتأمر ههههههههههه
نوره : بسكم عاد ظهرو عنهاااا
فيصل : هههههههههههه حمد لو انته تدلعت مثل منال جان من زماااان خذت الغلا واالبزا كله هههههههه
حمد : ههههههههههه حشا عليه ماباه هالدلع الماصخ
نوره : ترومون تظهرون انتو والا شو ..؟
حمد : هههههههههه ظاهرين ظاهرين حشا ماترزا عليج هالمنال تجحتين عيالج عسبتها ههههههههههه
فيصل : انا بظهر بكرامتبه ابركلي ههههههه


بالباجر نشو بيسيرون المدرسه .. طلعو العيال عقب ماتريقو .. وتمت منال تتريا خالوه مريم تمرها وتوديها المدرسه ..

في المدرسه منال تعرفت على اسما وتعرفت على ربايع اسما بعد .. وكابدايه منال ارتاحت بينهم .. تطمنت مريم على منال وراحت عنها ..
اتصلت مريم على نوره تلفون وطمنتها على كل شي ..

مريم : تطمني يانوره منال دخلت صفها والحين تلقينها ارتبشت مع البنات وتصادقن وياها
نوره : فديت روحها .. تعرفين يامريم .. احس اني انسانه ثانيه من عقب ما دخلت منال حياتي .. كنت احس بوحده صدق من الخاطر .. بس الحين احس وقتي مليااااان .. ومنال مب عاطيتني وقت حتا اتنفس هههههههه
مريم : هههههههههه الا قولي حمد ومنال الي قاطعين لج نفسج من ضرابتهم وحشرتهم الي ماتوقف هههههههه
نوره : يعني افدا روحهم .. الا فيصل الي مااشتكت منه منال ولا هو ضايقها بشي ..
مريم : فيصل غير .. فيصل ماشالله ريال وفديته احسبه انه متحمل مسؤوليتكم وجنه ريال البيت ..
نوره : فيصل فديته من فطن وحس بي وبحمد واننا رواحنا تم يفكر فينا .. واحسبه انه يكبر عمره الا علشان يحسسني ان عندي ريال وبيشل الحمل عني ..
مريم : الله يخليه لج انشالله .. والعمر يخطف بسرعه .. منو يقول اني انا وانتي عرسنا ويبنا عيال .. وماشالله عيالنا طولنا وعقب كم سنه بنشوفهم معاريس ..ههههههههه
نوره : والله يامريم جني احس اني امس كنت يالسه وياج وويا ربايعنا ونرمس عن العرس والعيال .. هههههههه ماتقولين ان الزمن مر ابنا ويا هاليوم الي كنا نرمس عنه ..
مريم : كلنا عرسنا ويبنا لعيال الي نحلمبهم هههههه بس ليتج يانوره عرستي عقب المرحوم .. جان يبتيلج عيالج وكملتي حياتج ..
نوره : لالا تيبين هالطاري يامريم انا مرتاحه شي ولا ابى شي يتغير عليه ..

نوره حرمه حلوه والف من يتمناها وكثير من ياها وخطبها عقب المرحوم .. بس هي حبت انها تربي عيالها وتحافظ على ذكرى زوجها .. وخافت انها تطيح على واحد يلعوزها ويلعوز عيالها .. فتمت بلا عرس وملة وقتها بعيالها وبس ..

ردو العيال من المدرسه وبدت الحشره والازعاج مع ردتهم .. وبدا النص الاخير من يوم نوره يمتلي بجو عيالها وربشتهم في البيت ..

على الغدا اجتمعة العايله وبدو ياكلون .. وطول الوقت ومنال ترمسهم عن مدرستها وابلاتها وربيعاتها اليداد .. على طول ترمس ترمس ترمس ماتسكت ..
فيصل كان يسمعها ومايعلق بس يضحك .. ونوره كانت مهتمه وتسأل عن كل صغيره وكبيره .. وحمد كان كله يعلق عليها ويضحك عليها ..

منال : تعرفين امااه .. المس طلبت علينا نيب اي حيوان علشان نخليه في الصف ونربيه ..
نوره : حشه من اول يوم طلبات هههههه تونا الا مسجلينج
حمد : هههههههههههههه وليش بعد تطلب حيوان .. الي عندها في الصف مايسدنها هههههه
منال وهي مب فاهمه عليه : ماعندنا شي في الصف غير ضفادع وسلاحف وبنت يابت سحليه بس..
فيصل : هههههههههههههههههههههه بس..!!
حمد : ههههههههههههههههههههههههههههه ومعزه يديده توها مسجلينها هههههههههه
وينفج فيصل يضحك عليهم .. منال فاجه حلجها بعدها مب فاهمه السالفه وحمد طايح طنازه عليها وعلى ربيعاتها ..
نوره : حمد بابا اذا خلصتو غدا سيرو شوفو دروسكم يالله ..
حمد : هههههههههههه انشالله امااه

همسي لحبيبي ©؛°¨غرامي مجتهد¨°؛©

.............والباقي بكره ان شاء الله
واتمنى لك كل المتعه في قراية القصه...1
بـــــــــــــــــاي

LeftOver Soul ©؛°¨غرامي فعال ¨°؛©

هههههه فديتك تقدري تقولي سوسو خخخ

والله واخيييراً قدرت منال تتأقلم مع اخوانها

فيصل وحمد ههههه كله ضحك عندهم

نورة حبيتها من بداية القصة

ويلا بنتظرك تحطي التكملة .....


تحياتي


VEN!CE يـآرب مآلـي ســـوآكـﮯ

يسلموووووو
علي التكمله
وانا بعد ابي بارت زيادة علشاني




،،

همسي لحبيبي ©؛°¨غرامي مجتهد¨°؛©

آآآه...ونــــــــــاسه
تسلمون سوسو..وفينيسيا,,,
عشان خاطركم ولعيونكم بس هذا الجزء الجديد....
سوسو..توك على الاحداث ياحبيبتي وصدقيني بتحبيهم أكثر...
وآآآآآه يالعمه نوره....مره تجنن..ياليتها عمتي..ههههههههههههه

أدوات الموضوع البحث بهذا الموضوع
البحث بهذا الموضوع:

بحث متقدم
طريقة العرض

موقع غرام موقع سعودي خليجي عربي يحترم كافة الطوائف والأديان ومختلف الجنسيات
جميع الحقوق محفوظة منتديات غرام
iTraidnt by ROMYO
جميع الحقوق محفوظة منتديات غرام
iTraidnt by ROMYO

SEO by vBSEO 3.6.1