رواية أشكي للي بين ضلوعي الجزء الاول

غرام منذ عام 2004 جاء دورك

49 SAR

روايات غرام

((الجزء الاول))


قامت من نومها كعادتها وبرنامجها اليومي مع انه كل يوم الا انها ما تمل منه..هذي المرحة لولوة.. كانت تحب اللعب بجنون بكل أنواعه.. هبال وخرابيط البنات تلقوها عند لولوة.. مصرقعه..ومونسه نفسها عل الآخر.. وكان ما يهمها شئ..أهم شئ في حياتها تنفيذ الفكرة اللي تجي ببالها..

ناظرت في الساعة..والا هي عشر ونص.. عاد هي عندها عوايد غريبة.. لو نامت باي وقت لازم تقوم من الصبح عشان تلحق على كل الاوقات(صبح وظهر وعصر ومغرب وعشا) تخاف يصير حدث بالبيت وما تلحق عليه...وعشان تحس ان يومها ما ضاع..

نقزت من سريرها من دون تلتفت لوراها شلون صار سريرها..وتوضت وصلت الضحى.. وراحت للمقلط.. ودخلت..

لولوة:السلام عليكم..

ابو محمد+ام محمد: وعليكم السلام..

ابو محمد:هلا بالرجة..هلا ببنيتي..

لولوة..جت عند ابوها وحبت راسه..وما علقت على كلامه..يقالها توها قايمة من النوم ومالها خلق..

وجت عند امها وحبت راسها..صبحكم الله بالخير جميعا..

ام محمد + ابو محمد: الله يصبحك بالنور..

ام محمد: تعالي اقعدي وتقهوي..

لولوة:طيب واخذت فنجال وصبت لنفسها قهوه ويوم جت تشربها.. قالها ابو محمد..

ابو محمد: لا لولوة ما يصير لازم تاكلين شئ قبل لاتقهوين..مايصير قهوه على الريق..

ناولتها ام محمد الرطب..وخلتها تاكل..... لولوة تاكل بصمت وما اتكلمت.. الا شوي..مع كم فنجال من قهوة ام محمد..روقووووووووووها عل الاخر.. وقامت تسولف وصاروا ميتين عليها من الضحك...

لولوة: ابو محمد(مطيحة الكلافة ما كانه ابوها).. وين الحرمه الثانية اللي ناوي تجيبها.. بس تكفى يبه غيّر خليها من برى.. خلنا نتعرف على عادات واساليب الشعوب المجاوره..

ابو محمد: وانا قايل لا..بس اقنعي امتس.. اذا هي موافقه..دوريلي من الدول المجاورة..(مبتسم ويطالع بام محمد وينتظر ردة الفعل)..

لولوة: ابشر يبه.. انت تامر امر.. وطالعت امها تبي تشوف وشي ردة الفعل..

ام محمد كالعادة.. ما تهزها هالسوالف..مريحة بالها لانها دارية ان الرجال احلى سالفة عندهم الحرمة الثانية ولو تتناقشين معهم الى يوم الدين ماراح يسكتون..

وزعت نظراتها بينهم وهي تضحك.. وقالت للولوة:اقول لايكثر هرجتس.. شلون غرفتك لولو..

لولو:يمه عاد..تكفييييييييييييييييين... اليوم خميس.. يوم اجازة..خليني استانس.. ما ابي سيرة الشغل.. بعدين يا مامتي الحلوة.. الحرمة اللي بالمطبخ اللي جايبنها اكثر ظني من اندنوسيا وش شغلتها..

ام محمد:لا يا شيخة.. اشوف لسانك طال وعجبتس سالفة الشغالة..مو كل شئ الشغالة..حرام عليتس..

لولو:والفلوس اللي نعطيها اياها ليش؟

ام محمد:يا كثر ما تلعبين وتستانسين ولا جا طاري الشغل صديتي.. مهوب على كيفك.. الغرفة تنظفينها انتي.. خلاص..

لولو: خلاص يمه..على هالخشم..تامرين امر يا احلى ام بالدنيا..كم عندي ام انا..

ام محمد:بسم الله اكيد وحده والا الشعوب الثانية عندهم كم ام..

هنا ابو محمد ما قدر يكتم الضحكة وانفجر من الضحك عليهم...

لولو: ابششششششششششششششششششششششششششششششري...

هنا سلطان دخل عليهم... الله من كبر الكذبة لولو تقول ابشري...وجا وسلم على امه وابوه وحبهم على راسهم.. ويوم جا عند لولو..نزلت راسها(تبيه يسلم على راسها) وضربها على راسها..

لولو:آآآآآآآآآي..يبه شوف سلطان..

ابو محمد:وراك على البنت...

سلطان ما فيها شئ بس تتدلع..

وقهوت لولو اخوها سلطان..كم فنجال بعدين صرخت عليه ترى اعطيتك وجه قهوي روحك.. وبسرعه خرجت عشان تسلم من الضرب..


لولوة..لها اختين غيرها..وحده اكبر منها متزوجة..ولد عمتها واسمها لطيفة(ولها بنت اسمها رغد).. والثانية نورة رابع ابتدائي.. وهي اولى ثانوي.. والعيال.. محمد اكبر واحد متزوج وحده من معارفهم(وماعنده احد).. وبعدين سلطان ثالث جامعه تخصص (شبكات ونظم معلومات)..عبدالله.. بثاني متوسط..معروف بنومه الثقيل..

*****************



عائلة (ابو فيصل)..

ابو فيصل..(صالح).. زوج مزنة اللي هي اخت ام محمد.. جيران وبينهم عشرة محد ينساها..

ام فيصل..(مزنة).. جابت فيصل والجوهرة وكلهم عملية وتعبت بولادتهم..قالوا لها الاطباء مايصر تحملين.. هي ماسمعت كلامهم وجابت عقبهم اثنين وعملية بس كلهم ماتموا معاها اكثر من شهر واتوفوا.. وفقدت املها بالعيال.. واتفاهموا هي وابو فيصل..وخلاص ماتقدر تجيب عيال...

فيصل.. ولدهم الكبير. تخصص(هندسة).. وصديق سلطان الروح بالروح.. وولد خالته..

الجوهرة: ثالث ثانوي..متكلم عليها سلطان ولد خالتها بس الى الان ماصار شئ...

ناظرت جوهرة..عادت مرة ثانية.. مهي مصدقة.. جت تبي ترد على احد المواضيع والا احد من الاعضاء نفس ردها بالضبط او تقريبا نفس وجهة النظر اللي هو (المجروح)..قامت تضحك.. وردت كنت باكتب نفس اللي فوقي تقصد وجهة النظر.. اسمها بالمنتدى.. (عود أذان).مصرقعه بالمنتدى لأنها تعتبر ان ما احد يعرفها..يعني هبلي على كيفك..لكن بالطبيعة ما تقدر عندها خجل.. او انها حساسة مرة..ماتحب احد ينقدها او يوجه لها كلام مهو زين...

جات وحدثت الصفحة ولقت (المجروح)..راد... القلوب عند بعضيها وحاط وجه مبتسم.. ما حبت الميانة الزايدة.. لكن ما ردت على الموضوع..

الموضوع..كانت وحده من العضوات كاتبة مشكلتها..مع امها.. وان مهما حاولت ترجع العلاقة ماهي قادرة..وامها غليظة..وماتحب عمانها.. وكرهتها عشان تدافع عن عمانها.. المهم ان كل الاعضاء يردون عليها بانها تحاول الصبر..وتحتسب الاجر.وايش ماسوت ترى ذي امك.. وقامت تفرفر بالمنتدى وترد على الالعاب اللي فيها... ونادتها امها وقفلت النت...

الجوهرة:سمي يمة..

ام فيصل: ها يا عيوني فكرتي باللي قلت لك..

الجوهرة:والله ما اني عارفه وش اقول.. هذا ولد عمي عل العين والراس.. بس ولد خالتي متكلم فيه.. صعبة..اخاف يكون في خلاف..او شئ بين العوائل والسبب انا..

ام فيصل: وش خلاف..هم ما جو رسمي.. وذا رسمي..

الجوهرة: اخاف انهم يعتبروا الكلام اللي زمان رسمي..وما ادري وربي مني عارفه اقول شئ..

ام فيصل: انتي ماتبين ولد عمتس..

الجوهرة:لا وشو ما ابيه مافيه شئ بس....

ام فيصل: وشو اللي بس..

الجوهرة:يمة تعالي ندخل بغرفتي ازين من الصالة عشان محد يسمعنا..

ام فيصل:طيب..بدا الدلع..

وراحت هي وامها لغرفة الجوهرة.. وتحاول تقنعها بالسالفة وانها مرة صعبة...

ام فيصل: هذا اللي ناقص.. تبين انروح عندهم وتقولون تبون بنتنا والا لا...

الجوهرة:يمة لاتعصبين الله يخليك..وقربت من عندها وباست على راسها.. وجلست جمبها بالكنبة الطويلة.. يمة.. لاتزعلين من كلامي.. بس انتو اللي بديتوها..يعني واحنا صغار..عطيتوهم كلمة..واللحين يوم كبرنا وصار اللي صار..تشوفون ان الكلام هذا مو شئ..وغلط اننا نلتزم بالشئ اللي سوينها زمان... يمة لاتتوقعين اني ..( وسكتت مي عارفة شلون تتكلم مستحية من امها) واخذت نفس وكملت.. لاتتوقعين اني ادور عذر عن ولد عمي بهالكلام..بس اخاف يكونوا خالتي وعيالها..بانيين اشياء ومخططين على اشياء..ومرتبين امورهم على ان هالعرس قائم.. وماتهون علي خالتي..وبنفس الوقت.. لو كانوا معتبرينه كلام بس..خلاص يتم الزواج بدون خلاف..

ام فيصل: والله كلامك صح..بس شلون نكلمهم..

الجوهرة:شوفي يمة..سالفة الحجز..كانت تلميح صح..

ام فيصل:ايه..تقريبا..

الجوهرة:واحنا نجيبها بعد تلميح..ندور أي سالفة ونخربط وبالتلميح عشان نعرف هم جازمين او لا..

ام فيصل:الا هنا انتهى دوري..فكري بالحالك..وخبريني..

الجوهرة:ان شاء الله يمة..بس اذا ماعندك مانع..تخبرين الوالد اني اللحين بثالث ثانوي..وردي ما راح يكون الا بعد ثالث..

ام فيصل..على امرك ياقمورتي..

جت الجوهرة وحبت راسها وقالت ما يامر عليك عدو..

وخرجت ام فيصل من عندها... وهي عارفة ان الجوهرة دايم تقنعها غصبن عنها..بكلامها المرتب..والمؤدب.. وتجيب لها حلول مناسبة...

خرجت ام فيصل وتركت الجوهرة بدوامة عميقة..تفكر بصمت..بقوة..ماتدري شلون.. هذي المرة صعبة..صعبة ياجوهرة..اعترفي..انهزمي..يجيها صوت اكبر واعظم ويقولها لا..كل مشكلة ولها حل..

ويجي الصوت الثاني..قوليها.. انتي تحبين سلطان..سلطان. وسلطان يقوى ويكبر وهي خايفة معقولة انا احبه.لا ..اصلا وش فيه شئ مميز عن غيره.. ويجي الصوت الثاني ليش تدافعين طيب... لازم اعترض هذي فيه خلافات عوائل مو شئ هيّن.. ويجي الصوت الثاني لاتحاولين تقنعين نفسك وتتهربين من الواقع باشياء توهمين نفسك فيها... اصلا شلون احبه وانا ما اكلمه بس كيف الحال؟ وعالطاير.. اعترفي بتضحكين على روحك..هنا وقفت... الصوت هالمره اقوى منها.. لازم اوقف التفكير الان..لاني بانجن.. وبيصير فيني شئ.. راحت على سريرها.. واخذت كتبها وقامت تحاول تلهي نفسها بالكتب... ونامت وكتابها على وجهها من كثرت التفكير....

******************

عائلة (ابو خالد)


ابو خالد:اخو ابو فيصل.. بس هو اكبر منه..

ام خالد:الام الرقيقة..الحبوبة.. تقدم رغبات الناس على حسابها..

خالد: الكبير وعمره 27 سنة.. حبوب وطيب..حاله حال نفسه..مايحب الرجة والصجة..والمهاوشات.. هاااااااااااااااادي.. بس لايزعل او يعصب.. ينطبق عليه (اتقِ شر الحليم إذا غضب)... وغااااااااااااااامض...

منصور.. عمره 25 سنة.. وسيم مرة.. له شخصية وهيبة.. جدي باكثر الأحيان.. يعشق الكتب..والكتّاب.. مثقف.. ويسمونه دودة الكتب.. عنده افكار بنّائة للمجتمع.. ويحاول يحل المشاكل ويستفيد من مشاكل الناس..ومايرتكب أخطائهم.. بس مع كل اللي عنده مايبين للناس ثقافته.. ويوم يتكلم معاهم يكتشفون فيه هالثقافه.. منصور هو اللي متقدم لـــ(الجوهرة)..

عهود: عمرها 20 سنة بثاني جامعه.. غريبة شخصيتها ..مره تكون طيبه..ومره الشر ناقز من عيونها.. وترمي الكلام من دون لاتحسب اللي قدامها يتقبل هالكلام اولا...

خلود: بنت تجنننن..مره حلوه.. بيضاء وخدودها وردي... صافية بشرتها.. عيونها وساع.. شعرها ناعم..طويل.. لونه احمر غامق..من الحنه اللي كانت امها تحط لها وهي صغيره.. خشمها مهو كبير ولاصغير.. وحاد.. ماشاء الله من زيّنها.. احلى وحده من البنات.. ناعمه البنت بشكل يلفت النظر... كل ماجت مكان امدحوها الناس..وصارت تستحي.. وزادها جمال.. الخجل والنعومه.. والبنات اللي بالمدرسه معاها كثير معجبين فيها... بس هي تكره الاعجاب عشانه حرام..وتبين للبنات انه حرام.. ومادخلها الغرور.. ثاني ثانوي(17 سنة)

*************

دخل خالد الصالة..وسلم عليهم..

منصور: يوه دخل خالد..اسكتوا..

خالد: احم احم وش عندكم...

عهود:اقرب اقرب خالد.. تعال اقعد عندنا..

خالد:مدري هذي تصريفة للسالفه والا ترحيب فيني..

خلود+منصور:ههههههههههههههههههههههههههههههههههههههه هه

عهود:الحمدلله..يقالهم بيقهروني.. لا مو تصريفة ابيك تقعد اصلا احنا بسالفه مهمه...

خالد..من اول واقف بطرف الصالة..جاي من الدوام وتعبان.. بس عشانهم قعد معاهم.. واقترب وقعد بالكنب اللي بالطرف لانه ناوي يطلع لغرفته..

خالد: وش عندكم؟

منصور: اها..قلتلي وش عندكم.. ويبغ يبدا بفلسفته الي تقهرهم..

خالد:باطلع ولا قضى فلسفة علموني..

منصور+عهود+خلود:هههههههههههههههههههههههههههههه

خلود:لا تعال.. كنا نتكلم عن خطبة منصور...

خالد:اها واشوف الرجال قام يصرف الموضوع...

منصور:انا..انا البحر في احشائه الدر كامن..

خالد:تكفى يابحر اموت انا.. المهم ياعزيزي.. وش صار..

عهود:ابد الى الان ماردوا..

خالد:طيب..

عهود:شلون طيب؟ الى الان ما ردوا..ليش ذا اللي مستغربين منه..

خالد:ترى ذا زواج مو لعبه..لازم تفكر.. وحتى لو طولت.. مافيها أي شئ..

منصور: هذا نفس كلامي..بس يقولون لي لا هذا كله مو تفكير ومدري وشو..

عهود: الي اقصده ان من الاجازه واحنا تكلمنا كلام حريم واللحين جينا رسمي.. احسها طولت..





للمتابعة يمكنكم الشراء

في حالة الطلب سيتم ارسال رابط مخصص للروية وتصفحها وبامكانكم تحميلها بتنسيقات متعدده MOBI - EPUB - وغيرها من الصيغ المختارة - 

مع العلم بأن الرواية متوفرة على حساب موقع غرام عبر تويتر والتليغرام فقط للتصفح

المضاف بروابط التواصل بالأسفل

  • 49 SAR

Products you may like